نئی دہلی، الیکشن کمیشن نے جمعہ کو کانگریس صدر ملک ارجن کھڑگے کے 6 مئی کو لکھے گئے خط میں جاری لوک سبھا انتخابات میں ووٹنگ کے اعداد و شمار میں تضاد کے بارے میں اٹھائے گئے سوالات کو مسترد کرتے ہوئے انہیں الزامات اور اعتراضات قرار دیا۔
مسٹر کھڑگے کو بھیجے گئے تفصیلی جواب میں کمیشن نے یہ بھی کہا ہے کہ سوشل میڈیا پر جاری خط میں متعلقہ معاملے پر سوال پوچھنے کی آڑ میں انہوں نے ایسا بیان دیا جو عوامی حقائق کے تناظر میں غلط ہے۔
کمیشن نے مسٹر کھڑگے کو لکھا ہے کہ سب کے سامنے ہونے والے انتخابات کے بارے میں ان کا بیان ناگوار ہے۔ لہذا، ‘انتخابی عمل کی شفافیت کو برقرار رکھنے کے لیے، کمیشن آپ کے اعتراضات اور الزامات کو صاف طور پر مسترد کرتا ہے اور آپ کو مشورہ دیتا ہے کہ ایسے بیانات دینے سے گریز کریں۔
مسٹر کھڑگے نے 6 تاریخ کو کمیشن کو لکھے گئے خط میں چھ سوالات اٹھائے تھے اور اس خط کو سوشل میڈیا پلیٹ فارم ایکس پر ڈال دیا تھا۔ کمیشن نے کہا کہ خط میں لکھا گیا ہے کہ ‘تاریخ میں پہلی بار’ ووٹنگ کے حتمی فیصد کے اعداد و شمار جاری کرنے میں تاخیر ہوئی ہے اور مختلف میڈیا رپورٹس کا حوالہ دیتے ہوئے کہا گیا ہے کہ ‘اس سے کمیشن کے کام کرنے کے طریقہ پر سنگین خدشات پیدا ہوتے ہیں۔
کمیشن نے کانگریس صدر سے کہا کہ آپ نے کہا ہے کہ کمیشن نے ووٹنگ کے اعداد و شمار جاری کرنے میں ‘انتہائی تاخیر’ کی ہے اور ابتدائی اعداد و شمار کے مقابلے حتمی اعداد و شمار میں ‘زیادہ اضافہ’ ہے جس سے ای وی ایم کے بارے میں کچھ سوالات بھی اٹھتے ہیں۔
کمیشن نے کہا ہے کہ ‘اے اے پی نے اعداد و شمار جاری کرنے کے وقت اور اس میں اضافے کو ان حلقوں سے جوڑا ہے جہاں برسراقتدار پارٹی نے 2019 میں اچھی کارکردگی نہیں دکھائی تھی۔ آپ نے الزام لگایا ہے کہ یہ تمام چیزیں انتخابی نتائج کو متاثر کرنے کی کوشش ہیں۔
کمیشن نے مسٹر کھڑگے کو لکھا ہے کہ انہوں نے تصدیق شدہ حقائق اور سپریم کورٹ کے واضح فیصلوں کے باوجود اپنے خط میں جانبدارانہ کہانی پیش کرنے کی کوشش کی ہے۔
کمیشن نے کہا ہے کہ ووٹر لسٹ کی تیاری کے عمل کے ہر مرحلے میں سیاسی پارٹیاں بھی شامل ہوتی ہیں، اس لیے وہ ہر ووٹنگ سینٹر اور ہر حلقے میں ووٹرز کی تعداد جانتے ہیں۔ انہیں مرکز وار ووٹر لسٹ فراہم کی جاتی ہے۔
اسی طرح ووٹ ڈالنے والے لوگوں کی تعداد فارم 17C کے ریکارڈ سے مختلف نہیں ہو سکتی۔ ووٹنگ ختم ہوتے ہی یہ ریکارڈ امیدواروں کو دستیاب کرا دیا جاتا ہے۔
کمیشن نے یہ بھی کہا ہے کہ گنتی کے دن ای وی ایم ووٹوں کا فارم 17 سی میں ڈیٹا سے ملایا جاتا ہے۔
کمیشن نے کہا ہے کہ اسے کوئی شکایت موصول نہیں ہوئی ہے کہ ووٹر لسٹ یا فارم 17C کا ڈیٹا کسی امیدوار کے ایجنٹ کو فراہم نہیں کیا گیا ہے۔ ووٹنگ کے اعداد و شمار اور کمیشن کے ذریعہ شائع کردہ ووٹنگ کے اعداد و شمار کے بارے میں بھی کوئی شکایت نہیں ہے۔
مسٹر کھڑگے کو بھیجے گئے خط میں کمیشن نے 2019 کے عام انتخابات کے دوران ووٹنگ کے حتمی اعداد و شمار شائع کرنے میں لگے وقت کی تفصیلات بھی دی ہیں۔
مثال کے طور پر 11 اپریل 2019 کو ہونے والی پولنگ کا اپ ڈیٹ 18 اپریل (سات دن بعد) کو جاری کیا گیا تھا جس میں ووٹ کا فیصد 69.4 فیصد تھا اور 6 مئی کو 69.61 فیصد کیا گیا تھا۔
یو این آئی۔ م ع۔ 1955
