غزہ، حماس کے مذاکراتی وفد کے رکن غازی حمد نے کہا ہے کہ اگر اسرائیلی قابض افواج نے معاہدے کے تحت اپنی ذمے داریاں پوری نہ کیں تو حماس بھی غزہ امن معاہدے کے کسی مرحلے پر عمل درآمد نہیں کرے گی۔

عرب میڈیا سے گفتگو کرتے ہوئے غازی حمد نے کہا کہ یہ مذاکرات نہایت مشکل اور پیچیدہ تھے، تاہم ہم نے ایسی بہترین قابلِ عمل صورت تک پہنچنے کی کوشش کی جو تمام فریقوں کے لیے قابلِ قبول ہو۔

میڈیا رپورٹس کے مطابق غازی حمد نے واضح کیا کہ غزہ سے متعلق معاہدہ مرحلہ وار ہے اور اس پر مختلف مراحل میں عمل درآمد کیا جائے گا۔انہوں نے کہا کہ دونوں فریقوں کی جانب سے معاہدے کے متن کی منظوری کے بعد اسرائیل کو پہلے مرحلے پر عمل درآمد شروع کرنا ہوگا، جبکہ اسرائیل کو غزہ سے اپنی تمام افواج بھی واپس بلانا ہوں گی۔انہوں نے کہا کہ غزہ میں فلسطینی قومی کمیٹی اور بین الاقوامی فورس کی تعیناتی ضروری ہے اور اسرائیلی حمایت یافتہ مسلح ملیشیاؤں کو بھی ختم کیا جائے گا۔

حماس عہدیدار کے مطابق ہتھیار فلسطینی قومی کمیٹی کے حوالے کرنے کا عمل اسرائیل کی جانب سے معاہدے کی مکمل پاسداری پر منحصر ہے اور اگر اسرائیلی افواج نے معاہدے پر عمل کرتے ہوئے اپنی ذمے داریاں پوری نہ کیں تو حماس بھی معاہدے کے کسی حصے پر عمل درآمد نہیں کرے گی۔

ان کا کہنا ہے کہ اسلحہ چھوڑنے کا عمل اسرائیلی افواج کے غزہ سے انخلاء اور فلسطینی علاقے کی تعمیرِ نو میں پیش رفت سے مشروط ہے۔

میڈیا رپورٹس کے مطابق اسرائیل کی جانب سے تاحال اس معاہدے پر کوئی باضابطہ ردِعمل سامنے نہیں آیا ہے۔

ادھر بورڈ آف پیس نے حماس کے غیر مسلح ہونے کے معاہدے کا خیر مقدم کیا ہے۔

غزہ میں جنگ کے بعد عبوری انتظامات کی نگرانی کے لیے قائم بورڈ آف پیس نے اعلان کیا ہے کہ حماس نے باضابطہ طور پر جنگ بندی کے آئندہ مراحل پر عمل درآمد کے لیے ایک تفصیلی لائحۂ عمل پر اتفاق کر لیا ہے۔

بورڈ آف پیس نے سماجی رابطے کی ویب سائٹ ایکس (سابقہ ٹوئٹر) پر جاری بیان میں کہا ہے کہ پہلی مرتبہ حماس نے باضابطہ طور پر غیر مسلح ہونے کے قابلِ عمل منصوبے پر اتفاق کیا ہے، جس کے بعد اسرائیلی افواج غزہ سے انخلاء کریں گی۔

بیان میں کہا گیا ہے کہ یہ معاہدہ کئی ماہ پر محیط سنجیدہ اور نیک نیتی پر مبنی مذاکرات کا نتیجہ ہے، جن کا مقصد صدر ٹرمپ کے اس وژن کو عملی شکل دینا ہے جس کے تحت غزہ میں نئی حکمرانی، سیکیورٹی، انسانی امداد، تعمیرِ نو اور معاشی بحالی کا نظام قائم کیا جانا ہے، جیسا کہ جامع امن منصوبے اور اقوامِ متحدہ کی سلامتی کونسل کی قرارداد 2803 میں بیان کیا گیا ہے۔

واضح رہے کہ حماس اور دیگر فلسطینی مسلح گروہوں نے غزہ میں غیر مسلح ہونے کے منصوبے پر مشتمل ایک دستاویز پر اتفاق کر لیا ہے، جسے امریکی صدر ٹرمپ نے امن اور سلامتی کی جانب ایک تاریخی پیش رفت قرار دیا ہے۔

حماس کے غیر مسلح ہونے کے عمل کا تفصیلی لائحہ عمل 14 روز کے اندر تیار کیا جائے گا، جبکہ ضرورت پڑنے پر اس مدت میں توسیع بین الاقوامی نگرانی کے ادارے کی منظوری اور تمام فریقوں کی رضامندی سے کی جا سکے گی۔

یو این آئی۔ ع ا۔

تہران، ایرانی پاسدارانِ انقلاب نے دعویٰ کیا ہے کہ امریکی فضائی نگرانی میں آبنائے ہرمز عبور کرنے کی کوشش کرنے والے 2 جہازوں کو نشانہ بنایا گیا۔

پاسدارانِ انقلاب کے مطابق ضوابط کی خلاف ورزی کرنے والے آئل ٹینکروں کو نشانہ بنا کر روک دیا گیا۔

ایرانی پاسدارانِ انقلاب کا کہنا ہے کہ دیگر 4 آئل ٹینکروں نے فوری طور پر اپنا راستہ تبدیل کیا اور سابقہ پوزیشنوں کی جانب واپس لوٹ گئے۔

یو این آئی۔ ع ا۔

نئی دہلی، ہندوستان نے پاکستان کے قبضے والے جموں و کشمیر میں پاکستانی انتظامیہ کی بربریت میں 40 سے زیادہ لوگوں کی موت کی شدید مذمت کرتے ہوئے امید ظاہر کی ہے کہ بین الاقوامی برادری پاکستان کی کارروائیوں کی تحقیقات کر کے اسے ان مظالم کے لیے جوابدہ ٹھہرائے گی۔

ہندوستان نے یہ بھی کہا ہے کہ اب پاکستان کو اپنی کارروائیوں کا اندازہ ہو رہا ہے جب ہندوستان میں خون خرابا کرنے کے لیے تیار کیے گئے ‘مجاہدین’ نے اب پاکستان کے خلاف ہی ہتھیار اٹھا لیے ہیں۔

وزارتِ خارجہ کے ترجمان رندھیر جیسوال نے جمعہ کو میڈیا بریفنگ میں پاکستان کے قبضے والے کشمیر میں لوگوں کے خلاف ظالمانہ کارروائی کے بارے میں پوچھے گئے سوال کے جواب میں کہا کہ اس سے زیادہ دکھ کی بات کیا ہوگی کہ پاکستان نے احتجاج کر رہے اپنے ہی شہریوں کو دشمن مان لیا ہے۔

ترجمان نے کہا، “جیسا کہ آپ نے خود دیکھا ہے، پاکستانی انتظامیہ پاکستان کے قبضے والے جموں و کشمیر میں پرامن شہریوں کے خلاف ظالمانہ طریقے سے فورس کا استعمال کر رہی ہے۔ اس کارروائی میں 40 سے زیادہ شہریوں کی دردناک موت ہوئی ہے اور کئی لوگ شدید زخمی ہوئے ہیں۔” انہوں نے کہا کہ پاکستان کی بے حسی کا اس بات سے پتہ چلتا ہے کہ اس نے اپنے ہی شہریوں کو دشمن مان لیا ہے۔

مسٹر جیسوال نے کہا، “پاکستان کے قبضے والے کشمیر کے بے قصور لوگوں کے تئیں پاکستان انتظامیہ کی مکمل بے حسی تب سامنے آئی جب ان کے وزیرِ دفاع نے احتجاج کر رہے شہریوں کو دشمن قرار دیا۔” انہوں نے کہا کہ اب پاکستان کو اپنی کارروائیوں کا اندازہ ہو رہا ہے کیونکہ کبھی ہندوستان میں خون خرابا کرنے کے لیے تیار کیے گئے مجاہدین نے اب اپنے ملک کے خلاف ہی ہتھیار اٹھا لیے ہیں۔

ترجمان نے کہا، “سیاسی امور میں پاکستانی وزیراعظم کے خصوصی معاون نے کھلے طور پر تسلیم کیا کہ جن “مجاہدین” کو پاک انتظامیہ نے ہندوستان کو نقصان پہنچانے کے لیے تربیت دی، ہتھیار دیے اور بھیجا تھا، انہوں نے اب اپنی بندوقیں ملک کی طرف ہی موڑ لی ہیں اور وہ ملک کے خلاف ہی ہتھیار اٹھا رہے ہیں۔”

انہوں نے کہا کہ پاکستان کے قبضے والے کشمیر میں نام نہاد انتخابات اس بات کا ثبوت ہیں کہ لوگوں نے پاکستانی انتظامیہ کو توہین آمیز طریقے سے مسترد کر دیا ہے۔ انہوں نے کہا کہ حکومت کی طرف سے تشدد کا سامنا کر رہے لوگوں نے بین الاقوامی تنظیموں سے غیر قانونی ہلاکتوں کی غیر جانبدارانہ تحقیقات کا مطالبہ کیا ہے۔ انہوں نے کہا کہ ہندوستان بھی ان کے اس مطالبے کی حمایت کرتا ہے۔ انہوں نے کہا، “ہم اپیل کرتے ہیں کہ بین الاقوامی برادری پاکستان کی پرتشدد کارروائی کی تحقیقات کرے اور اس کے مظالم کے لیے اسے جوابدہ ٹھہرائے۔”

قابلِ ذکر ہے کہ پاکستان کے قبضے والے جموں و کشمیر میں پاکستانی انتظامیہ نیز فوج کے مظالم سے پریشان لوگ گزشتہ ڈیڑھ مہینے سے بھی زائد عرصے سے احتجاجی مظاہرے کر رہے ہیں۔ انتظامیہ نے احتجاجی مظاہرے کو کچلنے کے لیے پرتشدد کارروائی کی ہے جس میں 40 سے زائد افراد مارے گئے ہیں۔

یو این آئی۔ ایف اے