خبراردو:
تحریکحریت چیرمین محمد اشرف صحرائی نے ریاست اور بیرون ریاست جموں کشمیر کے مظلوم قیدیوں کی حالت زار پر اپنی گہری تشویش اور فکرمندی کا اظہار کرتے ہوئے کہا کہ ان قیدیوں کو سیاسی اختلافات کی بنیاد پر فرضی الزامات کے تحت گرفتار کرلیا گیا ہے اور ان کی نظربندیوں کو انتقام گیرانہ پالیسی اور کالے قوانین کے تحت طول دیا جارہا ہے۔ انہوں نے جموں کی جیلوں میں نظربند کشمیری قیدیوں کو بھارت کی دیگر ریاستوں میں منتقل کرنے پر بھی شدید غم وغصہ کا اظہار کرتے ہوئے کہا کہ دہلی کے حکمران بدلے کی آگ میں اس قدر جھلس گئے ہیں کہ وہ انتقام گیرانہ پالیسی کے تحت مظلوم قیدیوں کی زندگیوں کے ساتھ کھلواڑ کرنے کے مرتکب ہورہے ہیں۔انہوں نے اس بات پر افسوس کا اظہار کیا کہ سول اور پولیس انتظامیہ جموں کشمیر کے آزادی پسند قائدین، کارکنان ا ور عام نوجوانوں کو بغیر کسی جواز ایڈمنسٹریٹیو ڈٹنشن کے تحت گرفتار کرکے بغیر کسی ٹرائیل کے برسوں نظربند رکھتی ہے اور اس غیر قانونی ، غیر انسانی اور غیر جمہوری طرزعمل کو نام نہاد امن قائم کرنے کے نام پر روبہ عمل لایا جاتا ہے۔

انہوں نے کہا کہ جموں کشمیر کے نظربند افراد سیاسی قیدی ہیں اور ان کے ساتھ بین الاقوامی قوانین کے وضع کردہ ضابطے اور اصولوں کے تحت ہی پیش آنا چاہیے۔ اگرچہ بھارت نے جنیوا کنونشن معاہدہ پر دستخط بھی کئے ہیں، لیکن وہ ان تمام بین الاقوامی وضع کردہ قوانین سے انحراف کرکے اس کی کھلم کھلا خلاف ورزی کا مرتکب ہورہا ہے۔ صحرائی نے کہا کہ بھارت کے حکمران جموں کشمیر میں کالے قوانین پبلک سیفٹی ایکٹ اور افسپا دیگر جابرانہ ہتھکنڈے استعمال کرکے یہاں کی سیاسی آواز کو دبانا چاہتے ہیں تاکہ یہاں کے عوام اپنے بنیادی حق سے دستبردار ہوجائیں۔

انہوں نے کہا کہ ہم بھارت کے حکمرانوں کو یہ واضح کرنا چاہتے ہیں کہ ظلم، جبر، بربریت اور اندھے طاقت کے استعمال سے جموں کشمیر کے عوام کے جذبۂ آزادی کو کسی بھی طور ختم نہیں کیا جاسکتا ہے اور نا آئندہ ایسا کبھی ممکن ہے۔ تحریک حریت چیرمین نے جموں کشمیر کے ریاست اور ریاست کی باہری جیلوں میں تمام سیاسی نظربندوں کی فوری رہائی پر زور دیتے ہوئے بین الاقوامی برادری سے اپیل کی کہ وہ جموں کشمیر کے مظلوم قیدیوں کی حالت زار اور ان کے ساتھ روا رکھے جارہے غیر انسانی، غیر اخلاقی اور غیرقانونی سلوک کا سنجیدہ نوٹس لے کر جموں کشمیر کے مسئلے کو یہاں کے عوام کی خواہشات کے مطابق حل اور امن کا ماحول پیدا کرانے میں اپنا رول ادا کریں، کیونکہ ناانصافی اور ظلم کی بنیاد پر کبھی امن قائم نہیں کیا جاسکتا ہے۔