تہران، ایرانی رہنما ابراہیم عزیزی نے کہا ہے کہ آبنائے ہرمز کے لیے ایک قانونی بل تیار کر لیا گیا ہے۔

غیر ملکی خبر رساں ادارے کے مطابق ایرانی مجلس کے قومی سلامتی کمیشن کے سربراہ ابراہیم عزیزی نے کہا ہے کہ ایرانی مجلس کی سرگرمیاں بحال ہوتے ہی یہ بل اوپن سیشن میں فوری منظور کرلیا جائے گا۔

ابراہیم عزیزی نے مزید کہا کہ ایرانی شورائے نگہبان کی منظوری کے بعد یہ بل قانون بن جائے گا۔

یو این آئی۔ ع ا۔

بیروت، اسرائیلی فوج کے لبنان پر جاری حملوں کے نتیجے میں ایک ریسکیو اہلکار سمیت 31 افراد شہید ہوگئے ۔

غیر ملکی ذرائع ابلاغ کے مطابق اسرائیلی حملوں میں جنوبی لبنان میں کم از کم 31 افراد شہید ہو گئے جن میں ایک ریسکیو اہلکار بھی شامل ہے۔ رپورٹس کے مطابق اسرائیلی افواج اور حزب اللہ کے درمیان 2 مارچ کو دوبارہ جھڑپیں شروع ہو نے کے بعد یہ سب سے خونریز دنوں میں سے ایک دن قرار دیا جا رہا ہے ۔

ضلع صور کے علاقے طورا میں ہو نے والے دو فضائی حملوں میں 5 افراد شہید ہوئے جبکہ ملبے تلے دبی ایک بچی کی تلاش کے لیے ریسکیو آپریشن تاحال جاری ہے ۔

اس کے علاوہ اسرائیلی ڈرون حملے میں سڑک پر ایک گاڑی کو نشا نہ بنایا گیا، جس کے نتیجے میں سول ڈیفنس کا ایک اہلکار شہید ہوگیا ۔ مختلف دیہات پر اسرائیلی فضائی حملوں میں مزید 5 افراد جام شہادت نوش کرگئے، جبکہ ایک اورحملے میں 4 افراد شہید ہوئے ۔ لبنان اور اسرائیل کے درمیان 17 اپریل کو جنگ بندی کا اعلان کیا گیا تھا، جس میں بعد ازاں 17 مئی تک توسیع کی گئی، تاہم اس کے باوجود اسرائیلی فوج جنوبی لبنان میں روزا نہ کی بنیاد پر حملے جاری رکھے ہوئے ہے ۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے ایران کو متنبہ کیا ہے کہ اگر وہ معاہدہ نہیں کرتا تو آبنائے ہرمز میں پراجیکٹ فریڈم کے نام سے دوبارہ کارروائی کا آغاز کر دیا جائے گا۔

امریکی صدر ڈونلڈ ٹرمپ نے میڈیا سے گفتگو کرتے ہوئے کہا ہے کہ پاکستانی دوستوں کے کہنے پر پراجیکٹ فریڈم کو روکنا پڑا، انھوں نے کہا وزیر اعظم شہباز شریف اور فیلڈ مارشل عاصم منیر کے کہنے پر اسے روکا۔ انھوں نے کہا اگر ایران ڈیلیور نہیں کرتا تو پراجیکٹ دوبارہ شروع کریں گے لیکن یہ پراجیکٹ فریڈم پلس ہوگا، اور اس کےعلاوہ دیگر چیزوں پر بھی غور کر سکتے ہیں، جس میں مزید سخت اقدامات کیےجائیں گے۔

انھوں نے کہا آگے دیکھتے ہیں کہ ایران سے متعلق کیا ہوتا ہے، اس کی فوج تو ختم ہو چکی ہے، دیکھتے ہیں وہ کیا کرتا ہے، تاہم اس کے ساتھ معاملات بہت اچھی طرح سے آگے بڑھ رہے ہیں۔ اس دوران انھوں نے کہا ایران کے اندر میناب اسکول حملے سے متعلق تحقیقات جاری ہیں، جب یہ تحقیقات مکمل ہوں گی تو رپورٹ جاری کر دی جائے گی۔

دریں اثنا، امریکی صدرٹرمپ کی سی این این سے گفتگو کرتے ہوئے کہا کہ ’’ہمیں آج رات ایران سے جواب موصول ہو سکتا ہے، امریکی پیشکش پر آج ایران سے جواب مل سکتا ہے۔‘‘

یو این آئی۔ ع ا۔