واشنگٹن، امریکی صدر ڈونلڈ ٹرمپ نے کہا ہے کہ ایران سے مذاکرات ناکام ہوئے تو بھرپور فوجی کارروائی کریں گے۔

امریکی ویب سائٹ ایگزیوس سے گفتگو کرتے ہوئے صدر ٹرمپ نے کہا کہ حملے روک کر سفارتکاری کو ایک اور موقع دیا ہے لیکن وقت بہت کم ہے، مذاکرات تیزی سےکامیاب ہوں گے یا پھر کوئی معاہدہ نہیں ہو گا۔انہوں نے کہا کہ ثالث ملکوں کی درخواست پر کارروائی مؤخر کی ہے ایران معاہدہ کرنا چاہتا ہے۔ ان کا کہنا تھا کہ اسرائیلی وزیراعظم سے کل ملاقات میں ایران سے متعلق حکمت عملی پر بات ہو گی۔

قبل ازیں امریکی صدر ڈونلڈ ٹرمپ نے ایران کے ساتھ جاری شدید کشیدگی کے تناظر میں سوشل میڈیا پلیٹ فارم “ٹروتھ سوشل” پر مصنوعی ذہانت کی مدد سے تیار کردہ اپنی کئی منفرد اور جارحانہ تصاویر شیئر کر دیں۔

سائنس فکشن فلموں کے پوسٹرز کے انداز میں بنائی گئی ان تصاویر میں ایران کے خلاف ممکنہ فوجی کارروائیوں اور امریکی طاقت کا فرضی مظاہرہ کیا گیا ہے۔

ایک تصویر میں صدر ٹرمپ کو مشہورِ زمانہ سائنس فکشن سیریز ‘اسٹار ٹریک’ کے طرز پر ایک خلائی کمانڈر کے روپ میں دکھایا گیا ہے۔

جبکہ ایک اور تصویر میں وہ ایک امریکی اسٹیلتھ بمبار طیارے کے پس منظر میں کھڑے ہیں، جس پر “دنیا کا محافظ” لکھا ہوا ہے اور اس کے نیچے ایران کے جلتے ہوئے اہداف دیکھے جا سکتے ہیں۔

ایک تصویر میں ایران سے منسوب ایک بڑے آئل ٹینکر کو آگ کے شعلوں کی لپیٹ میں دکھایا گیا ہے، جبکہ ایک اور ہائی لائٹڈ تصویر میں صدر ٹرمپ خود امریکی پرچم کے ساتھ ایک ضبط کیے گئے ایرانی آئل ٹینکر پر کھڑے دکھائی دے رہے ہیں، جس پر کیپشن درج ہے: ’’اب یہ ہمارا آئل ٹینکر ہے‘‘۔

ایک اور شیئر کی گئی تصویر میں امریکی لڑاکا طیاروں کو ایران کے اہم ترین “خارگ آئل برآمدی ٹرمینل” اور ساحلی آئل ریفائنری کی تنصیبات پر شدید بمباری کرتے ہوئے دکھایا گیا ہے۔

کچھ تصاویر میں صدر ٹرمپ کو امریکی جنگی بحری جہازوں کے ایک عظیم الشان بیڑے کی قیادت کرتے ہوئے بھی فلمایا گیا ہے۔

یو این آئی۔ ع ا۔

تہران، ایران کے نائب وزیرخارجہ کاظم غریب آبادی نے کہا ہے کہ تہران نے ثالثوں کے ذریعے کیے جانے والے مذاکرات میں امریکی تجاویز مسترد کردی ہیں۔

اپنے بیان میں کاظم غریب آبادی نے بتایا کہ ایران نے یہ اقدام امریکہ کے بے جا مطالبات کے سبب کیا ہے۔

ایران کے نائب وزیرخارجہ نے انکشاف کیا ہے کہ بات چیت اسلام آباد میں شروع ہوئی تھی، امریکہ نے ایسا منصوبہ پیش کیا جس میں بے جا مطالبات تھے جس پر ایرانی وفد نے منصوبہ واضح طور پر مستردکردیا۔

غریب آبادی نے کہا کہ امریکہ نے اعلان کیا تھا کہ اگر یہ منصوبہ مستردکردیا گیا تو مذاکرات کو ناکام سمجھا جائے گا اور امریکی وفد واپس چلا جائے گا، بات چیت کے آخر میں ہوا بھی یہی اور امریکی وفد بات چیت چھوڑ کر چلا گیا۔

غریب آبادی نے بتایا کہ ایرانی وفد نے نہ تو اس بات پر زور دیا اور نہ ہی درخواست کی کہ مذاکرات کا سلسلہ جاری رکھا جائے اور یہ نقطہ نظر اس بات کی مثال ہے کہ ایران باوقار انداز سے سفارتکاری کررہا ہے۔

ایران کے نائب وزیرخارجہ نے آبنائے ہرمز کی صورتحال پر بھی بات کرتے ہوئے کہا کہ ایران کی جانب سے آبنائے ہرمز دوبارہ بند کیے جانے کے بعد عمان میں بھی بات چیت ہوئی۔ عمانی وفد نے زور دیا کہ جہازوں کی آمدورفت کیلئے کھولا گیا جنوبی راستہ اس وقت تک کھلا رکھا جائے جب تک کہ ایران اور عمان کے درمیان کسی نتیجے پر پہنچتے ہیں اور بعد میں یہ راستہ بند کردیا جائے مگر ایران نے اس تجویز کو قبول نہیں کیا۔

غریب آبادی نے کہا کہ ایران نے واضح کیا کہ بات چیت کا نتیجہ خواہ کچھ بھی ہو، جنگ کے آغاز ہی سے ایران کی اصولی پالیسی واضح ہے اور وہ یہ کہ ایسی تجاویز قبول نہیں کی جائیں گی۔ انہوں نے کہا کہ آبنائے ہرمز کو بند رکھنےکی پالیسی برقرار ہے اور یہ بھی ایران کی باوقار سفارتکاری کی دوسری مثال ہے۔

یو این آئی۔ ع ا۔

لندن، عالمی منڈی میں خام تیل کی قیمتیں بڑی گراوٹ کے بعد ایک ہفتے کی کم ترین سطح پر آگئیں، 2 دن میں 14 فیصد کمی ریکارڈ کی گئی۔

تفصیلات کے مطابق امریکہ اور ایران کے درمیان کشیدگی میں کمی اور ایک دوسرے پر حملے بند ہونے کے بعد عالمی منڈی میں خام تیل کی قیمتوں میں غیر معمولی کمی دیکھی گئی۔

گزشتہ دو دنوں کے دوران بین الاقوامی مارکیٹ میں خام تیل کی قیمتیں 14 فیصد تک گر گئی ہیں، جس کے بعد قیمتیں ایک ہفتے سے زائد عرصے کی کم ترین سطح پر آگئی۔

عالمی منڈی میں کاروباری ہفتے کے آغاز پر برینٹ اور امریکی خام تیل دونوں کی قیمتوں میں نمایاں کمی ریکارڈ کی گئی۔

برینٹ خام تیل کی قیمت 1.57 فیصد کمی کے بعد 86.55 ڈالر فی بیرل پر آگئی، گذشتہ ہفتے کے اختتام پر برینٹ خام تیل 88.36 ڈالر پر بند ہوا تھا، جو 17 جولائی کے بعد اس کی کم ترین سطح تھی۔

امریکی خام تیل کی قیمت میں بھی 1.20 فیصد کی مزید کمی ہوئی اور یہ 81.05 ڈالر فی بیرل پر آ گیا ہے۔ اس سے قبل یہ 6.70 ڈالر کی کمی کے بعد 82.61 ڈالر پر بند ہوا تھا۔

ماہرین کا کہنا ہے کہ مشرقِ وسطیٰ میں امن و امان کی صورتحال اور امریکا و ایران کے درمیان کشیدگی میں کمی اس گراوٹ کی بنیادی وجہ ہے اور اگر خطے میں کشیدگی مزید کم ہوتی ہے، تو آنے والے دنوں میں خام تیل کی قیمتوں پر مزید دباؤ آ سکتا ہے۔تاہم، ماہرین نے خبردار کیا شرقِ وسطیٰ کی صورتحال اب بھی غیر یقینی ہے اور کسی بھی نئی جغرافیائی سیاسی تبدیلی کی صورت میں قیمتیں دوبارہ اوپر جا سکتی ہیں۔

یو این آئی۔ ع ا۔