نئی دہلی، ہندوستان کے چیف جسٹس جسٹس سوریہ کانت کی ایک حالیہ سماعت کے دوران کیا گیا تبصرہ ان دنوں شدید بحث کا موضوع بنا ہوا ہے۔

ایک وکیل کی عرضی پر سماعت کے دوران انہوں نے بے روزگار نوجوانوں کو کاکروچ سے تشبیہ دی تھی۔

بعد میں انہوں نے وضاحت کرتے ہوئے کہا کہ ان کی تنقید صرف فرضی ڈگری رکھنے والوں کیلئے تھی اور انہیں نوجوانوں پر فخر ہے۔

تاہم ان کے ’’کاکروچ‘‘ والے بیان اور اس وضاحت کے درمیان ایک ایسا واقعہ پیش آیا، جو اس وقت پورے ملک میں وائرل رجحان بن چکا ہے۔

یہ رجحان ’’کاکروچ جنتا پارٹی‘‘ کا ہے، جس پر نہ صرف سوشل میڈیا میں بحث جاری ہے بلکہ مہوا موئترا، منیش سسودیا اور اکھلیش یادو جیسے سیاسی رہنما بھی اس پر تبصرہ کر چکے ہیں۔

15 مئی کو چیف جسٹس کے بیان کے بعد وجود میں آنے والی اس پارٹی نے 21 مئی تک انسٹاگرام پر فالوورز کے معاملے میں بھارتیہ جنتا پارٹی کو بھی پیچھے چھوڑ دیا ہے۔

اس وقت کاکروچ جنتا پارٹی کے انسٹاگرام صفحے پر ایک کروڑ 35 لاکھ فالوورز موجود ہیں، جو ملک کی دونوں بڑی سیاسی جماعتوں سے زیادہ ہیں۔

بھارتیہ جنتا پارٹی کے 88 لاکھ سے زیادہ جبکہ کانگریس کے ایک کروڑ 33 لاکھ فالوورز ہیں۔

کاکروچ جنتا پارٹی کو ایک طنزیہ سیاسی تحریک قرار دیا جا رہا ہے۔

چیف جسٹس سوریہ کانت کے 15 مئی کے بیان کے بعد 16 مئی 2026 کو انٹرنیٹ پر طنزیہ انداز میں شروع ہونے والی یہ تحریک چند ہی دنوں میں ملک کے نوجوانوں، خاص طور پر جین زی نسل کے درمیان مقبول ہو گئی۔

پارٹی کا نام بھی چیف جسٹس سوریہ کانت کے اسی بیان سے متاثر ہے، جس میں انہوں نے بے روزگار اور سوشل میڈیا پر اپنی رائے رکھنے والے نوجوانوں کا موازنہ کاکروچ سے کیا تھا۔

اگرچہ چیف جسٹس نے بعد میں واضح کیا کہ ان کا اشارہ فرضی ڈگری رکھنے والوں کی طرف تھا، لیکن سوشل میڈیا پر کئی حلقوں نے اس لفظ کو سیاسی شناخت کے طور پر اختیار کرنا شروع کر دیا۔

یہ پارٹی خود کو سست اور بے روزگار نوجوانوں کی آواز قرار دیتی ہے۔

یواین آئی۔ م س

نئی دہلی، ریلوے نے مسافروں سے محتاط رہنے اور کسی بھی مشکوک سرگرمیوں یا اس میں ملوث افراد کے بارے میں معلومات ہیلپ لائن نمبر 139 پر دینے کی اپیل کی ہے ریلوے کے وزیر اشونی ویشنو نے جمعرات کو یہاں حال ہی میں پیش آئے واقعات کے تعلق سے افسران کے ساتھ مسافروں اور ریلوے املاک کی سکیورٹی کے لیے اٹھائے جا رہے اقدامات کے حوالے سے ایک اعلیٰ سطحی سکیورٹی جائزہ میٹنگ کی۔ اس دوران ایسے واقعات کو روکنے کے لیے ایک بہتر رپورٹنگ سسٹم کے ذریعے زمینی سطح سے انٹیلی جنس معلومات جمع کرنے کے نظام کو مزید مستحکم کرنے کا فیصلہ کیا گیا۔ اس کے علاوہ ٹیکنالوجی پر مبنی سکیورٹی سسٹم کو اپ گریڈ کرنے، پورے ریل نیٹ ورک میں سی سی ٹی وی کوریج کو وسعت دینے اور ریلوے بورڈ ہیڈکوارٹر نیز مختلف علاقائی ڈویژنوں کے درمیان آپریشنل سکیورٹی کوآرڈینیشن کو بہتر بنانے پر بھی خصوصی زور دیا گیا۔ میٹنگ میں سائبر سکیورٹی کو مضبوط کرنے، کیمروں کی خصوصیات کو اپ گریڈ کرنے اور مصنوعی ذہانت پر مبنی نگرانی کا نظام لگانے پر بھی زور دیا گیا۔ اس کے علاوہ ریلوے نیٹ ورک پر زیادہ موثر سکیورٹی مینجمنٹ کے لیے آر پی ایف اور گورنمنٹ ریلوے پولیس (جی آر پی) کے درمیان معلومات کے تبادلے کے طریقوں کو بہتر بنا کر تال میل کو مضبوط کرنے پر بھی خاص توجہ دی گئی۔

میٹنگ کے دوران افسران نے مسٹر ویشنو کو بتایا کہ ریلوے ٹرینوں، مسافروں، اسٹیشن کے احاطے اور اپنے وسیع ریل نیٹ ورک کی سکیورٹی کو مضبوط کرنے کے لیے آرٹیفیشل انٹیلیجنس (اے آئی)، ڈرون اور سی سی ٹی وی جیسے جدید ترین تکنیکی آلات کا بڑے پیمانے پر استعمال کر رہا ہے۔ یہ کام ‘مشن موڈ’ میں کیا جا رہا ہے اور اس کے تحت ریلوے پروٹیکشن فورس (آر پی ایف) کے بیٹ سطح پر انٹیلی جنس معلومات جمع کرنے کے نظام کو مضبوط کیا جا رہا ہے۔ اس میٹنگ میں مسٹر ویشنو کے علاوہ وزیر مملکت برائے ریل وی سومنا اور رونیت سنگھ بٹو کے ساتھ ساتھ ریلوے بورڈ کے چیئرمین ستیش کمار اور ملک بھر سے آئے علاقائی حکام شامل ہوئے۔

میٹنگ کے دوران افسران نے بتایا کہ گزشتہ چند دنوں میں پیش آنے والے واقعات (جن میں آگ لگنے کے کچھ حالیہ واقعات بھی شامل ہیں) کی ابتدائی جانچ میں سماج دشمن عناصر کے ملوث ہونے کے اشارے ملے ہیں۔ ہندوستانی ریلوے نے ان واقعات کو سنجیدگی سے لیا ہے اور آر پی ایف ان کی جانچ کر رہا ہے۔ کئی معاملات میں، ریلوے کی جانب سے کی گئی فوری اور فعال کارروائی کی بدولت بڑے حادثات کو ٹالنے میں کامیابی ملی ہے۔

ریلوے نے جمعرات کو جاری کردہ ریلیز میں کہا ہے کہ میٹنگ میں ایسے واقعات کو روکنے کے لیے انٹیلی جنس سسٹم کو مضبوط کرنے اور معلومات پر تیزی سے کارروائی کرنے کے لیے ٹیکنالوجی کا استعمال کرنے کے علاوہ مسافروں کو بھی اس بات کے لیے مزید ترغیب دی جائے گی کہ وہ اپنے سفر کے دوران اور اسٹیشن کے احاطے میں انتظار کرتے وقت سماج دشمن سرگرمیوں پر روک لگانے کی کوششوں میں سرگرمی سے تعاون کریں۔ ریلوے نے مسافروں سے گزارش کی ہے کہ وہ سفر کے دوران چوکس اور محتا رہیں۔ ریلوے کے احاطے میں کسی بھی مشکوک سرگرمی یا مشکوک شخص کے نظر آنے پر اس کی اطلاع فوری طور پر ریلوے ہیلپ لائن نمبر 139 پر دیں۔

یواین آئی۔ایف اے

نئی دہلی، وزیر اعظم نریندرمودی نے جمعرات کو سابق وزیر اعظم راجیو گاندھی کی برسی کے موقع پر انہیں خراج عقیدت پیش کیا وزیر اعظم نے آج ایکس پر اپنی پوسٹ میں کہا، ’’سابق وزیر اعظم شری راجیو گاندھی جی کو ان کی برسی پر خراج عقیدت  مسٹر راجیو گاندھی 1984 سے 1989 تک ملک کے وزیر اعظم رہے 21 مئی 1991 کو تمل ناڈو کے سری پیرمبدور میں ایک انتخابی مہم کے دوران لبریشن ٹائیگرز آف تمل ایلم (لٹے) کے ایک خودکش حملے میں ان کی موت ہوگئی تھی۔

اس موقع پر مختلف سیاسی جماعتوں کے رہنماؤں نے بھی راجیو گاندھی کو یاد کیا اور ملک کی ترقی اور جمہوری اداروں میں ان کی خدمات کو خراج عقیدت پیش کیا۔

یواین آئی۔الف الف