سری نگر، پیپلز ڈیموکریٹک پارٹی (پی ڈی پی) اور پیپلز کانفرنس کے بعد اپنی پارٹی نے بھی نیشنل کانفرنس (این سی) کی جانب سے 20 جولائی کو نئی دہلی کے جنتر منتر پر ریاستی درجہ کی بحالی کے مطالبے کے حق میں مجوزہ دھرنے میں شریک نہ ہونے کا فیصلہ کیا ہے، تاہم پارٹی نے جموں و کشمیر کو ریاستی درجہ بحال کرنے کے مطالبے کی مکمل حمایت کا اعادہ کیا ہے۔

یہ فیصلہ ہفتہ کو سری نگر میں اپنی پارٹی کے مرکزی دفتر میں منعقدہ سینئر قیادت کے اجلاس میں کیا گیا۔ اجلاس کے بعد پارٹی صدر الطاف بخاری نے پریس کانفرنس سے خطاب کرتے ہوئے کہا کہ اگرچہ ریاستی درجہ کی بحالی جموں و کشمیر کے عوام کی خواہشات کی عکاس ہے اور ان کی جماعت اس مطالبے کی مکمل حمایت کرتی ہے، لیکن غور و خوض کے بعد متفقہ طور پر طے کیا گیا ہے کہ وہ نیشنل کانفرنس کے دہلی احتجاج کا حصہ نہیں بنیں گے۔

الطاف بخاری نے کہا کہ اپنی پارٹی کا ماننا ہے کہ جموں و کشمیر کے عوام کو درپیش مسائل، ان کی جائز شکایات، ریاستی درجہ کی بحالی اور دیگر آئینی حقوق جیسے مطالبات احتجاج یا محاذ آرائی کے بجائے حکومت ہند کے ساتھ بامعنی مذاکرات کے ذریعے حاصل کیے جا سکتے ہیں۔ انہوں نے کہا کہ پارٹی کا یقین بات چیت اور مفاہمت پر ہے، نہ کہ احتجاج اور تصادم پر۔

انہوں نے کہا کہ جموں و کشمیر کو ریاستی درجہ دلانا اپنی پارٹی کے قیام کے روز اول سے اس کے بنیادی ایجنڈے کا حصہ رہا ہے۔ 8 مارچ 2020 کو پارٹی کے قیام کے وقت ہی عوام کے حقوق، ریاستی درجہ کی بحالی، زمین اور سرکاری ملازمتوں پر مقامی لوگوں کے خصوصی حقوق کے تحفظ اور دیگر آئینی و جمہوری حقوق کے لیے جدوجہد کا عہد کیا گیا تھا۔

مسٹر بخاری نے کہا کہ تاریخ گواہ ہے کہ جب بھی نئی دہلی کے ساتھ تصادم کی راہ اختیار کی گئی، جموں و کشمیر کے عوام اپنے حقوق سے محروم ہوتے گئے۔ اسی لیے ان کی جماعت کا ماننا ہے کہ عوام کے حقوق اور امنگوں کے حصول کے لیے تعمیری رابطہ اور بامعنی مذاکرات ہی سب سے مؤثر راستہ ہیں۔

انہوں نے ریاستی درجہ کی بحالی کے معاملے پر نیشنل کانفرنس کو تنقید کا نشانہ بناتے ہوئے کہا کہ اس نے اس اہم معاملے پر دیگر سیاسی جماعتوں کے ساتھ وسیع مشاورت سے گریز کیا۔

یو این آئی۔ م س

جموں، سخت حفاظتی انتظامات کے درمیان ہفتہ کے روز جنوبی کشمیر کے ہمالیہ میں واقع غار کے دونوں بنیادی کیمپوں کے لیے جموں کے بھگوتی نگر یاتری نواس بیس کیمپ سے امرناتھ یاترا کے 3,600 سے زائد زائرین کا ایک نیا جھتہ روانہ ہوا۔

حکام نے بتایا کہ 3,632 زائرین آج علی الصبح جموں بیس کیمپ سے 148 گاڑیوں کے قافلے میں روانہ ہوئے جس میں ہلکی اور بھاری گاڑیاں شامل تھیں۔ اس جھتے میں 1,008 زائرین بالتل اور 2,624 پہلگام کے لیے شامل تھے۔ وہ ایک کثیر سطحی حفاظتی نظام کے تحت یاترا کے لیے روانہ ہوئے، جس میں سول انتظامیہ، پولیس، سکیورٹی فورسز اور امرناتھ شرائن بورڈ کے درمیان مربوط انتظامات کیے گئے ہیں تاکہ یہ یقینی بنایا جا سکے کہ یاترا محفوظ، مامون اور خوش اسلوبی سے جاری رہے۔ امرناتھ یاترا نے محض 15 دنوں میں 3.5 لاکھ کا ہندسہ عبور کر کے ایک نیا تاریخی ریکارڈ قائم کیا ہے۔ جموں و کشمیر کے لیفٹیننٹ گورنر منوج سنہا نے 2 جولائی کو جموں سے یاترا کے پہلے جھتے کو ہری جھنڈی دکھا کر روانہ کیا تھا۔

یو این آئی۔ ایم جے

جموں، جموں و کشمیر کے ضلع ادھم پور میں جکھانی کے پاس ہفتہ کے روز ایک گاڑی کے حادثے کا شکار ہو جانے سے کم از کم پانچ امرناتھ یاتری زخمی ہو گئے۔

پولیس نے بتایا کہ ایک ایس یو وی گاڑی، جو آج صبح جموں سے سری نگر کی طرف جانے والے قافلے کا حصہ تھی، جکھانی علاقے میں سڑک کے کنارے کھڑے ایک ڈمپر سے ٹکرا گئی۔

جموں-سری نگر قومی شاہراہ پر یاترا کی ڈیوٹی پر مامور پولیس، فوج اور نیم فوجی دستوں نے فوری طور پر کارروائی کرتے ہوئے زخمیوں کو اسپتال منتقل کیا۔پولیس نے بتایا کہ تمام پانچوں زخمی افراد کی حالت مستحکم ہے۔

دریں اثنا، جموں و کشمیر کے لیفٹیننٹ گورنر منوج سنہا نے صورتحال کا جائزہ لیا۔ انہوں نے ڈپٹی کمشنر ادھم پور منگا شیرپا اور طبی حکام سے بات کی اور گورنمنٹ میڈیکل کالج، ادھم پور میں زیر علاج زخمیوں کو بہترین ممکنہ طبی دیکھ بھال فراہم کرنے کی ہدایت دی۔ ایکس پر ایک پوسٹ میں لیفٹیننٹ گورنر نے کہا کہ ڈپٹی کمشنر ادھم پور اور طبی حکام سے بات کی اور آج صبح سویرے ادھم پور کے جکھانی کے پاس سڑک کے حادثے میں زخمی ہونے والے امرناتھ جی یاترا کے زائرین کی صحت کے بارے میں دریافت کیا۔

یو این آئی۔ ایم جے