سرینگر، جموں و کشمیر کی اقتصادی جرائم ونگ (ای او ڈبلیو) نے سرینگر کے چیف جوڈیشل مجسٹریٹ کی عدالت کے سامنے چار افراد کے خلاف چارج شیٹ داخل کی ہے۔

یہ افراد نوکری کے نام پر دھوکہ دہی کرنے والے گروہ میں شامل تھے، جس میں ایئرپورٹس اتھارٹی آف انڈیا (اے اے آئی) میں نوکری دلانے کے جھوٹے وعدے پر بے روزگار نوجوانوں کو ٹھگا گیا تھا۔ یہ چارج شیٹ انفارمیشن ٹیکنالوجی (آئی ٹی) ایکٹ کے تحت داخل کی گئی ہے۔

یہ چارج شیٹ اتر پردیش کے نوئیڈا کے رہنے والے موہت شرما عرف بھاردواج، ڈومریا گنج کے رہنے والے رام لکھن اور نئی دہلی کے رہنے والے مکیش کمار نیز محمود خان کے خلاف داخل کی گئی ہے۔ محکمہ جرائم کے مطابق وادیِ کشمیر کے متعدد اضلاع سے شکایات ملنے کے بعد یہ معاملہ درج کیا گیا تھا۔ شکایات میں الزام لگایا گیا تھا کہ ملزمان نے اے اے آئی میں ملازمت دلانے کے بہانے نوکری کے خواہش مندوں سے لاکھوں روپے وصول کر کے ان کے ساتھ دھوکہ دہی کی تھی۔

حکام نے بتایا کہ تحقیقات میں ملزمان کے خلاف الزامات ثابت ہوئے، جس کے بعد اقتصادی جرائم ونگ نے تفتیش مکمل کی اور عدالتی کارروائی کے لیے مجاز عدالت کے سامنے چارج شیٹ داخل کی۔

یواین آئی،الف الف

واشنگٹن، امریکہ اور ایران نے منگل سے بدھ تک ایک دوسرے کے خلاف حملوں کی گیارہویں رات بھی کارروائیاں جاری رکھیں، ایسے میں امریکی وزیر خارجہ مارکو روبیو نے دعویٰ کیا ہے کہ تہران ’’مذاکرات کے لیے سنجیدہ نہیں‘‘ ہے۔

امریکی میڈیا کے مطابق مارکو روبیو کا یہ بیان امریکی وزیر دفاع پیٹ ہیگسیتھ کی قانون سازوں کے سامنے گواہی کے بعد سامنے آیا ہے، جب کہ ٹرمپ انتظامیہ جنگ کے اخراجات پورے کرنے کے لیے مزید دسیوں ارب ڈالر کی اضافی فنڈنگ حاصل کرنے کی کوشش کر رہی ہے۔

امریکی وزیر دفاع پیٹ ہیگسیتھ کے مطابق ایران کے ساتھ جنگ پر اب تک 37.5 ارب ڈالر خرچ ہو چکے ہیں، تاہم سی این این سے بات کرنے والے ماہرین کا کہنا ہے کہ اصل لاگت اس سے کہیں زیادہ ہونے کا امکان ہے۔ ہیگسیتھ اور جوائنٹ چیفس آف اسٹاف کے چیئرمین جنرل ڈین کین نے جنگ کے لیے اضافی فنڈنگ حاصل کرنے کی غرض سے کانگریس کے سامنے گواہی دی۔

اس کے چند گھنٹے بعد وزیر خارجہ روبیو نے خبردار کیا کہ ایران کو آبنائے ہرمز پر کنٹرول کی اجازت دینا ایک ’’خطرناک مثال‘‘ قائم کرے گا۔ ان کے مطابق فروری میں امریکا اور اسرائیل کے ایران پر حملوں سے پہلے یہ آبنائے آزاد اور محفوظ آمدورفت کے لیے مکمل طور پر کھلی ہوئی تھی۔

روبیو نے کہا امریکہ ایران کے معاملے پر سفارت کاری اور مذاکرات کے لیے بدستور تیار ہے، ایران سے مذاکرات کے دروازے اب بھی کھلے ہیں، اختلافات کے حل کے لیے بات چیت ہی ہماری ترجیح ہے، لیکن بدقسمتی سے ایران نے اب تک اپنے وعدے پورے نہیں کیے، وہ سنجیدگی دکھائے تو امریکہ بھی مذاکرات کے لیے تیار ہے، تہران سنجیدہ نہ ہوا تو امریکا اپنے اور اتحادیوں کے مفادات کا تحفظ کرے گا۔

انھوں نے کہا داؤ پر صرف ہرمز نہیں، بین الاقوامی سمندری راستوں کا مستقبل بھی ہے، سمندری راستوں پر آزادیٔ نقل و حرکت ایک بنیادی اصول ہے، آزادیٔ نقل و حرکت کو نقصان پہنچانے کی اجازت نہیں دی جا سکتی، عالمی معیشت اور تجارتی نظام کے تحفظ کے لیے سمندری راستوں کی آزادی برقرار رکھنا ہوگی۔

سی این این کے مطابق ایک شپنگ تجزیاتی ادارے نے خبردار کیا ہے کہ ایک اور اہم آبی گزرگاہ میں خلل سے یہ خطرہ بڑھ گیا ہے کہ مشرق وسطیٰ کی توانائی سے متعلق دو اہم ترین گزرگاہیں بہ یک وقت دباؤ کا شکار ہو سکتی ہیں۔ ایران کی حمایت یافتہ حوثیوں نے باب المندب آبنائے میں سعودی عرب سے منسلک بحری جہازوں کی ناکہ بندی کی دھمکی دی ہے۔ اس اعلان کے بعد اس کے اثرات پہلے ہی نظر آنے لگے ہیں، کیوں کہ سعودی خام تیل لے جانے والے دو ٹینکرز نے بحیرۂ احمر میں اپنا راستہ تبدیل کر لیا۔

یو این آئی۔ ع ا۔

تہران، ایران کے صدر مسعود پزشکیان نے سپریم لیڈر مجتبیٰ خامنہ ای سے متعلق بڑا اور نیا انکشاف کر دیا ہے۔

غیر ملکی میڈیا کے مطابق صدر مسعود پزشکیان نے انکشاف کیا ہے کہ وہ سپریم لیڈر مجتبیٰ خامنہ کے ساتھ مسلسل رابطے میں ہیں اور ان سے روز مشاورت کرتے ہیں۔

ایران کے سرکاری میڈیا پر جاری ایک ویڈیو کلپ میں مسعود پزشکیان نے کہا کہ ملک کو درپیش مسائل کے حل کے لیے مسلسل کوششیں جاری ہیں۔ سپریم لیڈر مجتبیٰ خامنہ ای کی رہنمائی میں فیصلے کیے جا رہے ہیں۔

ایرانی صدر مسعود پیزشکیان نے منگل کو سرکاری میڈیا پر شائع ہونے والے ایک ویڈیو کلپ میں کہا کہ ایران کے سپریم لیڈر کے ساتھ “تعلقات” کی سطح روز بروز بڑھ رہی ہے۔

واضح رہے کہ ایرانی صدر کا یہ بیان ایسے وقت سامنے آیا ہے، جب ریمارکس سپریم لیڈر مجتبیٰ خامنہ ای کی صحت کے بارے میں قیاس آرائیاں جاری ہیں۔

ایران جنگ کے آغاز میں ان کے والد اور پیش رو علی خامنہ ای کی امریکی اور اسرائیلی فضائی حملے میں شہادت کے بعد سے مجتبی خامنہ ای کو عوامی سطح پر نہیں دیکھا گیا۔

خامنہ ای نے 8 مارچ کو ایران کے تیسرے سپریم لیڈر کے طور پر اپنی تقرری کے بعد سے تحریری بیانات جاری کیے ہیں، لیکن ان کے ساتھ کوئی نئی تصویر یا صوتی ریکارڈنگ نہیں ہے۔

رواں ماہ کے آغاز میں اپنے والد مجتبیٰ خامنہ ای کے جنازے میں عدم شرکت نے بھی ان قیاس آرائیوں کو مزید تقویت دی۔

سینئر ذرائع نے جولائی میں روئٹرز کو بتایا تھا کہ تصویر یا آواز کی ریکارڈنگ کی کمی کی وجہ صحت اور سلامتی کے تحفظات ہیں۔ پہلے امریکی اور اسرائیلی حملوں میں ان کے والد کی ہلاکت کے پیش نظر سلامتی کے خطرات کافی ہیں، جو ممالک کے درمیان تنازعات کو حل کرنے کی سفارتی کوششوں کے دوران شروع کیے گئے تھے۔

یو این آئی۔ ع ا۔