سرینگر، جموں و کشمیر کے اینٹی کرپشن بیورو نے سرینگر کے جاوورا گارڈن میں ترقیاتی کاموں کی انجام دہی میں مبینہ بدعنوانی، مالی بے ضابطگیوں اور سرکاری عہدے کے ناجائز استعمال کے الزامات کے تحت کشمیر کے اس وقت کے ہورٹیکلچر (باغبانی) ڈائریکٹر، مختلف کمیٹیوں کے ارکان اور ایک نجی ٹھیکیدار کے خلاف مقدمہ درج کر لیا ہے۔

یہ کارروائی سرینگر کے جاوورا گارڈن میں محکمہ باغبانی کی جانب سے کرائے گئے ترقیاتی کاموں میں بدعنوانی، طریقہ کار کی خلاف ورزیوں اور اختیارات کے ناجائز استعمال کے الزامات پر کی جانے والی ‘مشترکہ اچانک جانچ’ کی رپورٹ سامنے آنے کے بعد کی گئی ہے۔ایس بی کے ترجمان نے تفصیلات بتاتے ہوئے کہا کہ سرینگر کے جاوورا گارڈن میں ‘سینٹر آف ایکسی لینس’ کی تعمیر و ترقی سے جڑے الزامات کی تحقیقات کے لیے اے سی بی پولیس اسٹیشن سرینگر نے یہ اچانک جانچ شروع کی تھی۔ اس تفتیش میں منصوبے کے تحت کیے گئے کاموں کے ٹینڈر اور ان پر عمل درآمد میں سنگین بے ضابطگیوں کے ٹھوس ابتدائی شواہد ملے ہیں۔

تفتیش کے دوران یہ بات سامنے آئی ہے کہ ٹینڈر کے نوٹس کو مبینہ طور پر اس انداز میں تیار کیا گیا تھا جس میں مخصوص کوالٹی کے معیار اور تکنیکی باریکیوں کو واضح نہیں کیا گیا تھا، تاکہ من مانے فیصلے کرنے کی گنجائش پیدا کی جا سکے۔

اے سی بی نے بتایا کہ ٹینڈر میں شامل مالیاتی دفعات، منظور شدہ تفصیلی پروجیکٹ رپورٹ کے طے شدہ فنڈز کے مقابلے میں کافی زیادہ تھیں۔

تحقیقات سے یہ بھی انکشاف ہوا ہے کہ فنانشل ٹرن اوور سے متعلق اہلیت کے معیار کو، اصل ضرورت بہت کم ہونے کے باوجود، جان بوجھ کر غیر معمولی طور پر بلند سطح پر طے کیا گیا تھا۔ الزام ہے کہ اس پابند شرط کا مقصد شفاف مقابلے کو ختم کرنا اور ایک مخصوص بولی دہندہ کو فائدہ پہنچانا تھا۔

مشترکہ اچانک جانچ کے نتائج سے پہلی نظر میں سرکاری ملازمین اور فائدہ اٹھانے والی نجی فرم کے درمیان مجرمانہ گٹھ جوڑ، سرکاری عہدے کے ناجائز استعمال اور مجرمانہ سازش کا اشارہ ملتا ہے، جس کے نتیجے میں ٹھیکیدار کو ناجائز مالی فائدہ پہنچایا گیا اور سرکاری خزانے کو بھاری نقصان اٹھانا پڑا۔

یواین آئی ۔م اع

سرینگر، امرناتھ یاترا کے دوران سیاحوں اور یاتریوں کی حفاظت اور سیکیورٹی کو مزید مؤثر بنانے کے لیے ضلع اننت ناگ کی جموں و کشمیر پولیس نے “پہچان ایپ” کے نام سے ایک نئی کیو آر کوڈ پر مبنی موبائل ایپلی کیشن متعارف کرائی ہے۔

پولیس کے مطابق اس ایپ کا مقصد یاترا کے راستوں اور اہم سیاحتی مقامات پر خدمات فراہم کرنے والے افراد کی رجسٹریشن اور تصدیق کو یقینی بنانا ہے۔

پولیس نے بتایا کہ یہ ایپ موقع پر ہی فوری تصدیق کی سہولت فراہم کرتی ہے اور ایک محفوظ نظام تشکیل دیتی ہے، جس کے ذریعے رجسٹرڈ اور تصدیق شدہ افراد کو غیر رجسٹرڈ افراد سے واضح طور پر الگ کیا جا سکتا ہے۔

پولیس کے مطابق “پہچان ایپ” کے اجراء کا بنیادی مقصد یاترا کے دوران مجموعی سیکیورٹی نظام کو مضبوط بنانا ہے تاکہ غیر تصدیق شدہ یا سماج دشمن عناصر کو سروس فراہم کنندگان کے بھیس میں داخل ہونے سے روکا جا سکے۔

بیان میں کہا گیا کہ تمام مجاز افراد کا ڈیجیٹل ریکارڈ تیار ہونے سے خدمات میں شفافیت اور جوابدہی بڑھے گی، جس سے یاتریوں اور سیاحوں کو بہتر اور محفوظ سہولیات فراہم کی جا سکیں گی۔

پولیس نے مزید کہا کہ یہ ایپ ہجوم کے بہتر انتظام میں بھی مددگار ثابت ہوگی، کیونکہ منظم اور ضابطہ بند خدمات کی فراہمی سے تنازعات، زائد وصولی (اوور چارجنگ) اور یاترا کے راستوں پر رش میں کمی آئے گی۔

پولیس کے ترجمان نے کہا کہ اس اقدام سے عوام میں مثبت اعتماد پیدا ہوگا۔

انہوں نے کہا کہ اس ایپ کے ذریعے یاتریوں، سیاحوں اور مقامی شہریوں کا اعتماد بڑھے گا کیونکہ انہیں یہ یقین ہوگا کہ وہ صرف تصدیق شدہ افراد سے ہی خدمات حاصل کر رہے ہیں۔

پولیس کے مطابق یہ ایپ حقیقی اور مستند سروس فراہم کنندگان کو ایک ڈیجیٹل شناخت اور باضابطہ منظوری فراہم کرتی ہے، جبکہ ساتھ ہی پولیس کی ایک فعال، جدید ٹیکنالوجی سے لیس اور عوام دوست فورس کے طور پر شبیہ کو بھی مضبوط بناتی ہے، جو محفوظ اور پریشانی سے پاک زیارت کو یقینی بنانے کے لیے پرعزم ہے۔

واضح رہے کہ سالانہ امرناتھ یاترا 3 جولائی سے شروع ہوگی اور 57 دن جاری رہنے کے بعد 28 اگست کو اختتام پذیر ہوگی۔

یواین آئی۔ ظ ا

سرینگر، “نشہ مُکت جموں و کشمیر ابھیان” کے تحت منشیات کے نیٹ ورکس کے خلاف اپنی مہم جاری رکھتے ہوئے سرینگر پولیس نے جمعہ کے روز مبینہ منشیات فروشوں کی چار کروڑ روپے سے زائد مالیت کی منقولہ اور غیر منقولہ جائیدادیں ضبط کر لیں۔

پولیس کے مطابق یہ کارروائیاں لال بازار اور خانیار پولیس تھانوں کی جانب سے این ڈی پی ایس ایکٹ کی دفعات کے تحت الگ الگ انجام دی گئیں۔

پولیس تھانہ لال بازار نے سکھ باغ، لال بازار کے رہائشی عادل احمد دھوبی کے دو منزلہ رہائشی مکان کو این ڈی پی ایس ایکٹ کی دفعہ 68-ایف کے تحت ضبط کیا۔ یہ کارروائی 2026 میں درج ایف آئی آر کے سلسلے میں کی گئی، جو این ڈی پی ایس ایکٹ کی دفعات 8/22 اور 29 کے تحت درج ہے۔

پولیس نے بتایا کہ کارروائی کے دوران ملزم سے منسلک ایک سوئفٹ ڈزائر گاڑی بھی ضبط کی گئی۔

ایک اور مقدمے میں، جو لال بازار تھانے میں 2025 میں این ڈی پی ایس ایکٹ کی دفعہ 8/20 کے تحت درج کیا گیا تھا، ہاکہ بازار کے رہائشی ارشد احمد شیخ کی سینٹرو گاڑی بھی دفعہ 68-ایف کے تحت ضبط کر لی گئی۔

دوسری جانب، پولیس تھانہ خانیار کے رہائشی اویس حسین میر کے دو منزلہ رہائشی مکان کو، جس کی مالیت تقریباً دو کروڑ روپے بتائی جاتی ہے، ضبط کر لیا۔ پولیس کے مطابق ملزم خانیار تھانے میں درج ایف آئی آر نمبر 12/2024 میں این ڈی پی ایس ایکٹ کی دفعات 8/20 اور 29 کے تحت مطلوب ہے۔

پولیس نے کہا کہ تحقیقات کے دوران یہ جائیداد منشیات کی اسمگلنگ سے حاصل ہونے والی غیر قانونی آمدنی سے خریدی گئی ثابت ہوئی، جس کے بعد تمام قانونی تقاضے پورے کرتے ہوئے این ڈی پی ایس ایکٹ کی دفعہ 68-ایف کے تحت اسے ضبط کر لیا گیا۔

پولیس کے مطابق ضبط شدہ جائیدادوں اور گاڑیوں کی مجموعی مالیت چار کروڑ روپے سے تجاوز کر گئی ہے، جو ضلع میں سرگرم منشیات کے نیٹ ورکس کے مالیاتی ڈھانچے کو توڑنے کی جانب ایک اہم قدم ہے۔

دریں اثنا، منشیات کی اسمگلنگ اور نشہ آور اشیا کے استعمال کے خلاف جاری مہم کے تحت، ضلع اننت ناگ پولیس نے پہلگام سب ڈویژن کے ماوورہ، رافٹنگ پوائنٹ اور یانر علاقوں میں واقع مختلف ہوٹلوں میں بڑے پیمانے پر منشیات سے متعلق چھاپے مارے۔

پولیس کے مطابق یہ کارروائی چھ پولیس ٹیموں نے ایس ڈی پی او پہلگام کی نگرانی میں انجام دی۔

قابلِ اعتماد اطلاعات کی بنیاد پر متعدد ہوٹلوں کی تلاشی لی گئی، جس کا مقصد سیاحتی رہائش گاہوں کو منشیات سے متعلق سرگرمیوں کے لیے استعمال ہونے سے روکنا اور منشیات کے نیٹ ورکس کے خلاف نگرانی کو مزید مضبوط بنانا تھا۔

یواین آئی ظ ا