سرینگر، مرکزی وزیر برائے دیہی ترقی و زراعت شیوراج سنگھ چوہان نے منگل کے روز یہاں ‘پردھان منتری گرام سڑک یوجنا’ کے تحت 3566 کروڑ روپے کی لاگت والے منصوبوں کا منظوری نامہ وزیر اعلیٰ عمر عبداللہ کے حوالے کیا۔

اس موقع پر مرکزی وزیر نے ‘دین دیال انتودیہ یوجنا – قومی دیہی معاش مشن’ کے تحت 24 ریاستوں اور مرکز کے زیر انتظام علاقوں کی خواتین کے سیلف ہیلپ گروپس کے لیے 4568.23 کروڑ روپے سے زائد کی رقم بھی جاری کی۔ اس تقریب میں وزیر اعلیٰ عمر عبداللہ، نائب وزیر اعلیٰ سریندر کمار چوہدری اور دیگر اعلیٰ حکام موجود تھے۔

مسٹر چوہان نے خطاب کرتے ہوئے کہا کہ وزیر اعظم نریندر مودی کی قیادت میں مرکزی حکومت صرف سڑکیں بنانے کے لیے نہیں، بلکہ دلوں کو جوڑنے کے عزم کے ساتھ آئی ہے۔ انہوں نے کہا کہ جموں و کشمیر کی ترقی کے لیے “دل کے دروازے بھی کھلے ہیں اور دہلی کے دروازے بھی۔” انہوں نے مزید بتایا کہ ایک ہی سال میں ریاست کے لیے تقریباً 8,000 کروڑ روپے کی سڑکوں کی منظوری ایک تاریخی کامیابی ہے، جس کی مدد سے دور دراز کے گاؤوں کو ترقی کے مرکزی دھارے سے جوڑا جائے گا۔

خواتین کو بااختیار بنانے پر زور دیتے ہوئے انہوں نے کہا کہ اب ہدف صرف ‘لکھ پتی دیدی’ بنانا نہیں بلکہ انہیں کامیاب کاروباری بنانا ہے۔ زراعت کے حوالے سے انہوں نے اعلان کیا کہ انڈین کونسل آف ایگریکلچرل ریسرچ کے سائنسدانوں کی ایک ٹیم جلد جموں و کشمیر کا دورہ کرے گی تاکہ یہاں کی مٹی اور آب و ہوا کا مطالعہ کر کے کاشتکاری کو منافع بخش بنانے کا روڈ میپ تیار کیا جا سکے۔

وزیر اعلیٰ عمر عبداللہ نے مرکزی وزیر کا خیرمقدم کرتے ہوئے انہیں جموں و کشمیر کا “سچا دوست اور ہمدرد” قرار دیا۔ انہوں نے کہا کہ ایک ہی مرحلے میں 8,000 کروڑ روپے کے منصوبوں کی منظوری کوئی معمولی بات نہیں ہے اور ریاستی حکومت ان کاموں کو تیزی سے مکمل کرے گی۔ انہوں نے یقین دلایا کہ سڑکوں کے اس جال سے اسکولوں، اسپتالوں اور منڈیوں تک رسائی آسان ہوگی، جس سے دیہی معیشت اور باغبانی کے شعبے میں بڑی تبدیلی آئے گی۔

یواین آئی۔ م س

جموں، کٹھوعہ کی ڈسٹرکٹ جیل سے رہائی کے بعد عام آدمی پارٹی کے ایم ایل اے معراج ملک نے منگل کے روز کہا کہ اب وقت آگیا ہے کہ “مذہبی تقسیم” سے بالاتر ہو کر “انسانیت پر توجہ” دی جائے۔

جموں و کشمیر ہائی کورٹ کی جانب سے پبلک سیفٹی ایکٹ (پی ایس اے) کے تحت ان کی حراست کو کالعدم قرار دیے جانے کے بعد جیل سے باہر آتے ہوئےمسٹر ملک نے نامہ نگاروں سے بات چیت کی۔ انہوں نے کہا، “میری سیاسی جدوجہد جموں و کشمیر میں اصلاحات اور عوامی بہبود کے لیے ہے، یہ جاری رہے گی اور اس میں کوئی تبدیلی نہیں آئے گی۔ میں عوام کے مسائل اٹھاتا رہوں گا۔” انہوں نے مزید کہا کہ آج انصاف کی جیت ہوئی ہے اور وہ عدلیہ کے شکر گزار ہیں۔

عوام سے صبر و تحمل کی اپیل کرتے ہوئے عام آدمی پارٹی کے ایم ایل اے نے یقین دلایا کہ وہ اپنی ٹیم سے مشورے کے بعد جلد ہی عوامی رابطہ مہم دوبارہ شروع کریں گے۔ ہائی کورٹ آف جموں، کشمیر اور لداخ کے جسٹس محمد یوسف وانی نے حکام کو حکم دیا کہ “درخواست گزار کو ان کی احتیاطی حراست سے فوری رہا کیا جائے” اور گزشتہ سال 8 ستمبر کو ضلع مجسٹریٹ ڈوڈہ کی جانب سے جاری کردہ حراستی آرڈر کو منسوخ کر دیا۔

واضح رہے کہ عام آدمی پارٹی کے جموں و کشمیر یونٹ کے صدر معراج ملک کو مبینہ طور پر امنِ عامہ میں خلل ڈالنے کے الزام میں ستمبر میں پی ایس اے کے تحت حراست میں لیا گیا تھا اور کٹھوعہ جیل میں رکھا گیا تھا۔ انہوں نے 24 ستمبر کو ہائی کورٹ میں اپنی حراست کو چیلنج کرتے ہوئے عرضی داخل کی تھی جس پر عدالت نے 23 فروری کو اپنا فیصلہ محفوظ کر لیا تھا۔

دریں اثنا، سینکڑوں حامیوں، پارٹی رہنماؤں اور کارکنوں نے کٹھوعہ جیل کے باہر ان کا استقبال کیا اور انہیں جموں میں ان کی سرکاری رہائش گاہ تک لے گئے، جہاں انہوں نے خطاب کرتے ہوئے اس عزم کا اعادہ کیا کہ عوام کے لیے ان کی آواز کو کبھی دبایا نہیں جا سکے گا۔

یواین آئی۔ م س

جموں، جموں و کشمیر کے لیفٹیننٹ گورنر منوج سنہا نے پیر کے روز منشیات کے استعمال کے خلاف اجتماعی کارروائی کی زوردار اپیل کی اور اعلان کیا کہ منشیات کے خلاف اس جنگ میں “اتحاد ہماری ڈھال ہوگی اور عزم ہمارا ہتھیار”۔

ادھم پور میں منعقدہ ‘نشہ مکت جموں و کشمیر مہم’ کے دوران ایک بڑے عوامی اجتماع سے خطاب کرتے ہوئے انہوں نے شہریوں سے اپیل کی کہ وہ خطے کے نوجوانوں کی حفاظت، خاندانوں کو مضبوط بنانے اور نشے کی گرفت سے آزاد مستقبل کی تعمیر کے لیے متحد ہو جائیں۔ انہوں نے کہا کہ ’’آئیے ہم ایک ایسا جموں و کشمیر بنانے کا عزم کریں جہاں نوجوان اپنا آزاد مستقبل خود لکھیں، خاندان سلامت رہیں، معاشرہ ترقی کرے اور امیدیں پھر سے پروان چڑھیں۔ ہم اپنے نوجوانوں اور اپنے مستقبل کے لیے مضبوطی سے کھڑے ہیں۔‘‘ْ

انہوں نے مزید کہا کہ ’’نشے کی اس لعنت کے خلاف لڑائی تمام اختلافات سے بالا تر ہو کر یکجہتی کا مطالبہ کرتی ہے۔ جموں و کشمیر کے شہریوں کے طور پر، ہمیں اپنے نوجوانوں کو بچانے، خاندانوں کو طاقت دینے اور خوشحالی کو یقینی بنانے کے اپنے مشترکہ فرض کے لیے متحد ہونے کا عہد کرنا چاہیے۔”

ہزاروں مقامی باشندوں کے ساتھ پد یاترا میں شرکت کرتے ہوئے لیفٹیننٹ گورنر نے ہر شہری سے گزارش کی کہ وہ ‘نشہ مکت جموں و کشمیر مہم’ کو منشیات کے خلاف ایک مشترکہ جنگ کے طور پر دیکھیں۔ انہوں نے اس بات پر زور دیا کہ سب کو مل کر یہ لڑائی جیتنی ہوگی۔

ان کا کہنا تھا کہ ’’جموں و کشمیر ہمارے معاشرے کو کھوکھلا کرنے والے نشے کے خطرے کو جڑ سے اکھاڑ پھینکنے کے لیے نئی طاقت کے ساتھ کھڑا ہو رہا ہے۔ ہم اپنے نوجوانوں کو اس کی گرفت سے بچانے کی قسم کھاتے ہیں۔ میں عوام کو یقین دلاتا ہوں کہ ہماری سرزمین کے حوصلے پست نہیں ہونے دیے جائیں گے۔ یہ وقت معاشرے کے جاگنے، مقابلہ کرنے اور فتح حاصل کرنے کا ہے۔”

انہوں نے اس بات پر زور دیا کہ منشیات کے خلاف یہ لڑائی کوئی بھی اتھارٹی اکیلے نہیں لڑ سکتی اور یہ جذبہ ہر دل میں پیدا ہونا چاہیے۔ انہوں نے مزید کہا کہ ادھم پور کا ہر گاؤں، محلہ اور شہر مزاحمت کا قلعہ بن جائے۔ ہر گھر ایک چوکس محاذ کے طور پر کھڑا ہو۔ میں ہر رہائشی سے اس نیک کام میں ایک جنگجو کے طور پر شامل ہونے کی اپیل کرتا ہوں۔”

لیفٹیننٹ گورنر نے کہا کہ معاشرے کے ہر طبقے کو ‘نشہ مکت جموں و کشمیر مہم’ کے جذبے کو اپنانا چاہیے، تاکہ تاریخ میں یہ درج ہو سکے کہ 27 اپریل کو ادھم پور میں امید، اتحاد اور پختہ عزم کی شمع روشن کی گئی تھی۔ ہر خاندان کو اٹھ کھڑا ہونا چاہیے، یہ یقینی بناتے ہوئے کہ تاریخ ادھم پور کے متحد موقف، متحد لڑائی اور متحد جیت کو یاد رکھے جو کہ قوم کی تعمیر کے لیے وقف ایک منشیات سے پاک کل کی وراثت ہوگی۔

انہوں نے کہا کہ ’’آنے والے 83 دنوں میں، آئیے ہم معاشرے کے نظریے کو بدلیں اور نشے کے جال میں پھنسے لوگوں کے ساتھ متاثرین جیسا سلوک کریں، جو حقارت کے نہیں بلکہ ہمدردی کے مستحق ہیں۔ بحالی کے ذریعے ان کے وقار کو بحال کیا جانا چاہیے اور انہیں دوبارہ معاشرے کے مرکزی دھارے سے جوڑنا چاہیے۔ اجتماعی توانائی کو اس مہم کی طاقت بننے دیں۔ آگاہی کو جوابدہی میں بدلیں، عوامی شرکت کو بڑھائیں اور اس لڑائی کی قیادت میں خواتین اور نوجوانوں کا کلیدی کردار ہونا چاہیے۔”

لیفٹیننٹ گورنر نے مزید کہا کہ نشے کے خطرے کے خلاف یہ جنگ کئی مراحل میں چلے گی، جن میں سے ہر مرحلہ ہمت اور لگن کا تقاضا کرتا ہے۔ انہوں نے زور دیا کہ بیداری مہمات کے ذریعے خاندانوں کو منشیات کی لت کی علامات اور اس کے خطرات کے بارے میں تعلیم دی جانی چاہیے اور انہیں یہ یاد دلایا جانا چاہیے کہ یہ خطرہ دور نہیں بلکہ ہمارے درمیان ہی موجود ہے۔

اس موقع پر لیفٹیننٹ گورنر نے ‘نشہ مکت جموں و کشمیر مہم’ کے تحت ایک ‘اینٹی ڈرگ اویرنس بائیک ریلی’ کو ہری جھنڈی دکھا کر روانہ کیا اور ‘منی اولمپکس’ کا افتتاح کیا۔ انہوں نے منشیات کے زہر سے چھٹکارا پانے والے افراد کو ایکسپٹنس لیٹر بھی سونپے اور ‘نشہ مکت آئیڈیاز چیمپئن شپ’ کے فاتح کو اعزاز سے نوازا۔

یو این آئی۔ م ع