نئی دہلی، مغربی ایشیا بحران کے درمیان تیل کی مارکیٹنگ کمپنیوں نے پیٹرول اور ڈیژل کی قیمتوں میں ایک بار پھر اضافہ کر دیا ہے اور دہلی میں چار سال بعد پیٹرول 100 روپے فی لیٹر کے پار پہنچ گیا ہے۔

ملک کی سب سے بڑی تیل مارکیٹنگ کمپنی انڈین آئل کارپوریشن کے مطابق، قومی راجدھانی دہلی میں آج سے غیر برانڈڈ یعنی عام پیٹرول 2.61 روپے فی لیٹر مہنگا ہو گیا ہے۔ اب اس کی قیمت 102.12 روپے فی لیٹر ہو گئی ہے۔ عام ڈیژل بھی اب 95.20 روپے فی لیٹر ملے گا۔ اس کی قیمت میں 2.71 روپے کا اضافہ کیا گیا ہے۔ دونوں ایندھن کی یہ 21 مئی 2022 کے بعد کی بلند ترین سطح ہے۔ اس سال 15 مئی سے اب تک چار مرتبہ میں دہلی میں پیٹرول 7.35 روپے اور ڈیژل 7.53 روپے فی لیٹر مہنگا ہو چکا ہے۔ ان کی قیمتیں 30 اکتوبر 2024 کے بعد گزشتہ 15 مئی کو پہلی بار بڑھائی گئی تھیں۔

دہلی میں انڈین آئل کے پریمیم پیٹرول ایکس پی95 کی قیمت بھی 2.61 روپے بڑھ کر 109.24 روپے اور پریمیم ڈیژل ایکس جی کی قیمت 2.71 روپے بڑھ کر 100.52 روپے فی لیٹر ہو گئی ہے۔ کولکتہ میں پیٹرول 2.87 روپے اور چنئی میں 2.46 روپے مہنگا ہوا ہے۔ دونوں شہروں میں اس کی نئی قیمت بالترتیب 113.51 روپے اور 107.77 روپے فی لیٹر ہو گئی ہے۔

ڈیژل کولکتہ میں 2.80 روپے اور چنئی میں 2.57 روپے بڑھ کر بالترتیب 99.82 روپے اور 99.55 روپے فی لیٹر پر پہنچ گیا ہے۔ امریکہ اور ایران امن مذاکرات میں ٹھوس پیش رفت کے بعد بین الاقوامی مارکیٹ میں آج خام تیل کی قیمت میں چار فیصد سے زیادہ گراوٹ دیکھی گئی ہے۔ خام تیل کا معیار برینٹ کروڈ فیوچر فی الحال 100 ڈالر فی بیرل سے نیچے اتر گیا ہے۔

گزشتہ 28 فروری کو شروع ہونے والے مغربی ایشیا بحران کی وجہ سے سپلائی متاثر ہونے سے خام تیل کی قیمت میں اچھال آیا ہے۔ اس سے پہلے بین الاقوامی مارکیٹ میں خام تیل 70 ڈالر فی بیرل کے آس پاس تھا۔

یو این آئی۔ ایم جے

ماسکو، امریکہ اور ایران نے ایک ابتدائی معاہدے کے تحت 30 دنوں کے اندر آبنائے ہرمز کو پوری طرح کھولنے پر اتفاق کیا ہے۔ ’واشنگٹن‘ پوسٹ نے ایک نامعلوم سفارت کار کے حوالے سے یہ معلومات دی ہے۔

اخبار نے ایک نامعلوم ایرانی اہلکار کے حوالے سے بتایا کہ امریکہ-ایران کے ابتدائی امن معاہدے میں جوہری مذاکرات کو بعد کی تاریخ تک ملتوی کرنے کی بھی گنجائش ہے۔ اخبار نے ایک نامعلوم سفارت کار کے حوالے سے بتایا کہ ایران اور امریکہ کے درمیان ابتدائی ڈھانچہ جاتی معاہدے کی ابھی تک ایرانی فریق کی طرف سے منظوری نہیں دی گئی ہے۔

اخبار کے مطابق، حتمی معاہدے تک پہنچنے کے لیے دونوں فریق 60 دنوں کے لیے جنگ بندی بڑھانے پر متفق ہوئے ہیں۔

فاکس نیوز نے ذرائع کے حوالے سے بتایا کہ امریکہ-ایران ڈھانچہ جاتی معاہدہ “95 فیصد مکمل ہو چکا ہے”، تاہم مذاکرات کار اب بھی آبنائے ہرمز اور تہران کے جوہری ذخائر سے متعلق الفاظ پر بحث کر رہے ہیں۔

امریکی صدر ڈونلڈ ٹرمپ نے پہلے کہا تھا کہ ایران کے ساتھ معاہدے پر کافی حد تک اتفاق ہو چکا ہے اور حتمی پہلوؤں اور تفصیلات پر بات چیت چل رہی ہے، جن کا اعلان جلد ہی کیا جائے گا۔ نام نہ بتانے کی شرط پر امریکی حکام نے چینل کو تصدیق کی کہ ایران نے اصولی طور پر معاہدے کے ڈھانچے پر رضامندی ظاہر کر دی ہے۔

ایک اہلکار نے براڈکاسٹر کو بتایا، “ہم 95 فیصد تک پہنچ چکے ہیں۔ جوہری ذخائر اور آبنائے ہرمز پر ہمارا معاہدہ ہو چکا ہے، لیکن ہم زبان پر بات چیت کر رہے ہیں۔” 28 فروری کو امریکہ اور اسرائیل نے ایران میں ٹھکانوں پر حملے شروع کیے، جن میں 3,000 سے زیادہ لوگ مارے گئے۔ 8 اپریل کو واشنگٹن اور تہران نے دو ہفتوں کی جنگ بندی کا اعلان کیا۔ اسلام آباد میں ہونے والی بعد کی بات چیت بے نتیجہ رہی۔ اگرچہ دشمنی کے دوبارہ آغاز کا کوئی اعلان نہیں کیا گیا، لیکن امریکہ نے ایرانی بندرگاہوں کی ناکہ بندی شروع کر دی۔

یو این آئی/اسپوتنک

سرینگر، قومی تحقیقاتی ایجنسی (این آئی اے) نے پیر کو سرینگر اور شوپیاں اضلاع میں کئی مقامات پر چھاپے مارے، جن میں دارالعلوم سراج العلوم مدرسہ بھی شامل ہے، جسے گزشتہ ماہ جموں و کشمیر انتظامیہ نے غیر قانونی ادارہ قرار دیا تھا۔

حکام نے بتایا کہ این آئی اے کی ٹیموں نے شوپیاں کے امام صاحب علاقے میں واقع مدرسے میں علی الصبح تلاشی مہم چلائی۔

گزشتہ ماہ، جموں و کشمیر انتظامیہ نے جنوبی کشمیر کے سب سے بڑے مدرسوں میں سے ایک، سراج العلوم کو غیر قانونی سرگرمیاں (روک تھام) ایکٹ (یو اے پی اے) کے تحت غیر قانونی ادارہ قرار دے دیا تھا۔ انتظامیہ نے الزام لگایا تھا کہ مدرسے کا کالعدم جماعت اسلامی (جے ای ایل) سے ”خفیہ تعلق“ ہے، ساتھ ہی ”سنگین قانونی، انتظامی اور مالی بے ضابطگیاں“ ہیں اور یہ ”شدت پسندی کو فروغ دینے والا ماحول“ پیدا کر رہا ہے۔

یہ مدرسہ جموں و کشمیر میں یو اے پی اے کے تحت غیر قانونی قرار دیا جانے والا پہلا مذہبی تعلیمی ادارہ بن گیا ہے۔ حکام نے بتایا کہ این آئی اے نے سرینگر میں بھی ایک مقام پر تلاشی لی، تاہم اس مہم کی تفصیلات اور اس سے جڑے معاملے کی معلومات فوری طور پر جاری نہیں کی گئیں۔

اس رپورٹ کے لکھے جانے تک این آئی اے کی جانب سے تلاشی کے سلسلے میں کوئی سرکاری بیان جاری نہیں کیا گیا تھا۔

یو این آئی۔ ایم جے