واشنگٹن، امریکی صدر ڈونلڈ ٹرمپ نے دو ٹوک الفاظ میں واضح کر دیا ہے کہ اگر سعودی عرب معاہدہ ابراہیمی میں شامل نہ ہوا تو اس کے ساتھ ہم جوہری معاہدہ نہیں کریں گے۔

اوول آفس میں صحافیوں سے گفتگو کرتے ہوئے صدر ٹرمپ نے کہا کہ سعودی عرب کو معاہدہ ابراہیمی کا رکن ہونا چاہیے۔

ساتھ ہی انہوں نے واضح کیا کہ اگر سعودی عرب معاہدہ ابراہیمی میں شامل نہ ہوا تو جوہری معاہدہ نہیں کریں گے۔

اس کے علاوہ ایران جنگ سے متعلق گفتگو کرتے ہوئے امریکی صدر ڈونلڈ ٹرمپ نے کہا ہے کہ انہوں نے ابھی تک ایران پر بڑے پیمانے پر حملے کرنے یا نہ کرنے کا فیصلہ نہیں کیا، کیونکہ تہران کے ساتھ جاری مذاکرات میں ایرانی حکام اب زیادہ سنجیدگی کا مظاہرہ کر رہے ہیں۔

ٹرمپ نے مزید کہا کہ دیکھیں، اس وقت ہماری ان سے بات چیت جاری ہے۔ میرے خیال میں وہ ہر گزرتے دن کے ساتھ زیادہ سنجیدہ ہوتے جا رہے ہیں، شاید اس کی وجہ بھی سب پر واضح ہے۔

واضح رہے کہ کچھ روز قبل امریکی صدر ٹرمپ نے سعودی عرب کے ساتھ سول جوہری پروگرام کے معاہدے کی باضابطہ منظوری دی ہے تاہم اسے کانگریس کی منظوری درکار ہے۔

اپنے سوشل میڈیا اکاؤنٹ پر جاری بیان میں ڈونلڈ ٹرمپ کا کہنا تھا کہ امریکا کے محکمہ توانائی اور سعودی عرب کے درمیان جو سول جوہری معاہدہ طے کیا جا رہا ہے، اس میں کسی بھی قسم کی یورینیم افزودگی کی اجازت نہیں ہوگی۔

ڈونلڈ ٹرمپ کا کہنا تھا کہ یہ معاہدہ صرف پرامن اور غیر فوجی مقاصد کے لیے ہوگا، بالکل ویسا ہی جیسے ایران، متحدہ عرب امارات اور بعض دیگر ممالک کے پاس موجود سول جوہری پروگرام ہیں۔

ساتھ ہی امریکی صدر نے واضح کیا تھا کہ اس معاہدے کی منظوری دی جائے گی لیکن اس کی ایک بنیادی شرط یہ ہوگی کہ سعودی عرب باعزت، کامیاب اور نہایت قابل احترام معاہدہ ابراہیمی (Abraham Accords) میں شامل ہو۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے کہا ہے کہ مجھے لگتا ہے ایران ابھی معاہدے کے لیے مکمل طور پر تیار نہیں ہے۔

واشنگٹن ڈی سی میں سالانہ وائٹ ہاؤس کریسپونڈنٹس ایسوسی ایشن کے عشائیے سے خطاب میں صدر ٹرمپ نے کہا ’’وہ اس وقت ہم سے بات کر رہے ہیں، وہ معاہدہ کرنا چاہتے ہیں لیکن مجھے نہیں لگتا کہ وہ ابھی اس کے لیے تیار ہیں۔ میرا خیال ہے کہ ابھی وقت نہیں آیا، لیکن میں ان کی بات سننے کے لیے تیار ہوں۔ تاہم، انھیں ایٹمی ہتھیار رکھنے کی اجازت نہیں دی جا سکتی۔‘‘

ٹرمپ نے دعویٰ کیا کہ امریکی فوجی کارروائی نے ایران کی فوجی طاقت کو شدید نقصان پہنچایا ہے، انھوں نے کہا ہم نے ایران کو بہت سخت ضرب لگائی ہے، ان کی بحریہ ختم ہو چکی ہے، ان کی فضائیہ بھی ختم ہو چکی ہے، ان کے 250 طیارے اب نہیں رہے اور 159 کشتیاں سمندر کی تہہ میں جا چکی ہیں۔

انھوں نے مزید دعویٰ کیا کہ ’’ان کے پاس اب کوئی ریڈار نہیں، ان کے پاس بہت کم ڈرون باقی بچے ہیں۔ اگرچہ کبھی کبھار آپ کچھ دیکھتے ہیں، وہ کچھ نہ کچھ کرنے کی کوشش کریں گے، لیکن ان کے پاس زیادہ کچھ باقی نہیں بچا۔‘‘

ڈونلڈ ٹرمپ نے کہا اصل معاملہ صرف یہ ہے کہ ہم انھیں ایٹمی ہتھیار حاصل نہیں کرنے دیں گے، اگر ان کے پاس ایٹمی ہتھیار ہوتے تو وہ ضرور استعمال کرتے، وہ یقیناً انھیں استعمال کرتے۔

یو این آئی۔ ع ا۔

تہران، جنگی صورت حال سے متعلق ایرانی پاسداران انقلاب نے اعلامیہ جاری کر دیا۔

اعلامیہ کے مطابق نصر 2 آپریشن کی 27ویں لہر کا آغاز کیا گیا جو کہ مبارک کوڈیا اباصالح المہدی ادرکنی کے تحت کیا گیا ہے۔

کویت میں واقع امریکی اڈے العدیری پر ہینگرز کو نشانہ بنا کر مکمل تباہ کر دیا گیا اور حملے میں اڈے کے 3ہینگرز میں آگ لگ گئی۔ العدیری اڈے کے ہینگرز میں گولہ بارود اور سازوسامان ذخیرہ کیا گیا تھا۔

بحرین میں امریکی بحریہ کے پانچویں فلیٹ کے کنٹرول ٹاور کو شدید نقصان پہنچا، امریکی پانچویں بحری بیڑے کے کنٹرول ٹاور کو کامیابی سے نشانہ بنایا گیا۔

پاسداران انقلاب نے کہا کہ بہادر قوم کی عظمت نے دشمنوں کے ٹھکانوں میں خوف وہراس پھیلا دیا، عوام کے اخلاص نے جنگجوؤں میں جہاد کی خواہش کو دگنا کر دیا ہے، پاسداران انقلاب اوربسیج کےفرزند دشمنوں کی صفوں کو کچل رہے ہیں دشمن کے خلاف تعزیری کارروائیاں مسلسل جاری ہیں۔

امریکی سینٹرل کمانڈ کے مطابق امریکی افواج نے ان حملوں میں ایرانی فوجی کمانڈ مراکز، ڈرون تنصیبات، مواصلاتی نیٹ ورکس اور بحری صلاحیتوں کو نشانہ بنایا۔ ان کارروائیوں کا مقصد آبنائے ہرمز میں شہری اور تجارتی جہازوں کو درپیش خطرات کم کرنا ہے۔اس کے علاوہ امریکی فوج نے آبنائے ہرمز میں ایک تجارتی جہاز کو ناکارہ بنانے اور 12 کا رخ موڑنے کا بھی دعویٰ کیا ہے۔

امریکی سینٹرل کمانڈ کے مطابق ایران کے خلاف بحری ناکا بندی دوبارہ شروع کیے جانے کے بعد گزشتہ نو دنوں کے دوران ایک تجارتی جہاز کو ناکارہ بنایا گیا اور دیگر 12 تجارتی جہازوں کا رخ موڑ دیا گیا۔

ان اقدامات کا مقصد تجارتی جہازوں کو ایرانی بندرگاہوں اور ساحلی علاقوں میں داخل ہونے یا وہاں سے روانہ ہونے سے روکنا تھا۔

سینٹ کام کے مطابق آبنائے ہرمز بدستور کھلی ہے اور تجارتی جہاز امریکی فوجی تعاون کے ساتھ سفر جاری رکھے ہوئے ہیں۔.مشرق وسطیٰ میں 50 ہزار سے زائد امریکی فوجی اہلکار تعینات ہیں۔

دوسری جانب ایرانی سرکاری میڈیا کا کہنا ہے کہ امریکہ نے ایران کے صوبہ یزد سمیت مختلف علاقوں میں فضائی حملے کیے ہیں۔

ایرانی میڈیا کے مطابق امریکی فضائی حملوں میں خنداب، تفت، شیرکوہ، نایین، انارک، بروجرد، جاسک، کنارک اور بندر عباس کو نشانہ بنایا گیا جب کہ جزیرہ قشم اور خرم آباد میں بھی دھماکوں کی آوازیں سنی گئیں

ایرانی حکام کے مطابق گزشتہ دو ہفتوں میں حملوں کے نتیجے میں 55 افراد شہید اور 629 زخمی ہوئے ہیں۔

ادھر پاسداران انقلاب نے کرمان کے علاقے کہنوج میں ایک امریکی ٹام میزائل کو تباہ کرنے کا دعویٰ کرتے ہوئے کہا ہے کہ امریکی ٹام میزائل کو رہائشی علاقے میں گرنے سے قبل ہی دفاعی میزائل یونت نے بروقت کارروائی کر کے فضا میں ہی تباہ کیا۔

یو این آئی۔ ع ا۔