خبراردو:

ریاست جموں وکشمیر میں 7برس کے بعد منعقد ہوئے پنچایتی انتخابات کے پہلے مرحلے کے موقعے پر مشترکہ مزاحمتی قیادت کی جانب سے دی گئی ہڑتالی کال کے پیش نظر سنیچر کو سرینگر سمیت وادی کے سبھی اضلاع میں معمولات زندگی ٹھپ ہوکر رہ گئے جس دوران یہاں عوامی، تجارتی، کاروباری، تعلیمی و غیر سرکاری معمولات متاثر رہے۔ اطلاعات کے مطابق مشترکہ مزاحمتی قیادت بشمول سید علی گیلانی، میرواعظ عمر فاروق اور محمد یٰسین ملک کی طرف سے پنچایتی انتخابات کے پیش نظر عوام سے مکمل ہڑتال کی اپیل کے بیچ سنیچر کووادی کے سبھی اضلاع میں زندگی کی جملہ سرگرمیاں متاثر رہیں تاہم اس دوران کوئی ناخوشگوار واقعہ پیش نہیں آیا۔

ہڑتالی کال کے نتیجے میں شہر سرینگر کے تواریخی مرکز لعل چوک میں تمام قسم کی تجارتی سرگرمیاں ٹھپ ہوکر رہ گئیں جس کے نتیجے میں یہاں دن بھر الو بولتے ہوئے نظر آئے۔ انہوں نے بتایا کہ شہر کے لعل چوک، جہانگیر چوک، مہاراجہ بازار، گونی کھن، پولو ویو، ریذیڈنسی روڑ، ایم اے روڑ، ڈلگیٹ، بتہ مالو جیسے تجارتی مراکز ہڑتالی کال کے باعث بند رہے جس دوران یہاں زندگی کی سرگرمیاں ماند دکھائی دے رہی تھیں۔ انہوں نے بتایا شہر کے مضافاتی علاقوں میں بھی تمام قسم کی سرگرمیاں متاثر رہی جس دوران یہاں دن بھر سڑکوں پر الو بولتے ہوئے نظر آئے۔ ادھر ہڑتالی کال کے نتیجے میں سڑکوں سے ٹریفک کی نقل و حمل مکمل طور پر مسدود رہی تاہم چند ایک مقامات پر نجی گاڑیوں کو سڑکوں پر چلتے ہوئے دیکھا گیا۔

انہوں نے بتایا کہ شہر سرینگر کے حساس مقامات پر انتظامیہ نے کسی بھی امکانی گڑ بڑ سے نمٹنے کے لیے پولیس اور سی آر پی ایف کے اضافی دستوں کو تعینات کیا تھا جبکہ فورسز کی جانب سے شہر کے بیشتر مقامات پر رکاوٹیں کھڑی کی گئی تھیں جہاں راہ چلتے لوگوں اور گاڑیوں کی تلاشی عمل میں لائی جارہی تھی۔ انہوں نے بتایا کہ شہر سرینگر میں سنیچر کے روز دن بھر کئی مقامات پرموٹر سائیکل سواروں کو روک کر ان کے دستاویز چیک کئے جارہے تھے۔ ادھر ضلع بڈگام اور گاندربل میں بھی ہڑتالی کال کا اثر دکھائی دے رہا تھا جس دوران یہاں معمولات زندگی متاثر رہے جبکہ سڑکوں سے پبلک ٹراسپورٹ مکمل طور پر غائب رہا۔ مزاحتمی قیادت کی جانب سے دی گئی ہڑتالی کال کے نتیجے میں جنوبی کشمیر کے کولگام، اننت ناگ، شوپیان اور پلوامہ میں بھی زندگی کی جملہ سرگرمیاں ٹھپ رہیں جب کہ سڑکوں سے گاڑیوں کی آواجاہی بری طرح متاثر رہی۔ نمائندے کے مطابق ہڑتال کی وجہ سے یہاں تجارتی مراکز میں خاموشی چھائی رہی جبکہ عوام الناس نے بھی گھروں میں بیٹھنے کو روجیح دی۔ انہوں نے بتایا کہ جنوبی کشمیر کے پلوامہ، ترال، کولگام، شوپیان اور بجبہاڑہ سے تعلق رکھنے والے حساس مقامات پر انتطامیہ نے کسی بھی امکانی گڑ بڑ سے نمٹنے کے لیے پولیس اور سی آر پی ایف کی اضافی ٹکڑیوں کو تعینات کیا ہوا تھا تاہم اس دوران کسی ناخوشگوار واقعے کی کوئی اطلاع موصول نہیں ہوئی۔ شمالی کشمیر کے کپوارہ ، بانڈی پورہ اور بارہمولہ اضلاع میں بھی ہڑتال کا خاصا اثر رہا جس دوران یہاں دوکانات اور تجارتی مراکز بند رہے جبکہ سڑکوں سے ٹریفک کی نقل و حمل بند رہی۔اطلاعات کے مطابق وادی کے سبھی اضلاع میں ہڑتالی کال کے نتیجے میں سرکاری دفاتر میں ملازمین کی حاضری نہ ہونے کے برابر رہی جس کے نتیجے ان دفاتر میں کام کاج بری طرح متاثر رہی۔

اس دوران انتظامیہ نے کسی بھی امکانی گڑ بڑ سے نمٹنے کے لیے پولنگ زدہ علاقوں میں پولیس و سی آر پی ایف کے خصوصی دستے تعینات کئے تھے جبکہ بڈگام، بانڈی پورہ اور بارہمولہ اضلاع میں افواہ بازی پر لگام کسنے کے لیے موبائل انٹرنیٹ سروس کی تیز رفتار سروس کو 2Gسروس میں تبدیل کیا گیا تھا۔ انہوں نے بتایا کہ بے لگام افواہ اور امن و قانون کی صورتحال کو برقرار رکھنے کے لیے انتظامیہ نے سنیچر کو بڈگام، بانڈی پورہ اور بارہمولہ کے تحت آنے والے علاقوں میں موبائل انٹرنیٹ سروس کی تیز رفتار سروس کو بند کیا تھا تاہم سرحدی ضلع کپوارہ میں انٹرنیٹ خدمات کو مکمل طور پر مسدود کیا گیا تھا۔ انہوں نے بتایا کہ انٹرنیٹ سروس کی معطلی کی وجہ سے طلبا اور تاجر پیشہ افراد نے حکومتی اقدام کے خلاف سخت غم و غصے کا اظہار کیا۔ ادھر ریلوے حکام نے بھی ریلوے جائیداد اور مسافروں کے تحفظ کو یقینی بنانے کی خاطر بارہمولہ سے بانہال تک چلنے والی ریل سروس کو ہڑتالی کال کے پیش نظر معطل رکھا تھا۔