ویلنگٹن، نیوزی لینڈ نے امریکہ اور ویسٹ انڈیز میں ہونے والے ٹی -20 ورلڈ کپ کے لیے کین ولیمسن کی قیادت میں 15 رکنی ٹیم کا اعلان کیا ہے۔
انگوٹھے کی انجری کے باعث انڈین پریمیئر لیگ (آئی پی ایل) سے باہر ہونے والے اوپنر ڈیون کونوے اور فاسٹ بولر ٹریٹ بولڈ کی ٹیم میں واپسی ہوئی ہے۔ ٹم ساؤتھی کو بھی ٹیم میں جگہ دی گئی ہے۔ بین سیئرز کو واحد سفری ریزرو بنایا گیا ہے۔
نیوزی لینڈ کی ٹیم میں تجربہ کار کھلاڑیوں کو ترجیح دی گئی ہے۔ 15 رکنی اسکواڈ میں صرف راچن رویندرا اور میٹ ہنری ہی ایسی رکن ہیں جو پہلی بار ٹی ٹوئنٹی ورلڈ کپ میں حصہ لے رہے ہیں۔ انجری کے باعث تیزگیندباز ایڈم ملنے اور کائل جیمیسن سلیکشن کے لیے دستیاب نہیں تھے۔ فن ایلن کمر کی چوٹ سے صحت یاب ہو چکے ہیں اوروہ کونوے کے ساتھ اوپننگ بلے باز کے کردار میں نظر آئیں گے۔ پاکستان کے دورے پر جانے والی ٹیم میں سے صرف مائیکل بریسویل، مارک چیپ مین، جیمز نیشم اور ایش سوڈھی کو ہی اس ورلڈ کپ ٹیم میں جگہ ملی ہے۔
نیوزی لینڈ کے کوچ گیری اسٹیڈ کے مطابق یہ ایک متوازن ٹیم ہے۔ انہوں نے کہا کہ ہم ویسٹ انڈیز کی مختلف پچوں پر مختلف حالات کی توقع کر رہے ہیں اور مجھے لگتا ہے کہ ہم نے جس ٹیم کو منتخب کیا ہے وہ ان مختلف حالات سے ہم آہنگ ہونے کی صلاحیت رکھتی ہے۔
نیوزی لینڈ ٹیم: کین ولیمسن (کپتان)، فن ایلن، ٹرینٹ بولٹ، مائیکل بریسویل، مارک چیپ مین، ڈیون کونوے، لوکی فرگوسن، میٹ ہنری، ڈیرل مچل، جیمز نیشم، گلین فلپس، راچن رویندرا، مچل سینٹنر، ایش سوڈھی، ٹم ساؤتھی اور بین سیئرز (ریزرو)
یواین آئی۔الف الف
