واشنگٹن، امریکی صدر ڈونلڈ ٹرمپ نے اسرائیلی وزیراعظم کو آڑے ہاتھوں لے لیا اور کہا کہ وہ مجھے ایران جنگ میں پھنسائے رکھنا چاہتا ہے امریکی صدر ڈونلڈ ٹرمپ سے کل اسرائیلی وزیراعظم نیتن یاہو نے وائٹ ہاؤس میں ملاقات کی ہے اس اہم ملاقات سے قبل صدر ٹرمپ نے فاکس نیوز کو ٹیلیفونک انٹرویو میں نیتن یاہو پر الزامات عائد کیے۔

صدر ٹرمپ نے نیتن یاہو کو آڑے ہاتھوں لیتے ہوئے کہا کہ اسرائیلی وزیراعظم مجھے ایران جنگ میں پھنسائے رکھنا چاہتا ہے اور وہ چاہتا ہے کہ میں اس جنگ میں شامل رہوں۔انہوں نے کہا کہ نیتن یاہو کو اگر ایران کی جوہری سرگرمیوں سے متعلق معلومات ہیں، تو وہ مجھے نہیں دنیا کو بتائے۔ مجھے اس کی معلومات کی ضرورت نہیں۔

انٹرویو میں امریکی صدر یہ بھی کہا کہ ایران کے معاملے پر ہمارا مؤقف انتہائی سخت ہے، اس کی توانائی تنصیبات پر حملہ نہیں کرنا چاہتا۔انہوں نے کہا کہ اب ایران کو معاہدوں کی خلاف ورزی نہیں کرنے دیں گے، اگر معاہدہ نہ ہوا تو ایران میں مشن مکمل کریں گے۔

امریکی صدر نے مزید کہا کہ آبنائے ہرمز پر ہمارا مکمل کنٹرول ہے، ایران کی جانب جانے والا ایک بھی جہاز امریکی ناکہ بندی عبور نہیں کر سکتا۔

ڈونلڈ ٹرمپ نے الزام عائد کیا کہ ایران نے معاہدے کی خلاف ورزی کی، معاہدے کی خلاف ورزی پر ایران کی ناکہ بندی دوبارہ نافذ کی۔

مذاکرات کے حوالے سے امریکی صدر نے بتایا کہ مذاکرات صرف جوہری پروگرام پر ہو رہے ہیں، ایران بار بار اپنے مؤقف سے پیچھے ہٹ جاتا ہے۔

یو این آئی۔ ع ا

سرینگر، پیپلز ڈیموکریٹک پارٹی (پی ڈی پی) کی صدر محبوبہ مفتی نے بدھ کے روز لینڈ سلائیڈنگ اور خراب موسم کی وجہ سے سرینگر-جموں قومی شاہراہ پر بار بار پیدا ہونے والی رکاوٹوں کے پیشِ نظر، کشمیر کی باغبانی کی پیداوار کو بروقت باہر نکالنے کو یقینی بنانے کے لیے فوری اور ہنگامی ٹرانسپورٹ اقدامات کا مطالبہ کیا ہے۔

پھل پیدا کرنے والوں میں بڑھتی ہوئی تشویش پر گہرے دکھ کا اظہار کرتے ہوئے محبوبہ مفتی نے کہا کہ سڑکوں کی طویل بندش کی وجہ سے جلد خراب ہونے والی پیداوار، خاص طور پر سیب کی کوالٹی اور مارکیٹ میں مسابقت کو شدید خطرہ لاحق ہو گیا ہے، وہ بھی ایسے وقت میں جب مارکیٹنگ کا سیزن عروج پر ہے۔

انہوں نے کہا کہ “فصل کی کٹائی کا ہر سیزن ہمارے باغبانوں کے لیے ایک سال کے صبر، سرمایہ کاری اور امید کی عکاسی کرتا ہے۔ آج بہت سے باغبان تشویش کے ساتھ دیکھ رہے ہیں کہ ان کی پیداوار سے لادے ہوئے ٹرک پھنسے ہوئے ہیں کیوں کہ وادی کا سڑکوں کا رابطہ بری طرح متاثر ہوا ہے۔ انتظامیہ کو یہ سمجھنا چاہیے کہ یہ محض ٹریفک مینجمنٹ کا مسئلہ نہیں بلکہ ایک معاشی ایمرجنسی ہے۔”

محبوبہ مفتی نے پھلوں سے لادے ٹرکوں کی آمد و رفت کو آسان بنانے کے لیے فوری اقدامات کا مطالبہ کیا اور کہا کہ جب بھی سڑک کے حالات اجازت دیں، مناسب تجارتی گاڑیوں کے لیے مغل روڈ سمیت تمام محفوظ متبادل راستوں پر فعال طور پر غور کیا جانا چاہیے۔

دریں اثنا، پی ڈی پی نے ایک بیان میں کہا کہ کشمیر کی پھلوں کی صنعت لاکھوں لوگوں بشمول باغ کے مالکان، مزدوروں، ٹرانسپورٹرز، کمیشن ایجنٹوں اور پیکیجنگ ورکرز کے روزگار کا ذریعہ ہے۔ پارٹی نے خبردار کیا کہ سپلائی چین میں طویل رکاوٹ بڑے مالی نقصانات کا سبب بن سکتی ہے اور اس سے دیہی معیشت بری طرح متاثر ہو سکتی ہے۔

پارٹی نے انتظامیہ پر زور دیا کہ وہ باغبانی کی پیداوار کو نکالنے کے لیے ایک وقف آپریشنل فریم ورک قائم کرے، جس میں ٹریفک مینجمنٹ ایجنسیاں، سول انتظامیہ اور ٹرانسپورٹ حکام شامل ہوں۔ انہوں نے کہا کہ خراب ہونے والے پھلوں کو لے جانے والی تجارتی گاڑیوں کو حالات سازگار ہوتے ہی منظم اور بلاتعطل راستہ دیا جانا چاہیے۔

پی ڈی پی نے اس بات پر بھی زور دیا کہ ڈیزاسٹر مینجمنٹ کو صرف سڑکوں کے رابطے کی بحالی تک محدود نہیں ہونا چاہیے، بلکہ اس میں ان روزگار کے ذرائع کے تحفظ کے اقدامات بھی شامل ہونے چاہئیں جنہیں اس رکاوٹ سے خطرہ لاحق ہے۔ انہوں نے حکام سے اپیل کی کہ وہ کشمیر کے پھل پیدا کرنے والوں کو ہونے والے ممکنہ نقصانات سے بچانے کے لیے تیزی سے کام کریں۔

یو این آئی۔ م ع

واشنگٹن/ریاض، امریکہ اور سعودی عرب نے عراق میں ایرانی پراکیسز کے ٹھکانوں پر حملے کیے ہیں، امریکی سینٹرل کمانڈ اور سعودی وزارت دفاع نے حملوں کی تصدیق کر دی۔

امریکی سینٹرل کمانڈ کا کہنا ہے کہ حملے ایران سے وابستہ دہشت گرد گروہوں کے خلاف کیے گئے ہیں، عراق میں دہشت گرد گروہوں کو پاسداران نے ہدایت دی تھی، جس پر گزشتہ 72 گھنٹوں میں عراق سے 30 سے زائد ڈرون حملے کیے گئے تھے۔

سینٹ کام نے کہا یہ گروہ امریکی فورسز اور سعودی توانائی ڈھانچے پر حملوں کی تیاری کر رہے تھے، مشترکہ حملے میں عراق بھر میں دہشت گردوں کے لاجسٹکس اور ہتھیاروں کے ٹھکانوں کو نشانہ بنایا گیا۔

ترجمان سعودی وزارت دفاع نے کہا کہ سعودی مسلح افواج نے امریکی سینٹرل کمانڈ کے ساتھ مل کرعراق میں کارروائی کی ہے، کیوں کہ عراق سے ایرانی حامی دہشت گرد گروہوں نے سعودی پیٹرولیم تنصیبات پر حملے کی کوشش کی تھی۔

میجر جنرل ترکی المالکی نے کہا یہ کارروائی مملکت کے دفاع اور تحفظ کے جائز حق کی توثیق کرتی ہے، ہم کشیدگی میں اضافے کی خواہاں نہیں لیکن جارحیت کا بھرپور جواب دیں گے۔

سعودی عرب کی وزارتِ خارجہ کا کہنا ہے کہ عراق میں ’’مخصوص اہداف‘‘ پر امریکا اور سعودی عرب کے حملے ’’بین الاقوامی قانون کے تحت حاصل حقِ دفاعِ ذات‘‘ کی بنیاد پر کیے گئے۔

سرکاری خبر رساں ایجنسی ایس پی اے کے ذریعے جاری کیے گئے ایک بیان میں وزارت نے کہا کہ یہ حملے ایران کی حمایت یافتہ عراقی ملیشیاؤں کی جانب سے ڈرون حملوں کے جواب میں کیے گئے، جن کا نشانہ مملکت کی تیل کی تنصیبات تھیں۔

یو این آئی۔ ع ا۔