واشنگٹن/تہران، امریکی فوج کے ایران پر مسلسل دسویں رات بھی فضائی حملے جاری رہے، سینٹکام کے مطابق امریکی افواج نے ان حملوں میں ایرانی فوجی کمانڈ سینٹرز، بحری صلاحیتوں، میزائل اور ڈرون لانچنگ سائٹس اور ایئر ڈیفنس سسٹمز کو نشانہ بنایا۔

سینٹکام نے بتایا کہ ان کارروائیوں کا مقصد آبنائے ہرمز میں بین الاقوامی تجارتی بحری جہازوں پر حملوں کی ایرانی صلاحیت کو ناکارہ بنانا ہے۔ امریکی سینٹرل کمانڈ نے دعویٰ کیا ہے کہ کشیدگی کے باوجود آبنائے ہرمز سے تجارتی جہازوں کی آمد و رفت کا سلسلہ جاری ہے۔

سینٹ کام کے مطابق مئی سے اب تک امریکی فورسز کی نگرانی میں تقریباً 900 تجارتی جہاز اس اہم بحری گزرگاہ سے محفوظ طریقے سے گزر چکے ہیں۔

ادھر ایرانی سرکاری میڈیا نے خبر دی ہے کہ ایران کے مختلف شہروں میں رات گئے دھماکے ہوئے ہیں، چاہ بہار، بندرعباس، سرک، بوشہر اور قشم کے شہروں میں دھماکے سنے گئے۔

حکام کے مطابق بوشہر میں دشمن طیاروں کے ممکنہ خطرے کے پیش نظر فضائی دفاعی نظام کو فعال کر دیا گیا ہے، دوسری جانب پاسدارانِ انقلاب نے جنوبی ایران کے علاقے رودبار میں ایک امریکی کروز میزائل مار گرانے کا دعویٰ کیا ہے۔

یو این آئی۔ع ا۔

تہران، ایران کے پاسدارانِ انقلاب نے کویت اور بحرین میں اہم امریکی فوجی تنصیبات پر حملوں کا دعویٰ کیا ہے۔

تسنیم نیوز ایجنسی کی جانب سے نشر کیے گئے بیان میں پاسدارانِ انقلاب نے دعویٰ کیا کہ اس کی فورسز نے احمد الجابر فوجی اڈے پر نصب ایک ابتدائی انتباہی رڈار، میزائل دفاعی رڈار نظام، ایف پی ایف-117 ریڈار، پیٹریاٹ دفاعی نظام، اور فضائی دفاع کے سیٹلائٹ مواصلاتی نظام کو نشانہ بنا کر تباہ کر دیا۔

بیان میں مزید کہا گیا کہ اس کارروائی کا مقصد خطے میں رڈار کی نگرانی کا دائرہ ختم کرنا تھا تاکہ آئندہ میزائل اور ڈرون حملوں کے لیے راستہ ہموار کیا جا سکے۔

گروپ نے یہ دعویٰ بھی کیا ہے کہ اس نے علی السالم فضائی اڈے پر موجود ایم کیو-9 ڈرونز کے ہینگر کو نشانہ بنایا، جس کے نتیجے میں متعدد بغیر پائلٹ طیارے تباہ ہو گئے یا انھیں شدید نقصان پہنچا۔

پاسدارانِ انقلاب کا کہنا ہے کہ اس نے اپنی تازہ فوجی کارروائی کے دوران بحرین کے علاقے المحرق میں بھی امریکی فضائی دفاعی نظام اور ایک ریڈار کو تباہ کر دیا۔

سرکاری نشریاتی ادارے آئی آر آئی بی کے مطابق جاری کیے گئے بیان میں پاسدارانِ انقلاب نے یہ دعویٰ بھی کیا کہ بحرین کے علاقے الرفاع میں امریکی پیٹریاٹ فضائی دفاعی نظام کو ایک مربوط میزائل اور ڈرون حملے میں تباہ کر دیا گیا۔

پاسدارانِ انقلاب کے مطابق ان حملوں کا مقصد آئندہ فوجی کارروائیوں کے لیے راستہ ہموار کرنا تھا۔

دوسری طرف امریکی فوج نے ایران پر دسویں رات بمباری کی، جب کہ امریکی صدر ڈونلڈ ٹرمپ نے ایران کو خبردار کیا ہے کہ امریکی فوجیوں کی ہلاکتوں کی قیمت اسے ’’کئی گنا زیادہ‘‘ چکانا پڑے گی۔ گزشتہ ایک ہفتے کے دوران کم از کم تین امریکی اہلکار ہلاک ہو چکے ہیں۔

یمن میں ایران کے حمایت یافتہ حوثیوں نے سعودی عرب کے خلاف سمندری ناکہ بندی کا اعلان کرتے ہوئے دھمکی دی ہے کہ وہ عالمی توانائی کی فراہمی میں مزید رکاوٹ پیدا کریں گے۔

یو این آئی۔ ع ا۔

واشنگٹن قطر، مصر، پاکستان اور خطے کے دیگر ثالثوں نے امریکہ اور ایران کے سامنے دس دن کی جنگ بندی کی تجویز پیش کی ہے۔

ایکسیوس نے ذرائع کے حوالے سے یہ معلومات دی ہے۔

پیر کی رات موصول ہونے والی رپورٹ کے مطابق، امریکی صدر ڈونلڈ ٹرمپ کی انتظامیہ اس تجویز کا جائزہ لے رہی ہے اور اس نے اسرائیل سے ایسے اقدامات نہ اٹھانے کو کہا ہے جن سے سفارت کاری کی گنجائش ختم ہو جائے۔ تاہم، اس کے ساتھ ہی امریکہ بات چیت کی ناکامی کے خدشے کو مدنظر رکھتے ہوئے بھی تیاریاں کر رہا ہے۔

رپورٹ میں یہ بھی بتایا گیا ہے کہ اس دوران اسرائیلی فوج کو ہائی الرٹ پر رکھا گیا ہے اور وہ چند ہی دنوں میں جنگ کے ایک بڑے اور مربوط آپریشن میں تبدیل ہونے کے امکان کے لیے تیاری کر رہی ہے۔

رپورٹ کے مطابق جنگ بندی کی اس نئی تجویز میں لڑائی روکنے، آبنائے ہرمز سے جہازوں کی آمد و رفت دوبارہ شروع کرنے، اور امریکہ و ایران کو باہمی معاہدے کو بچانے کا موقع دینے کی بات شامل ہے۔

یواین آئی/اسپوتنک۔الف الف