کینبرا، آسٹریلیا کی وزیر خارجہ پینی وونگ نے جمعہ کو مغربی ایشیا میں جنگ بندی کی اپیل کی ہے۔

انہوں نے امریکہ اور ایران کی جانب سے نئے حملے کیے جانے کے بعد اس تنازع کو ختم کرنے کی اپیل کی ہے۔ محترمہ وونگ نے آسٹریلین براڈکاسٹنگ کارپوریشن (اے بی سی) ٹیلی ویژن کو بتایا کہ دنیا مغربی ایشیا کے عام شہریوں اور عالمی معیشت کے فائدے کے لیے اس تنازع کو ختم ہوتے دیکھنا چاہتی ہے۔

انہوں نے کہا، “یہ یقینی طور پر کمزور پڑ رہا ہے اور ہم لگاتار اکا دکا جھڑپیں دیکھ رہے ہیں۔” انہوں نے کہا، “دنیا واقعی چاہتی ہے کہ یہ جنگ بندی برقرار رہے اور مضبوط ہو۔ دنیا اس تنازع کا خاتمہ دیکھنا چاہتی ہے، نہ صرف اس خطے کے لوگوں کے لیے، بلکہ اس لیے بھی کیونکہ اس کا اثر عالمی معیشت پر پڑتا ہے۔” محترمہ وونگ کا یہ بیان ایسے وقت میں آیا ہے جب امریکہ اور ایران کے درمیان منگل کی رات سے جمعرات تک نئے حملے ہوئے، جس سے تناؤ مزید بڑھ گیا ہے۔

قابل ذکر ہے کہ آبنائے ہرمز سے گزرنے والے تجارتی جہازوں پر ایران کے حالیہ حملوں کے جواب میں امریکہ نے گزشتہ چند دنوں میں ایران کے اندر کئی ٹھکانوں پر حملے کیے، جس سے جان و مال کا نقصان ہوا اور بنیادی ڈھانچے کو نقصان پہنچا۔ ایران نے اس کے جواب میں کویت، بحرین، قطر اور اردن میں امریکی فوجی ٹھکانوں اور شہری تنصیبات پر میزائل اور ڈرون سے حملے کیے۔

یو این آئی۔ایم جے

جموں، جموں و کشمیر میں سری امرناتھ یاترا کے لیے جمعہ کو سخت سکیورٹی کے درمیان 8,796 زائرین کا نواں جتھہ جموں کے بھگوتی نگر یاتری نیواس بیس کیمپ سے جنوبی کشمیر ہمالیہ میں واقع گپھا کے لیے روانہ ہوا۔

حکام نے بتایا کہ آج صبح 8,796 زائرین 354 ہلکی اور بھاری گاڑیوں کے قافلے میں جموں بیس کیمپ سے روانہ ہوئے۔ اس جتھے میں بالٹال کے لیے 3,450 اور پہلگام کے لیے 5,346 زائرین شامل تھے۔ محفوظ اور پرامن یاترا کے لیے سول انتظامیہ، پولس، سکیورٹی فورسز اور سری امرناتھ شرائن بورڈ نے مل کر کثیر المیعاد سکیورٹی انتظامات کیے ہیں۔

قابل ذکر ہے کہ یاترا شروع ہونے کے بعد سے گزشتہ سات دنوں میں ملک کے مختلف حصوں سے کل 1,71,501 زائرین نے گپھا مندر کے درشن کیے ہیں۔ جموں و کشمیر انتظامیہ نے زائرین سے اپیل کی ہے کہ وہ پکا رجسٹریشن اور طے شدہ تاریخ پر ہی یاترا کریں، کیونکہ بغیر رجسٹریشن والے کسی بھی زائر کو بیس کیمپ تک جانے کی اجازت نہیں دی جائے گی۔

واضح رہے کہ جموں و کشمیر کے لیفٹیننٹ گورنر منوج سنہا نے گزشتہ دو جولائی کو جموں سے یاترا کے پہلے جتھے کو ہری جھنڈی دکھا کر روانہ کیا تھا۔

یو این آئی۔ایم جے

تہران،ایرانی وزیر خارجہ سید عباس عراقچی کی عمانی وزیر خارجہ بدر بن حمد البوسعیدی اور ترک وزیر خارجہ حاقان فیدان سے ٹیلیفون پر علیحدہ علیحدہ گفتگو ہوئی۔تہران سے ایرانی وزارت خارجہ کے مطابق گفتگو میں آبنائے ہرمز کی صورتحال سمیت حالیہ علاقائی پیش رفت پر تبادلہ خیال ہوا۔اس موقع پر تینوں وزرائے خارجہ نے کشیدگی میں اضافہ روکنے کے لیے سفارتی چینلز استعمال کرنے کی ضرورت پر زور دیا۔ادھر انقرہ سے ترک وزارت خارجہ کے مطابق ترکیہ کے وزیر خارجہ حاقان فیدان نے اپنے ایرانی ہم منصب سید عباس عراقچی سے خطے کی موجودہ صورتحال اور جنگ بندی پر تبادلہ خیال کیا۔

یو این آئی۔م ا ع