اسلام آباد، امریکی میڈیا نے رپورٹ کیا ہے کہ امریکہ ایران مذاکرات کا اگلا دور پیر کو پاکستان میں ہونے کا امکان ہے۔

پاکستان کی ثالثی میں امریکہ ایران مذاکرات سے متعلق اہم پیش رفت ہوئی ہے، سی این این نے مذاکرات کے نئے دور سے متعلق ایرانی ذرائع کے حوالے سے بتایا کہ وفود پیر کے روز مذاکرات کرنے جا رہے ہیں، تاہم امریکہ نے ابھی تک اس بات کی تصدیق نہیں کی کہ کوئی مذاکرات طے ہیں۔

وال اسٹریٹ جرنل نے بھی رپورٹ کیا ہے کہ تہران اور واشنگٹن میں مذاکرات پیر کو اسلام آباد میں ہونے کا امکان ہے، ٹرمپ انتظامیہ کے ایک اہلکار نے بتایا کہ ایران کے ساتھ مذاکرات پیر کو پاکستان میں ہونے کا امکان ہے۔ سی بی ایس نیوز کا کہنا ہے کہ ٹرمپ انتظامیہ ایران کے ساتھ مذاکرات کی بحالی کے لیے اعلیٰ امریکی حکام کو دوبارہ پاکستان بھیجنے پر غور کر رہی ہے، یہ مذاکرات پیر سے دوبارہ شروع ہو سکتے ہیں۔ مذاکرات کے دوسرے دور کی طرف اشارہ کرتے ہوئے ٹرمپ نے کہا تھا کہ ایران ”ہر بات پر متفق ہو چکا ہے”، جس میں یہ بھی شامل ہے کہ افزودہ یورینیم کو مشترکہ طور پر ملک سے نکال کر امریکہ منتقل کیا جائے۔ تاہم ایک سینئر ایرانی اہلکار نے سی این این کو بتایا کہ ٹرمپ کے بعض دعوے ”متبادل حقائق” (یعنی غلط یا مسخ شدہ بیانیہ) ہیں۔

اس اہلکار نے اس بات کی بھی تردید کی کہ تہران اپنا افزودہ یورینیم بیرونِ ملک بھیجے گا یا افزودگی کو غیر معینہ مدت کے لیے روک دے گا اور خبردار کیا کہ اس طرح کے عوامی بیانات جاری سفارت کاری کو مشکل بنا سکتے ہیں۔ پاکستان کی قیادت میں جاری ثالثی عمل سے واقف ایرانی اہلکار نے مزید کہا کہ ٹرمپ کی عوامی شیخی مذاکرات کے ناکام ہونے کا سبب بن سکتی ہے۔

ایران یہ سمجھ سکتا ہے کہ جہاں وہ ”نتیجہ خیز سفارت کاری کے لیے پرعزم ہے”، وہاں امریکہ سفارتکاری کو محض وقت ضائع کرنے یا تھکا دینے کے لیے استعمال کر رہا ہے اور ممکنہ طور پر ایک نئی جارحیت کی منصوبہ بندی کر رہا ہے، جس کا ایران بھرپور اور سخت جواب دینے کے لیے تیار ہے۔

ادھر اس نازک جنگ بندی کے تناظر میں امریکی صدر نے کہا ہے کہ اگر مذاکرات ناکام ہو گئے تو وہ ایران کے ساتھ جنگ بندی میں توسیع نہیں کریں گے۔ انھوں نے یہ بھی خبردار کیا کہ اگر ایران کے جوہری مواد کو پرامن طریقے سے منتقل کرنے کا کوئی معاہدہ نہ ہوا تو امریکہ اسے ”زیادہ سخت اور غیر دوستانہ طریقے” سے حاصل کر لے گا۔

واضح رہے کہ آبنائے ہرمز کھلنے پر بھی جمعہ کے روز اس اہم آبی راستے سے صرف چند ہی جہاز گزرے، حالاں کہ ایران کے وزیر خارجہ نے کہا تھا کہ یہ تجارتی جہازوں کے لیے کھلا ہے۔ ایران کی پارلیمنٹ کے اسپیکر نے کہا ہے کہ اگر امریکہ اپنی بحری ناکہ بندی ختم نہ کرے تو آبنائے ہرمز دوبارہ بند کر دی جائے گی۔

یو این آئی۔ ع ا۔

اسلام آباد، پاکستان کے فیلڈ مارشل عاصم منیر اور ایرانی وزیر خارجہ عباس عراقچی کے درمیان مذاکرات کا پہلا دور مکمل ہو گیا ہے، دونوں رہنماؤں کے درمیان تفصیلی بات چیت آج دوبارہ ہوگی۔

ایران کے ایٹمی پروگرام سے متعلق بریک تھرو کا امکان ہے، الجزیرہ ٹی وی کے مطابق پاکستانی وفد ایران حکام سے ایٹمی پروگرام پر بات کر رہا ہے، فیلڈ مارشل کی قیادت میں پاکستان کا وفد ایران میں موجود ہے۔ پاکستان نے خطے میں امن کے لیے کوششیں تیز کر دی ہیں، وزیر اعظم شہباز شریف سعودی عرب اور فیلڈ مارشل تہران میں موجود ہیں، پاکستان کا اعلیٰ سطح وفد فیلڈ مارشل سید عاصم منیر کی قیادت میں گزشتہ رات تہران پہنچا۔

ایرانی وزیر خارجہ عباس عراقچی نے ایئرپورٹ پر گرم جوش استقبال کیا، اعلیٰ سطح پاکستانی وفد میں وزیر داخلہ محسن نقوی بھی شامل ہیں، آئی ایس پی آر کا کہنا ہے فیلڈ مارشل کا دورہ امریکہ اور ایران کے درمیان ثالثی کی کوششوں کا حصہ ہے۔ فریقین کو پھر مذاکرات کی میز پر لانے کی کوششیں بھی جاری ہیں، ایران امریکہ مذاکرات کا اگلا دور بھی اسلام آباد میں متوقع ہے۔

ایرانی وزیر خارجہ کہتے ہیں فیلڈ مارشل سید عاصم منیر کو ایران میں خوش آمدید کہنے پر خوشی ہوئی، پاکستان کی شان دار میزبانی گہرے اور عظیم دو طرفہ تعلقات کی عکاسی ہے، خطے میں امن واستحکام کے فروغ کے لیے ہمارا عزم مضبوط اور مشترکہ ہے۔

ایرانی وزارت خارجہ کے ترجمان اسماعیل بقائی نے کہا کہ پاکستانی وفد کا دورہ ’اسلام آباد مذاکرات‘ کا تسلسل ہے، پاکستان تنہا ثالثی کا کردار ادا کر رہا ہے، اسلام آباد مذاکرات کے بعد سے پیغامات کا تبادلہ جاری ہے، ایران اور امریکا میں پاکستان کے ذریعے پیغامات کا تبادلہ ہو رہا ہے، اب مذاکرات مکمل جنگ بندی کے لیےہوں گے۔ انھوں نے کہا مذاکرات میں ایران سے پابندیاں ہٹانے پر بھی بات ہوگی، یورنیم افزودگی کی سطح پر بات کرنے کو تیار ہیں، ایران ایٹمی ہتھیار بنانے میں دل چسپی نہیں رکھتا، ایران آبنائے ہرمز کا پاسبان اور نگہبان ہے، خطے میں کسی بھی قسم کی مداخلت قبول نہیں، جنگ کے بعد پڑوسی ملکوں کی مدد سے آبنائے ہرمز کی سلامتی یقینی بنائیں گے اور ایران لبنان کی حمایت سے دست بردار نہیں ہوگا۔

ترجمان وائٹ ہاؤس کیرولائن لیوٹ نے پریس بریفنگ میں کہا کہ ایران کے ساتھ مذاکرات میں پاکستان واحد ثالث ہے، مذاکرات کا دوسرا دور بھی اسلام آباد میں ہونے کا امکان ہے، پاکستانی مذاکرات میں غیر معمولی ثالث ثابت ہوئے، صدر ٹرمپ مذاکرات میں پاکستان کا کردار جاری دیکھنا چاہتے ہیں اور یہی ہو رہا ہے۔ انھوں نے کہا ہم جنگ بندی سے متعلق پاکستان کی کوششوں کو سراہتے ہیں۔

یو این آئی۔ ع ا۔

اسلام آباد ،سعودی عرب نے پاکستان کیلئے 5 ارب ڈالر کے ڈیپازٹ میں توسیع کا اعلان کردیا، یہ رقم آئندہ ہفتے تک پاکستان کو منتقل ہونے کی توقع ہے۔

تفصیلات کے مطابق وفاقی وزیر خزانہ محمد اورنگزیب نے واشنگٹن میں پاکستانی سفارتخانے میں میڈیا بریفنگ کے دوران ملک کے لیے ایک بڑی معاشی خوشخبری سناتے ہوئے کہا ہے کہ برادر ملک سعودی عرب نے پاکستان کے زرمبادلہ کے ذخائر کو سہارا دینے کے لیے 3 ارب ڈالر کے اضافی ڈپازٹس فراہم کرنے کا اعلان کیا ہے، یہ رقم آئندہ ہفتے تک پاکستان کو منتقل ہونے کی توقع ہے۔

وزیر خزانہ نے سعودی عرب کی جانب سے پاکستان کی مالی مدد کے حوالے سے اہم تفصیلات بتاتے ہوئے کہا 3 ارب ڈالر کے نئے ڈپازٹس پاکستان کے غیر ملکی زرِ مبادلہ کے ذخائر کو مستحکم کرنے میں مددگار ثابت ہوں گے۔ ان کا کہنا تھا کہ سعودی عرب نے پہلے سے موجود 5 ارب ڈالر کے ڈپازٹس کی مدت میں بھی توسیع کا اعلان کیا ہے، اب یہ رقم سالانہ رول اوور کے بجائے طویل مدت تک پاکستان کے پاس رہے گی۔

وزیر خزانہ نے سعودی ہم منصب محمد بن عبداللہ الجدعان سے ہونے والی ملاقات کو انتہائی سود مند قرار دیتے ہوئے کڑے وقت میں سعودی حمایت پر شکریہ ادا کیا۔ محمد اورنگزیب نے پاکستان کی معاشی سمت کے حوالے سے واضح کیا کہ رواں مالی سال کے اختتام تک پاکستان کے زرمبادلہ کے ذخائر کو 18 ارب ڈالر تک لے جانے کا ہدف مقرر کیا گیا ہے۔

ان کا کہنا تھا کہ سعودی عرب کی جانب سے تین ارب ڈالر کے اضافی ڈپازٹس اگلے ہفتہ پاکستان کومل جائیں گے، بانڈز کی صورت میں بین الاقوامی سرمایہ کاروں کو کی جانے والی تمام ادائیگیاں وقت پر کی جائیں گی۔ وفاقی وزیر نے عالمی سرمایہ کاروں کو دعوت دی کہ پاکستان میں سرمایہ کاری کے بہترین مواقع موجود ہیں اور ملکی کردار کو اب عالمی سطح پر سراہا جا رہا ہے۔

وزیر خزانہ نے اس اہم سفارتی اور معاشی کامیابی کا کریڈٹ وزیراعظم شہباز شریف اور فیلڈ مارشل سید عاصم منیر کی انتھک کوششوں کو دیتے ہوئے نائب وزیراعظم اسحاق ڈار اور گورنر اسٹیٹ بینک جمیل احمد کے تعاون کو بھی سراہا۔

یو این آئی۔ ع ا۔