واشنگٹن/ریاض، امریکہ اور سعودی عرب نے عراق میں ایرانی پراکیسز کے ٹھکانوں پر حملے کیے ہیں، امریکی سینٹرل کمانڈ اور سعودی وزارت دفاع نے حملوں کی تصدیق کر دی۔

امریکی سینٹرل کمانڈ کا کہنا ہے کہ حملے ایران سے وابستہ دہشت گرد گروہوں کے خلاف کیے گئے ہیں، عراق میں دہشت گرد گروہوں کو پاسداران نے ہدایت دی تھی، جس پر گزشتہ 72 گھنٹوں میں عراق سے 30 سے زائد ڈرون حملے کیے گئے تھے۔

سینٹ کام نے کہا یہ گروہ امریکی فورسز اور سعودی توانائی ڈھانچے پر حملوں کی تیاری کر رہے تھے، مشترکہ حملے میں عراق بھر میں دہشت گردوں کے لاجسٹکس اور ہتھیاروں کے ٹھکانوں کو نشانہ بنایا گیا۔

ترجمان سعودی وزارت دفاع نے کہا کہ سعودی مسلح افواج نے امریکی سینٹرل کمانڈ کے ساتھ مل کرعراق میں کارروائی کی ہے، کیوں کہ عراق سے ایرانی حامی دہشت گرد گروہوں نے سعودی پیٹرولیم تنصیبات پر حملے کی کوشش کی تھی۔

میجر جنرل ترکی المالکی نے کہا یہ کارروائی مملکت کے دفاع اور تحفظ کے جائز حق کی توثیق کرتی ہے، ہم کشیدگی میں اضافے کی خواہاں نہیں لیکن جارحیت کا بھرپور جواب دیں گے۔

سعودی عرب کی وزارتِ خارجہ کا کہنا ہے کہ عراق میں ’’مخصوص اہداف‘‘ پر امریکا اور سعودی عرب کے حملے ’’بین الاقوامی قانون کے تحت حاصل حقِ دفاعِ ذات‘‘ کی بنیاد پر کیے گئے۔

سرکاری خبر رساں ایجنسی ایس پی اے کے ذریعے جاری کیے گئے ایک بیان میں وزارت نے کہا کہ یہ حملے ایران کی حمایت یافتہ عراقی ملیشیاؤں کی جانب سے ڈرون حملوں کے جواب میں کیے گئے، جن کا نشانہ مملکت کی تیل کی تنصیبات تھیں۔

یو این آئی۔ ع ا۔

واشنگٹن، فاکس نیوز نے رپورٹ کیا ہے کہ امریکہ ایران مفاہمتی یادداشت کی بحالی کے قریب پہنچ گئے ہیں۔

رپورٹ کے مطابق مشرقِ وسطیٰ میں جاری تنازع کے ثالثوں کا خیال ہے کہ امریکہ اور ایران ایک ایسے معاہدے کے قریب پہنچ چکے ہیں جو ناکام ثابت ہونے والی مفاہمتی یادداشت (ایم او یو) کو دوبارہ نافذ کرے گا۔ یہ بات دی ٹائمز آف اسرائیل نے اپنی ایک رپورٹ میں کہی ہے۔

رپورٹ میں ایک عرب عہدے دار اور مذاکرات سے باخبر ایک اور ذریعے کے حوالے سے بتایا گیا ہے کہ پاکستان، مصر اور قطر کے مذاکرات کار اس بات کی وضاحت پر کام کر رہے ہیں کہ آبنائے ہرمز میں آمدورفت کا نظام کس طرح چلایا جائے گا، مذاکرات کار ہرمز کے انتظامی طریقہ کار پر اختلافات دور کرنے میں مصروف ہیں۔

رپورٹ میں کہا گیا ہے کہ ایران کا خیال تھا کہ جون میں دستخط کی گئی ایم او یو، جس کے نتیجے میں مختصر مدت کی جنگ بندی ہوئی تھی، اسے آبنائے ہرمز پر وسیع اختیارات دیتی ہے، تاہم امریکا اس تشریح سے اختلاف کرتا ہے۔

رپورٹ کے مطابق، آبنائے ہرمز کے کنارے واقع دونوں ممالک، ایران اور عمان، ثالثوں کی پیش کردہ تجویز سے اتفاق کر چکے ہیں۔ ذرائع کے مطابق صدر ڈونلڈ ٹرمپ کی منگل کو اسرائیلی وزیرِ اعظم بنیامین نیتن یاہو سے ملاقات کے بعد وائٹ ہاؤس اس معاملے پر حتمی فیصلہ کرے گا۔

ادھر صدر ڈونلڈ ٹرمپ کا کہنا ہے کہ ایران سے معاہدہ نہ ہوا تو مشن مکمل کریں گے، آبنائے ہرمز پر ہمارا مکمل کنٹرول ہے، ایران جانے والا ایک بھی جہاز امریکی ناکہ بندی عبور نہیں کر سکتا۔

انھوں نے کہا ایران بار بار اپنے مؤقف سے پیچھے ہٹ جاتا ہے، اب ایران کو معاہدوں کی خلاف ورزی نہیں کرنے دیں گے، ایران کی توانائی تنصیبات پر حملہ نہیں کرنا چاہتے۔

یو این آئی۔ ع ا۔

تہران، ایران کے وزیر خارجہ عباس عراقچی نے کہا ہے کہ یوکرین کے ہم منصب نے انھیں یقین دلایا ہے کہ ایرانی جہاز پر حملہ غیر ارادی تھا۔

عباس عراقچی نے کہا یوکرین کشیدگی نہیں چاہتا، ایران بھی کشیدگی نہیں چاہتا، لیکن ایرانی مفادات پر حملہ ناقابل قبول ہے، اور اس سے ہونے والے نقصانات کی تلافی ضروری ہے۔

دوسری طرف یوکرین کے وزیر خارجہ نے منگل کو کہا کہ انھوں نے ایک ایرانی جہاز پر مہلک حملے کے بعد ایران پر زور دیا ہے کہ وہ کشیدگی میں اضافہ کرنے سے گریز کرے۔

ایکس پر ایک پوسٹ میں آندری سیبیہا نے کہا کہ ان کی ایرانی وزیرِ خارجہ عباس عراقچی سے ’’کھل کر بات چیت‘‘ ہوئی، اور انھوں نے اس بات پر زور دیا کہ یوکرین کی فوجی کارروائیاں صرف ’’روسی جارحیت‘‘ کے خلاف اپنے ملک کے دفاع کے لیے ہیں۔

سیبیہا نے کہا ’’سفارت کاری کا تقاضا ہے کہ براہِ راست بات کی جائے، خواہ وہ کتنی ہی مشکل کیوں نہ ہو۔ میں نے اس بات پر زور دیا کہ ہمارا مقصد غیر ضروری کشیدگی سے بچنا ہے۔ میں نے ایک بار پھر واضح کیا کہ یوکرین کی تمام کارروائیاں صرف روسی جارحیت کے خلاف اپنے ملک کے دفاع کے لیے ہیں، اور ان کا مقصد کبھی بھی شہری جہازوں یا عام شہریوں کو نشانہ بنانا نہیں رہا۔‘‘

انھوں نے مزید کہا ’’یہ بات ایران کے ان بیانات پر بھی لاگو ہوتی ہے جن میں اس کے ایک شہری کی ہلاکت اور حالیہ واقعے میں نشانہ بنائے گئے ایک شہری جہاز کا ذکر کیا گیا ہے۔ ہمارا مقصد روسی جارحیت کا مقابلہ کرنا ہے، جو تمام واقعات کی بنیادی وجہ ہے، اور تمام اشتعال انگیزیوں اور جانی نقصان کی مکمل ذمہ داری روس پر عائد ہوتی ہے۔‘‘

یوکرینی وزیر خارجہ نے ایران پر یہ زور بھی دیا کہ وہ جوابی اقدامات سے گریز کرے اور یوکرین کے خلاف روس کی جنگ کے لیے ہر قسم کی معاونت ختم کرے۔

یو این آئی۔ ع ا۔