تہران، ایرانی چیف جسٹس غلام حسین محسنی نے کہا ہے کہ امریکہ سے بات چیت برابری کی بنیاد پر ہونی چاہیے۔

غیر ملکی ذرائع ابلاغ کے مطابق ایرانی چیف جسٹس غلام حسین محسنی کا اپنے بیان میں کہنا تھا کہ امریکہ سے مذاکرات کے لیے تیار ہیں، دھمکیاں اور فیصلے مسلط کرنا کسی صورت برداشت نہیں کیا جائے گا۔ ایرانی چیف جسٹس کا کہنا تھا کہ بات چیت برابری کی بنیاد پر ہونی چاہیے، ایران اپنی قومی خودمختاری پر کوئی سمجھوتہ نہیں کرے گا۔

دوسری جانب ایران کے وزیرخارجہ عباس عراقچی نے مختلف ممالک کے وزرائے خارجہ کو جنگ کے خاتمے سے متعلق ایران کے موقف اور اقدامات سے آگاہ کردیا۔

یو این آئی۔ ع ا۔

تہران، ایرانی عسکری قیادت نے سخت وارننگ دیتے ہوئے کہا کہ امریکہ نے نئی جارحیت کی تو جواب فوری اور دردناک ہوگا، ہمارے حملوں میں اپنے فوجی اڈوں کا انجام دیکھ لیا۔

تفصیلات کے مطابق ایران کی پاسدارانِ انقلاب ایرواسپیس فورس کے کمانڈر ماجد موسوی اور سپریم لیڈر کے مشیر محسن رضائی نے امریکہ کو خبردار کیا ہے کہ ایران کے خلاف کسی بھی قسم کی نئی مہم جوئی یا جنگ کا آغاز واشنگٹن کے لیے تباہ کن ثابت ہوگا۔ پاسدارانِ انقلاب کے کمانڈر ماجد موسوی نے سخت لہجے میں کہا کہ امریکہ نے ہمارے حملوں میں اپنے فوجی اڈوں کا انجام دیکھ لیا ہے، اب اگر دوبارہ غلطی کی تو وہ اپنے طیارہ بردار جہازوں کی قسمت بھی دیکھ لیں گے۔ انہوں نے واضح کیا کہ کسی بھی جارحیت کی صورت میں ایران کا جواب فوری، بھرپور اور دردناک ہوگا۔ ایرانی سپریم لیڈر کے مشیر محسن رضائی نے ممکنہ جنگ کے خدوخال پر بات کرتے ہوئے کہا کہ اگر جنگ دوبارہ چھڑی تو اس کا مرکز اصفہان کے قریب اور ملک کا مغربی حصہ ہوگا۔

انہوں نے خدشہ ظاہر کیا کہ دشمن تہران میں بم دھماکے اور قتل و غارت کی بزدلانہ کارروائیاں کر سکتا ہے، تاہم زمینی حملے کی صورت میں ایرانی افواج دشمن کے فوجیوں کی بڑی تعداد کو قیدی بنانے کے لیے مکمل تیار ہیں۔ محسن رضائی نے مزید خبردار کیا کہ اگر ایران کی ناکہ بندی جاری رہی تو اس کا بھرپور جواب دیا جائے گا، امریکہ کو یہ سمجھ لینا چاہیے کہ اب جنگ شروع کرنا اس کے لیے کسی بھی طرح سود مند نہیں بلکہ سراسر تباہی کا باعث ہوگا۔

یو این آئی۔ ع ا۔

تہران، ایران کے وزیرخارجہ عباس عراقچی نے مختلف ممالک کے وزرائے خارجہ کو جنگ کے خاتمے سے متعلق ایران کے موقف اور اقدامات سے آگاہ کردیا۔

تفصیلات کے مطابق ایران کے وزیر خارجہ عباس عراقچی نے مشرقِ وسطیٰ کی کشیدہ صورت حال اور جاری جنگ کے خاتمے کے لیے سفارتی کوششیں تیز کردی۔ ایرانی سرکاری خبر رساں ادارے ‘ارنا’ کی جانب سے بتایا کہ ایرانی وزیر خارجہ نے روس، سعودی عرب، مصر، ترکیہ، قطر، عراق اور آذربائیجان کے وزرائے خارجہ سے ٹیلی فونک رابطے کیے ہیں۔ رابطوں کے دوران عباس عراقچی نے خطے کی مجموعی صورتحال سمیت اہم امور پر تفصیلی تبادلہ خیال کیا۔ انہوں نے اپنے ہم منصبوں کو جنگ بندی اور تنازعات کے خاتمے سے متعلق ایران کے اصولی موقف اور تہران کی جانب سے اٹھائے گئے اقدامات سے آگاہ کیا۔

روسی وزیر خارجہ سرگئی لاروف نے عباس عراقچی سے گفتگو کرتے ہوئے کہا کہ روس خطے میں قیامِ امن اور جنگ کے خاتمے کے لیے ہر ممکن مدد فراہم کرنے کے لیے تیار ہے۔ دونوں رہنماؤں نے اس بات پر اتفاق کیا کہ خطے میں استحکام لانے کے لیے مشترکہ کوششیں ناگزیر ہیں۔ علاوہ ازیں، ایرانی وزیر خارجہ نے یورپی یونین کے خارجہ امور اور سلامتی پالیسی کی اعلیٰ نمائندہ کاجا کالس سے بھی رابطہ کیا، اس گفتگو میں علاقائی سلامتی اور بین الاقوامی تعاون کے ذریعے بحران کے حل پر بات چیت کی گئی۔

ان سفارتی رابطوں کا مقصد علاقائی طاقتوں کو اعتماد میں لینا اور جنگ کے پھیلاؤ کو روکنے کے لیے ایک مشترکہ لائحہ عمل تیار کرنا ہے۔

یو این آئی۔ ع ا۔