صحافت پا بندی جمہوری اصولوں کے منافی ، ترمیم لازمی:مظاہرین
خبراردو:-
سرینگر: میڈیا پالیسی 2020کے خلاف سوموار کو سرینگر میں مختلف میڈیا اداروں وابستہ صحافیوں نے احتجاجی مظاہرہ کرتے ہوئے بتایا کہ صحافت پر پابندی جمہوری اصولوں کے منافی ہے جبکہ مذکورہ پالیسی میں قابل اعتراض نکات میں ترمیم لازمی ہے ۔ انہوں نے کہا ’صحافیوں کو قلم اٹھانے سے روکنا جمہوریت کے چوتھے ستون کو گرا نے کے مترادف ہے ‘ ۔

کشمیر نیوز سروس کے مطابق وادی کشمیر سے تعلق رکھنے والے کئی میڈیا اداروں سے وابستہ صحافیوں نے نئی میڈیا پالیسی کے خلاف صدا ئے احتجاج بلند کی ۔ جے اینڈ کے میڈیا گلڈ‘ کے بینر تلے صحافیوں کا ایک گروہ سوموار کوپریس کالونی میں جمع ہوا اور نئی میڈیا پالیسی کو ہدف تنقید بنایا جبکہ کئی میڈیا انجمنوں کا اشتراک بھی حاصل تھا ۔ مظاہرین نے اپنے ہاتھوں میں بینر اور پلے کارڈ اٹھا رکھے تھے ،جن پر ’میڈیا پر پابندی ختم کرو ،قلم اٹھانے سے نہ روکو،میڈیا پالیسی کو واپس لو ‘جیسے نعر ے درج تھے-

احتجاجی صحافیوں کا کہنا تھا کہ نئی میڈیا پالیسی کا مقصد صحافت پرپابندیاں عائد کرنا ہے ۔ اْن کا مزید کہنا تھا کہ یہ پالیسی صحافیوں اور صحافتی اداروں کیخلاف ہے ۔ اس موقع پر جے کے میڈیا گلڈ کے سربراہ میر اعجاز نے موجود نامہ نگاروں سے بات چیت کرتے ہوئے کہا کہ میڈیا جمہوریت کا اہم ستون ہے ۔ انہوں نے کہا کہ میڈیا کی نئی پالیسی کا مقصد جموں و کشمیر میں صحافیوں کو مزید پریشان کرنا ہے ۔ جو کہ پہلے سے ہی پچھلے چالیس سال کے نامساعد حالات کے دوران بہت سارے عتاب و مظالم کے شکار ہو ئے ہیں ۔

اس دوران ھمارے اکیس سے، زائد محترم صحافی حضرات کو جرم بےگناھی کے عوض شہید کیا گیا اور درجنوں صحافیوں کو زخمی کیا گیا ۔ حکومت اور پالیسی تیار کرنے والوں کو یہ سمجھنا چاہئے کہ میڈیا بھی جمہوریت کا ایک اہم ستون ہے ۔ اس کو کمزور کرنے سے جمہوریت کا ڈھانچہ بھی خطرے میں پڑسکتا ہے ۔ جے کے میڈیا گلڈ کے سیکرٹری جنرل امتیاز احمد بزاز نے اس موقعہ پر نامہ نگاروں کے سوالات کا جواب دیتے ہوئے کہا کہ حکومت کی وضع کردہ نئی میڈیا پالیسی تمام اخبارات ، نیوز چینلز اور دیگر تمام نیوز پلیٹ فارمز کے خلاف ہے ۔

اس پالیسی میں کسی بھی رپورٹ کو قلم بند کرنے سے پہلے حکومت اور پولیس کو پہلے آگاہ کرنے کو کہا گیا ہے ۔ انہوں نے کہا کہ حکومت کو چاہئے کہ وہ اس پالیسی کو کالعدم قرار دے اور رول بیک کرے تاکہ ہ میں اپنے کام کو چلانے کے لئے آزادانہ ماحول مل سکے ۔ ہیڈ لائنز گروپ کے مدید اعلیٰ اور سینئر صحافی ارشید میر نے کے این ایس کو بتایا کہ میڈیا پالیسی2020پہلے سے موجود پالیسی کے متوازی ہے،تاہم اس پالیسی میں کئی ایسے نکات ہیں ،جو صحافیوں کے پیشہ ورانہ اصولوں اور جمہوری تقاضوں کے منافی ہے ۔ ان کا کہناتھا کہ کوئی بھی خبر شاءع کرنے سے قبل اُس کوحکومتی کی نوٹس میں لانا یہ آزادیَ صحافت پر قدغن کے برا بر ہے ۔

ارشد میر نے کہا ’ہم بھی چاہتے ہیں زرد صحافت ختم ہو ،ہم بھی چاہتے ہیں صاف وشفاف صحافت ہو ،ہم بھی چاہتے ہیں صحافت بنیادوں اصولوں کے تحت ہو ،کوئی اس کے خلاف نہیں ،لیکن ایک صحافی کو قلم اٹھانے پر پابندی عائد کرنا کسی بھی طور قابل قبول نہیں ہے ‘ ۔ انہوں نے کہا کہ میڈیا پالیسی2020پر صحافیوں کو کئی خدشات اور تحفظات ہیں ،جنہیں دور کرنا جموں وکشمیر حکومت کی ذمہ داری ہے ‘ ان کا کہناتھا کہ جب تک صحافیوں کے تحفظات کو دور نہیں کیا جاتا ،تب تک وہ اس کے خلاف اپنی آواز بلند کرتے رہیں گے ۔

ارشد میر نے بتایا کہ حکومت کو یا تو پالیسی فوری طور پر واپس لینی چاہئے یا پھر اس میں ضروری ترمیم کرنی چاہئے اور اُن نکات کو پالیسی سے حزف کرنا چاہئے ،جو ایک صحافی کو قلم اٹھانے سے روکتے ہیں ۔ بعد ازاں یہ مظاہرہ پرامن طور ختم ہوا ۔