کیف، نیٹو سربراہی اجلاس سے پہلے روس نے یوکرین پر بڑا فضائی حملہ کردیا ، جس کے نتیجے میں 11 افراد ہلاک ہوگئے۔

تفصیلات کے مطابق ترکیہ میں شیڈول نیٹو سربراہی اجلاس سے پہلے روس اور یوکرین کے درمیان جنگ میں اچانک شدت آگئی۔ روسی فوج نے یوکرینی دارالحکومت کیف پر اب تک کا ایک بہت بڑا فضائی حملہ کردیا، جس کے نتیجے میں کم از کم 11 افراد ہلاک اور درجنوں زخمی ہو گئے ہیں۔

‘الجزیرہ ٹی وی’ نے کیف کے فوجی سربراہ کے حوالے سے بتایا روسی فوج نے یوکرینی دارالحکومت کو نشانہ بنانے کے لیے 68 ہلاکت خیز میزائل اور 351 ڈرون داغے۔ یوکرینی حکام کا کہنا تھا کہ محض ایک ہفتے کے دوران دارالحکومت کیف پر روس کا یہ دوسرا بڑا اور تباہ کن حملہ ہے، جس کے بعد ریسکیو ٹیمیں امدادی کاموں میں مصروف ہیں، حملوں کے نتیجے میں اب تک 46 افراد کے شدید زخمی ہونے کی تصدیق ہو چکی ہے۔

یوکرینی صدر وولودیمیر زیلنسکی نے ترکیہ میں ہونے والے اہم نیٹو سربراہی اجلاس سے قبل ہی یہ خدشہ ظاہر کیا تھا کہ روس اس اہم سفارتی بیٹھک کو سبوتاژ کرنے یا دباؤ بڑھانے کے لیے یوکرین کو بڑے حملوں کا نشانہ بنا سکتا ہے، جو اب سچ ثابت ہو گیا ہے۔

دوسری جانب یوکرینی فوج نے بھی اس حملے کا بھرپور جواب دیتے ہوئے روس کے زیرِ کنٹرول جزیرہ نما کرائمیا میں روسی توانائی کے اہم انفراسٹرکچر کو ڈرون حملوں سے نشانہ بنایا ہے۔ . یوکرینی ڈرون حملے کے بعد روسی کنٹرول والے علاقے ‘سواستوپول’ میں بجلی کی فراہمی مکمل طور پر معطل ہو گئی ہے اور پورا علاقہ اندھیرے میں ڈوب گیا ہے۔ دفاعی ماہرین کے مطابق نیٹو اجلاس کے دوران دونوں ممالک کی جانب سے ان حملوں میں مزید شدت آنے کا امکان ہے۔

یو این آئی۔ ع ا۔

تل ابیب، اسرائیلی وزیرِ دفاع اسرائیل کاٹز نے دعویٰ کیا ہے کہ آیت اللّٰہ علی خامنہ ای کو مبینہ طور پر اسرائیل کو تباہ کرنے کے منصوبے کی قیادت کرنے پر اسرائیل نے قتل کیا۔

اسرائیلی میڈیا کے مطابق اس کے ساتھ ہی انہوں نے خبردار کیا کہ ہے کہ مستقبل میں جو بھی ایرانی رہنما ایسی کارروائیوں کو فروغ دینے کی کوشش کرے گا اسے بھی ختم کر دیا جائے گا۔

تہران میں جاری جلوسِ جنازہ کے ردِعمل میں بیان دیتے ہوئے انہوں نے کہا کہ اسرائیل ہر وقت اور ہر قسم کے خطرے کے خلاف اپنے دفاع کے لیے تیار ہے۔ اس سے قبل اسرائیل کاٹز نے یہ بھی کہا تھا کہ آیت اللّٰہ علی خامنہای کے بیٹے اور ممکنہ جانشین مجتبیٰ خامنہ ای نشانے پر ہیں، جس پر تہران کی جانب سے شدید احتجاج سامنے آیا تھا۔

مذکورہ بیان پر ایرانی وزیرِ خارجہ عباس عراقچی نے ردِعمل دیتے ہوئے کہا تھا کہ امریکی صدر ڈونلڈ ٹرمپ نے تل ابیب میں اپنے پٹھوؤں کو قابو میں رکھنے کا وعدہ کیا ہے۔ انہوں نے کہا تھا کہ اگر اسرائیل نے اپنے مالک کی بات نظر انداز کی تو ایران اسرائیل کو سبق سکھائے گا۔

یو این آئی۔ ع ا۔

تہران، ایرانی پارلیمانی اسپیکر اور اعلیٰ مذاکرات کار محمد باقر قالیباف نے کہا ہے کہ حال ہی میں دستخط ہونے والے مفاہمتی یادداشت کے باوجود ایران اور امریکہ کے درمیان گہرے اختلافات برقرار ہیں محمد باقر قالیباف نے حماس کی قیادت کونسل کے سربراہ محمد درویش سے تہران میں ملاقات کے دوران یہ بات کہی حماس کی قیادت کونسل کے سربراہ آیت اللّٰہ علی خامنہ ای کی نمازِ جنازہ کی تقریبات میں شرکت کے لیے ایران آئے تھے۔ اس موقع پر باقر قالیباف نے ایران اور امریکہ کے درمیان ہونے والے ایم او یو کے نفاذ کو مشکل لیکن ممکن قرار دیا اور کہا کہ ہمارا امریکہ کے ساتھ کوئی امن نہیں اور ہم اسرائیل کو تسلیم نہیں کریں گے۔

انہوں نے کہا کہ ایران، شہید رہبرِ اعلیٰ کی ہدایات کے تحت، مسلمانوں اور مزاحمتی محور کی حمایت جاری رکھے گا اور ضرورت پڑنے پر میزائلوں کے ذریعے اور سیاسی دباؤ کی صورت میں مذاکرات کے دباؤ کے ذریعے بھی کردار ادا کرے گا۔ ان کا کہنا ہے کہ ہم نے امریکی فریق کو بتایا کہ خطے کے ممالک کی علاقائی سالمیت اور ایران کے اتحادی مزاحمتی گروہوں کے خلاف جنگ کے خاتمے کو اس مفاہمتی یادداشت کا حصہ ہونا چاہیے اور اسے متن میں شامل کیا گیا۔

باقر قالیباف نے کہا کہ آج یہ مفاہمتی یادداشت نافذ ہو رہی ہے اور اس کا نفاذ مشکل ضرور ہے لیکن ممکن ہے۔ انہوں نے مسلم ممالک کے کردار پر زور دیتے ہوئے کہا کہ اب وہ اس نتیجے پر پہنچ چکے ہیں کہ امریکا اور اسرائیل کے ساتھ تعاون انہیں سلامتی فراہم نہیں کر سکتا۔

یو این آئی۔ ع ا۔