تہران، ایرانی پاسداران انقلاب نے قطر میں امریکی العدید بیس کو نشانہ بنانے کا دعویٰ کیا ہے۔

تہران سے ایک بیان میں ایرانی پاسداران انقلاب کا کہنا ہے کہ العدید بیس پر لانگ رینج ریڈار سسٹم اور متعدد امریکی اسٹریٹیجک ریفیولنگ ایئر کرافٹ کو تباہ کیا۔

ایرانی پاسداران انقلاب کے مطابق اس کے علاوہ متعدد اسٹریٹیجک ریفیولنگ ایئر کرافٹ کو شدید نقصان پہنچایا۔

یو این آئی۔ ع ا۔

تہران، ایرانی اعلامیہ کے مطابق امریکہ نے 3 میزائل داغ کر مکمل طور پر سویلین ڈھانچے کو تباہ کیا یہ حملے ماہی گیروں کے روزگار اور سویلین بحری جہازرانی کی سلامتی پر گھناؤنا وار ہیں۔

اعلامیہ میں کہا گیا کہ اہم انفرااسٹرکچر پر امریکی حملے مغرب کے دوہرے معیار کو بےنقاب کرتے ہیں واشنگٹن کی جانب سےخودساختہ عالمی معاہدوں کی سنگین خلاف ورزی کی گئی ہے۔

امریکہ کے فضائی حملے جاری ہیں چھٹے روز حملوں میں ایران کے جنوبی علاقوں کا بڑا حصہ بجلی سے محروم ہو گیا۔

ایرانی وزارت توانائی کے مطابق امریکی حملوں کے بعد جنوبی علاقوں کا بڑا حصہ بجلی سے محروم ہو گیا ہے۔ حملوں سے بندر عباس میں ٹیلی کمیونیکیشن ٹاور کو نشانہ بنایا گیا، جس سے بجلی کی لائنوں کو نقصان پہنچا ہے۔

وزارت توانائی کا کہنا ہے کہ بدر عباس اور محلقہ متاثرہ علاقوں میں بجلی کی بحالی کا عمل جاری ہے۔

حکام نے شہریوں سے اپیل کی ہے کہ وہ غیر ضروری بجلی کے استعمال سے گریز کریں جب کہ شہریوں کو متاثرہ علاقوں سے دور رہنے اور متبادل راستے اختیار کرنے کی ہدایت کی گئی ہے۔

یو این آئی۔ ع ا۔

سری نگر، جموں و کشمیر کے لیفٹیننٹ گورنر منوج سنہا نے کہا ہے کہ سالانہ امرناتھ یاترا کے پہلے 15 دنوں میں ساڑھے تین لاکھ سے زائد عقیدت مندوں نے مقدس امرناتھ غار میں بابا بھولے ناتھ کے درشن کیے ہیں۔ انہوں نے جمعہ کو پہلگام کے نن ون بیس کیمپ کا دورہ کرکے یاترا کے انتظامات کا جائزہ لیا۔

لیفٹیننٹ گورنر نے پینے کے پانی، بجلی، ٹیلی مواصلات، رہائش، خوراک، صحت، ہنگامی خدمات اور سیکورٹی سمیت مختلف سہولیات کا معائنہ کیا اور اعلیٰ سطحی اجلاس میں متعلقہ حکام کو ہدایت دی کہ یاترا کے دونوں راستوں اور کیمپوں میں خصوصی صفائی ستھرائی مہم چلائی جائے اور ماحولیات کے تحفظ کو یقینی بنایا جائے۔

انہوں نے آئندہ دنوں میں موسلادھار بارش کی پیش گوئی کے پیش نظر تمام متعلقہ محکموں کو مکمل تیار رہنے، ہنگامی انتظامات مضبوط بنانے اور یاتریوں کی حفاظت کو ہر حال میں یقینی بنانے کی ہدایت دی۔ انہوں نے یہ بھی کہا کہ ہر خیمے میں آگ بجھانے کا آلہ لازمی طور پر موجود ہونا چاہیے۔

بعد ازاں میڈیا سے گفتگو میں منوج سنہا نے کہا کہ جموں و کشمیر انتظامیہ، پولیس، فوج، سیکورٹی فورسز، شرائن بورڈ اور دیگر اداروں کے باہمی تعاون سے اس سال یاترا کے انتظامات پہلے سے زیادہ بہتر بنائے گئے ہیں اور یاتریوں کی جانب سے مثبت ردعمل ملا ہے۔ انہوں نے کہا کہ یاترا سے مقامی معیشت کو بھی فائدہ پہنچ رہا ہے اور وزیر اعظم نریندر مودی کی اپیل کے بعد بڑی تعداد میں یاتری مقامی دستکاری اور ہینڈلوم مصنوعات خرید رہے ہیں۔

یو این آئی۔ م س