نئی دہلی، یوتھ کانگریس نے ‘چھاتروں کی گونج’ مہم کے تحت دہلی میں پیپر لیک احتجاجی مظاہرے کے دوران زخمی، پھنسے ہوئے یا کسی بھی طرح کی مدد کی ضرورت والے طلبہ کے لیے امدادی مہم شروع کی ہے انڈین یوتھ کانگریس کے قومی صدر ادے بھانو چب نے کہا کہ دہلی میں موجود ایسے طلبہ جنہیں رہنے کی جگہ، کھانا، طبی امداد یا قانونی مدد کی ضرورت ہے، وہ ہیلپ لائن نمبر 8826970690، 9211452848 اور 9827048238 پر رابطہ کر سکتے ہیں۔ اس کے علاوہ طلبہ سوشل میڈیا پلیٹ فارم پر بھی مدد مانگ سکتے ہیں۔ مسٹر چب نے کہا، “پیپر لیک کے خلاف اپنی آواز اٹھانے والے طلبہ پر لاٹھی چارج اور آنسو گیس کا استعمال جمہوریت پر سنگین سوال کھڑے کرتا ہے۔ یوتھ کانگریس دہلی میں کسی بھی طرح کی پریشانی کا سامنا کر رہے یا مدد کی ضرورت والے ہر ایک طالب علم کے ساتھ کھڑی ہے۔ چاہے رہنے کا انتظام ہو، کھانا، میڈیکل امداد یا قانونی مدد، انڈین یوتھ کانگریس ہر ممکن تعاون دینے کے لیے تیار ہے۔ کوئی بھی طالب علم بغیر کسی جھجھک کے ہم سے رابطہ کر سکتا ہے۔”

انہوں نے کہا کہ تنظیم کا مقصد یہ یقینی بنانا ہے کہ احتجاجی مظاہرے کے دوران کسی بھی طالب علم کو اکیلا نہ چھوڑا جائے اور ضرورت پڑنے پر اسے فوری امداد فراہم کرائی جائے۔

یو این آئی۔ ایف اے

نئی دہلی، دہلی ہائی کورٹ نے منگل کو سماجی کارکن سونم وانگچک کو صفدر جنگ اسپتال سے میدانتا اسپتال منتقل کرنے کی اجازت دے دی عدالت نے تبصرہ کیا کہ سرکاری اور نجی دونوں شعبوں کے ڈاکٹروں کا ماننا ہے کہ ان کی جاری بھوک ہڑتال کی وجہ سے انہیں مسلسل طبی نگرانی کی ضرورت ہے۔ چیف جسٹس ڈی کے اپادھیائے اور جسٹس تیجس کاریا کی بنچ نے مسٹر وانگچک کی اہلیہ ڈاکٹر گیتانجلی انگمو کی طرف سے دائر ایک اپیل پر سماعت کرتے ہوئے یہ اجازت فراہم کی۔

ڈاکٹر انگمو نے سنگل بنچ کے اس فیصلے کو چیلنج کیا تھا، جس میں انہیں نجی اسپتال میں منتقل کرنے کی اجازت دینے سے انکار کر دیا گیا تھا۔ مسٹر وانگچک کے میڈیکل ریکارڈ کے جائزے اور ایمس ، صفدر جنگ اسپتال اور ان کی نجی میڈیکل ٹیم کے ڈاکٹروں سے مشورے کے بعد، دہلی ہائی کورٹ نے متفقہ طور پر پایا کہ انہیں اسپتال میں مسلسل نگرانی کی ضرورت ہے اور کہا کہ انہیں ان کی پسند کے اسپتال ‘میدانتا’ میں منتقل کیا جا سکتا ہے۔ مرکزی سرکار اور دہلی پولیس کی طرف سے پیش ہوئے سالیسیٹر جنرل تُشار مہتا اور ایڈیشنل سالیسیٹر جنرل چیتن شرما نے عدالت کو مطلع کیا کہ سرکار کو مسٹر وانگچک کو میدانتا منتقل کیے جانے پر کوئی اعتراض نہیں ہے۔ بنچ نے کہا، “ہم انہیں علاج کے لیے میدانتا منتقل کرنے کی تجویز رکھتے ہیں، اور صفدر جنگ اسپتال کے تمام میڈیکل ریکارڈ اور رپورٹیں میدانتا اسپتال کے ساتھ شیئر کی جائیں گی۔” اس کے ساتھ ہی بنچ نے کہا کہ اس سلسلے میں ایک باضابطہ حکم جاری کیا جائے گا۔

یہ تبصرہ مسٹر وانگچک کی طرف سے پیش سینئر ایڈوکیٹ اکھل سبل کے ذریعے ان کے پرانے ڈاکٹروں کی رپورٹ کی بنیاد پر دی گئی دلیلوں کے بعد آیا، جس میں کہا گیا تھا کہ ان کی زندگی کو کوئی فوری خطرہ نہیں ہے۔ مرکزی سرکار نے اس منتقلی پر کوئی اعتراض نہیں جتایا اور یقین دہانی کرائی کہ تمام میڈیکل ریکارڈ میدانتا کے ساتھ شیئر کیے جائیں گے۔ اگرچہ مسٹر وانگچک کے وکیل نے دلیل دی کہ ان کی حالت ایسی نہیں ہے کہ انہیں اسپتال میں داخل رکھا جائے، لیکن ایمس اور صفدر جنگ کے ڈاکٹروں نے کم بلڈ سیلز کاؤنٹ، کم ہیموگلوبن اور یورک ایسڈ کی سطح بڑھنے پر تشویش جتائی اور انفیکشن کے بڑھتے خطرے کا حوالہ دیتے ہوئے مسلسل طبی نگرانی کی ضرورت پر زور دیا۔

یو این آئی۔ ایف اے

نئی دہلی، کانگریس کے سابق صدر اور لوک سبھا میں قائدِ حزبِ اختلاف مسٹر راہل گاندھی نے طلبا کے معاملے پر پارلیمنٹ میں بحث نہ کرائے جانے کو نامناسب قرار دیتے ہوئے کہا ہے کہ انہوں نے اس بارے میں لوک سبھا اسپیکر اوم برلا سے بحث کرانے کا مطالبہ کیا لیکن انہیں بتایا گیا کہ اس کے لیے سرکار سے اجازت لینی ہوگی مسٹر گاندھی نے منگل کو پارلیمنٹ ہاؤس کے احاطے میں صحافیوں سے کہا کہ طالب علموں کے مستقبل سے جڑے اس سنگین معاملے پر پارلیمنٹ میں بحث ہونی چاہیے۔ طالب علموں پر لاٹھی چارج اور مار پیٹ کی جا رہی ہے، جو پوری طرح غلط ہے۔ انہوں نے کہا کہ ملک کے نوجوان تباہ ہو چکے تعلیمی نظام اور امتحانی نظام کے خلاف مظاہرہ کر رہے ہیں، لیکن وزیرِ اعظم نریندر مودی اس معاملے پر خاموش ہیں۔ انہیں طالب علموں سے معافی مانگنی چاہیے اور طالب علموں کے خلاف طاقت کا استعمال فوری طور پر بند کرانا چاہیے۔

مسٹر گاندھی نے کہا کہ ملک کے نوجوانوں کے ساتھ اس طرح کا سلوک قابلِ قبول نہیں ہے۔ نوجوانوں کے سامنے مواقع کے تمام راستے تقریباً بند ہو چکے ہیں۔ صرف مسابقتی امتحانات کا راستہ بچا تھا، لیکن وہ نظام بھی برباد ہو گیا ہے۔ انہوں نے کہا کہ یہاں موجود طالب علم صرف تعلیمی نظام کی شکایت نہیں کر رہے ہیں بلکہ اپنے مستقبل کے تعلق سے بھی فکر مند ہیں۔ یہ صرف تعلیم کا معاملہ نہیں ہے بلکہ ملک کے نوجوانوں کے مستقبل کا سوال ہے۔ طالب علم کہہ رہے ہیں کہ انہیں اپنے مستقبل کی کوئی امید دکھائی نہیں دے رہی ہے۔

کانگریس لیڈر نے کہا کہ اس پورے معاملے کی اخلاقی ذمہ داری لیتے ہوئے وزیرِ تعلیم دھرمیندر پردھان، وزیرِ داخلہ امیت شاہ اور مسٹر مودی کو استعفیٰ دینا چاہیے۔ انہوں نے دہرایا کہ طالب علموں کے مستقبل سے جڑے اس سنگین موضوع پر پارلیمنٹ میں وسیع بحث کرائی جانی چاہیے۔

یو این آئی۔ ایف اے