سنگاپور، امریکی صدر ڈونلڈ ٹرمپ کے اعلان کے بعد خام تیل کی قیمتوں میں کمی آ گئی ہے، ڈبلیو ٹی آئی کروڈ آئل کی قیمت 101.40 ڈالر فی بیرل ہو گئی، جب کہ برینٹ کروڈ آئل 107.70 ڈالر فی بیرل کا ہو گیا۔

روئٹرز کے مطابق تیل کی قیمتوں میں پیر کے روز کمی دیکھی گئی جب امریکی صدر ڈونلڈ ٹرمپ نے کہا کہ امریکہ آبنائے ہرمز میں پھنسے جہازوں کو نکالنے کے لیے اقدامات شروع کرے گا۔ تاہم امریکہ اور ایران کے درمیان امن معاہدے کی عدم موجودگی کے باعث قیمتیں 100 ڈالر فی بیرل سے اوپر برقرار رہیں۔

برینٹ کروڈ فیوچرز 64 سینٹ یا 0.59 فی صد کمی کے بعد 107.53 ڈالر فی بیرل پر آئے، جب کہ جمعہ کو یہ 2.23 ڈالر کم ہو کر بند ہوئے تھے۔ امریکی ویسٹ ٹیکساس انٹرمیڈیٹ (ڈبلیو ٹی آئی) کروڈ آئل 84 سینٹ یا 0.82 فی صد کمی کے ساتھ 101.10 ڈالر فی بیرل پر پہنچا، جو جمعہ کو 3.13 ڈالر کی کمی کے بعد مزید نیچے آیا۔ امریکی صدر ٹرمپ نے آبنائے ہرمز کھولنے کا اعلان کر دیا صدر ٹرمپ نے اتوار کو اپنے سوشل میڈیا پلیٹ فارم ٹرتھ سوشل پر لکھا ’’ایران، مشرق وسطیٰ اور امریکہ کے مفاد میں ہم نے ان ممالک کو بتایا ہے کہ ہم ان کے جہازوں کو ان محدود آبی راستوں سے محفوظ طریقے سے نکالنے میں رہنمائی کریں گے تاکہ وہ آزادانہ طور پر اپنا کاروبار جاری رکھ سکیں۔‘‘

ادھر آبنائے ہرمز میں جہاز رانی تاحال محدود ہے اور کسی امن معاہدے کے آثار نظر نہیں آ رہے، جس کے باعث تیل کی قیمتیں 100 ڈالر فی بیرل سے اوپر برقرار ہیں۔ امریکہ اور ایران کے درمیان مذاکرات ہفتے کے آخر میں بھی جاری رہے، جہاں دونوں ممالک ایک دوسرے کے مؤقف کا جائزہ لے رہے ہیں۔

صدر ٹرمپ نے تہران کے ساتھ جوہری معاہدے کو ترجیح قرار دیا ہے، جب کہ ایران نے تجویز دی ہے کہ جنگ کے خاتمے اور خلیجی جہاز رانی پر عائد پابندیوں کے خاتمے تک جوہری معاملات کو مؤخر کر دیا جائے۔ دوسری جانب اوپیک پلس نے اتوار کو اعلان کیا کہ وہ جون میں سات رکن ممالک کے لیے یومیہ 1 لاکھ 88 ہزار بیرل تیل کی پیداوار میں اضافہ کرے گا، جو مسلسل تیسرا ماہانہ اضافہ ہے۔ تاہم ماہرین کا کہنا ہے کہ ایران سے متعلق جاری کشیدگی اور آبنائے ہرمز میں رکاوٹوں کے باعث اس اضافے کے عملی اثرات محدود رہ سکتے ہیں۔

یو این آئی۔ ع ا۔

واشنگٹن، امریکی صدرٹرمپ نے آبنائے ہرمز کھولنے کا اعلان کردیا ان کا کہنا ہے کہ پروجیکٹ فریڈم” پیر سے شروع ہوگا۔

امریکی صدر ٹرمپ نے غیر جانبدار ممالک کے بحری جہازوں کو گزارنے کے لیے آبنائے ہرمز میں مدد فراہم کرنے کا اعلان کردیا۔ سماجی رابطے کی ویب سائٹ ٹروتھ سوشل پر اپنے جاری پیغام میں ان کا کہنا ہے کہ آبنائے ہرمز میں پھنسے غیر جانبدار ممالک کے جہازوں کو محفوظ راستہ فراہم کرنے کے لیے امریکہ ایک خصوصی انسانی ہمدردی پر مبنی آپریشن شروع کر رہا ہے، جسے “پروجیکٹ فریڈم” کا نام دیا گیا ہے۔

انہوں نے اپنی پیغام میں لکھا کہ جن ممالک کا تنازع سے کوئی تعلق نہیں انہوں نے ہم سے مدد مانگی ہے، غیر جانبدار ممالک کے جہازوں کو محفوظ راستہ فراہم کریں گے تاکہ وہ کاروبار کرسکیں۔

امریکی صدر نے بتایا کہ پروجیکٹ فریڈم پیر کی صبح مشرقِ وسطیٰ وقت کے مطابق شروع ہوگا، بحری جہازوں اور عملے کو آبنائے ہرمز سے بحفاظت نکالنے کی پوری کوشش کریں گے، ان کا کہنا ہے کہ محفوظ نیوی گیشن ہونے تک ہم ان ممالک کی پوری طرح مدد کرتے رہیں گے۔

غیرجانبدار ممالک نے ہم سے کہا کہ وہ آبنائے ہرمز میں پھنس گئے ہیں، وہاں پھنسنے والے متعدد ممالک بےقصور اور معصوم ہیں، ایسے غیرجانبدار ممالک کے جہاز بھی پھنسے ہیں جو ایران، مشرق وسطیٰ اور ہمارے لیے بھی اچھے ہیں۔

الجزیرہ کی رپورٹ کے مطابق ان کا کہنا ہے کہ میرے نمائندے ایران کے ساتھ بہت مثبت بات چیت کر رہے ہیں ایران سے ہماری بات چیت سب کے لیے مثبت ہوسکتی ہے۔ انہوں نے بتایا کہ آبنائے ہرمز میں پھنسے بہت سے بحری جہازوں میں خوراک کی کمی ہے، اگر کسی نے مداخلت کرنے کی کوشش کی تو اس سے سختی سے نمٹا جائے گا۔

یو این آئی۔ ع ا۔

نیروبی، کینیا میں سیلاب اور لینڈ سلائیڈنگ نے تباہی مچادی، جس کے نتیجے میں 18 افراد ہلاک ہوگئے۔

عرب خبر رساں ادارے کی رپورٹ کے مطابق کینیا میں شدید بارشوں کے سبب مختلف علاقوں میں سیلابی صورتحال پیدا ہوگئی ہے، سیلاب اور لینڈ سلائیڈنگ کے باعث ہلاکتیں رپورٹ ہوئیں۔

رپورٹس کے مطابق متعدد علاقوں میں لینڈسلائیڈنگ، گھروں اور انفرااسٹرکچر کو نقصان پہنچا ہے، دریاؤں میں پانی کی سطح بلند ہوگئی ہے جبکہ نشیبی علاقوں کے مکینوں کو نقل مکانی کی ہدایت کی گئی ہے۔

رِفٹ ویلی سمیت کئی علاقوں میں مٹی کے تودے گرنے کے واقعات رپورٹ ہوئے ہیں جبکہ کینیا میں مارچ سے جاری بارشوں نے پہلے ہی 100 سے زائد جانیں لے لی ہیں۔ کینیا میں سیلاب کی تباہ کاریاں، ہلاکتوں کی تعداد 108 ہو گئی ماہرین کا کہنا ہے کہ موسمیاتی تبدیلی کے باعث بارشوں کی شدت میں اضافہ ہوا ہے۔

یو این آئی۔ ع ا۔