نئی دہلی، لوک سبھا میں قائدِ حزبِ اختلاف راہل گاندھی نے جمعہ کے روز کہا کہ حکومت حد بندی (ڈیلِمٹیشن) کے بہانے ہندوستان کا انتخابی نقشہ تبدیل کرنا چاہتی ہے، لیکن اس سے خواتین کو حقیقی بااختیار بنانا ممکن نہیں ہوگا۔

راہل گاندھی نے پارلیمانی نشستوں کی حد بندی سے متعلق بل کی سخت مخالفت کرتے ہوئے اسے “ملک دشمنی” قرار دیا اور کہا کہ اپوزیشن اسے کسی صورت منظور نہیں ہونے دے گی۔ انہوں نے حد بندی بل 2026، آئین (ایک سو اکتیسواں ترمیمی) بل 2026 اور یونین ٹیریٹری قانون (ترمیمی) بل 2026 پر جاری بحث میں حصہ لیتے ہوئے کہا کہ حکومت جس طریقے سے لوک سبھا کی نشستوں کی حد بندی اور خواتین کو قانون ساز اداروں میں ریزرویشن دینا چاہتی ہے، وہ دیگر پسماندہ طبقات (او بی سی)، دلتوں اور اقلیتوں کے مفادات پر حملہ ہے۔

انہوں نے حکومتی بینچوں سے کہاکہ “آپ او بی سی اور دلتوں کو ہندو تو کہتے ہیں، لیکن اقتدار میں انہیں جگہ نہیں دیتے۔

کارپوریٹ سیکٹر میں او بی سی اور دلت کہاں ہیں؟ تعلیمی میدان میں محروم طبقات کہاں ہیں؟ نجی شعبے میں ان کی نمائندگی کہاں ہے؟ سرکاری شعبے سے بھی انہیں باہر کیا جا رہا ہے۔”

راہل گاندھی نے حکومت سے مطالبہ کیا کہ وہ خواتین کو قانون ساز اداروں میں ریزرویشن دینے والا پرانا بل پیش کرے، اپوزیشن اس کی حمایت کرے گی۔ انہوں نے کہا کہ ماضی میں او بی سی، دلتوں اور اقلیتوں کے ساتھ سخت ناانصافی ہوئی ہے اور اب اس بل کے ذریعے ان کے ساتھ دوبارہ ویسا ہی سلوک کیا جا رہا ہے تاکہ انہیں کبھی اقتدار تک نہ پہنچنے دیا جائے۔

انہوں نے کہاکہ “منوواد آئین پر حاوی ہو رہا ہے۔”

قائدِ حزبِ اختلاف نے کہا کہ حکومت عوام کو گمراہ کرنا چاہتی ہے اور اسے معلوم ہے کہ آئینی ترمیمی بل منظور نہیں ہوگا۔ وہ خواتین کے ریزرویشن کے نام پر انتخابی فائدہ حاصل کرنا چاہتی ہے۔

وزیر اعظم کے خلاف راہل گاندھی کے بعض الفاظ پر اعتراض کرتے ہوئے وزیر دفاع راجناتھ سنگھ نے کہا کہ وزیر اعظم اور ملک کی فوج کی توہین نہیں کی جانی چاہیے۔

لوک سبھا کے اسپیکر اوم برلا نے بھی راہل گاندھی کو تنبیہ کی کہ وہ ایسی کوئی بات نہ کہیں جو ایوان کی وقار اور ضابطے کے خلاف ہو۔

یواین آئی۔ ظ ا

نئی دہلی، ہندوستان نے جمعہ کے روز اسرائیل اور لبنان کے درمیان ہونے والی 10 روزہ عارضی جنگ بندی کی پرزور حمایت کی ہے زارت خارجہ نے دیرپا امن کے قیام کے لیے تنازع کو ختم کرنے کی سفارتی کوششوں کی تائید کا اشارہ دیا ہے میڈیا بریفنگ کے دوران وزارت خارجہ کے ترجمان رندھیر جیسوال نے اس سفارتی پیش رفت کا خیر مقدم کرتے ہوئے کہا کہ ” ہندوستان جنگ بندی اور ہر اس قدم کا خیر مقدم کرتا ہے جو امن کی طرف لے جاتا ہے۔”

حماس سے متعلق ایک منظم عمل برقرار رکھنے کے حوالے سے انہوں نے کہا، “ہندوستان کے پاس ایک (طے شدہ) عمل موجود ہے، اور ان مسائل کو اسی عمل کے تحت حل کیا جاتا ہے۔”

یہ ریمارکس اسرائیل اور لبنان کے درمیان 10 روزہ جنگ بندی کے تناظر میں سامنے آئے ہیں، جس کا نفاذ جمعرات سے ہوا ہے۔

دشمنی کے اس خاتمے کا اطلاق امریکی صدر ڈونلڈ ٹرمپ کے اس اعلان کے ساتھ ہوا ہے کہ وہ اسرائیل اور لبنان کی قیادت کے درمیان ایک تاریخی پہلی ملاقات کی راہ ہموار کرنے کے لیے کام کر رہے ہیں۔

اس جنگ بندی کو بڑے پیمانے پر واشنگٹن کی قیادت میں تہران کے ساتھ جاری تنازع کو کم کرنے کی سفارتی کوششوں کے حصے کے طور پر دیکھا جا رہا ہے۔ ایران مذاکرات کے دوران اپنے موقف پر قائم رہا ہے اور اس کی قیادت کا اصرار رہا ہے کہ کسی بھی معاہدے میں لبنان میں دشمنی کا خاتمہ لازمی شامل ہونا چاہیے۔

ایران اور امریکہ کے درمیان ثالثی میں پاکستان کے ممکنہ کردار کے بارے میں پوچھے جانے پر، جیسوال نے اشارہ دیا کہ نئی دہلی صورتحال کی باریک بینی سے نگرانی کر رہا ہے۔ انہوں نے کہا، “ہم مغربی ایشیا کی جنگ میں تمام پیش رفت کا قریب سے جائزہ لے رہے ہیں۔”

موجودہ تنازع کی جڑیں 28 فروری کو ایران کے خلاف امریکہ اور اسرائیل کی فوجی کارروائی سے جڑی ہیں، جس میں چند دن بعد لبنان بھی اس وقت شامل ہو گیا جب حزب اللہ نے 2 مارچ کو اسرائیل پر راکٹ حملے شروع کیے تھے۔

صدر ٹرمپ نے اس لمحے کو ممکنہ طور پر ایک بڑی تبدیلی قرار دیتے ہوئے اسرائیلی وزیراعظم بنیامن نیتن یاہو اور لبنانی صدر جوزف عون کی وائٹ ہاؤس میں ملاقات کے امکان کا اظہار کیا، جو کہ 44 سالوں میں اپنی نوعیت کی پہلی ملاقات ہوگی۔

یواین آئی ۔ایف اے

نئی دہلی، وزیر اعظم نریندر مودی نے کہا ہے کہ آسٹریا کے چانسلر کرسچین اسٹاکر کے دورہ ہند سے دونوں ممالک کے درمیان تجارت اور سرمایہ کاری کے شعبے میں نئی توانائی آئے گی اور مختلف شعبوں میں آسٹریا کی مہارت اور ہندوستان کی رفتار و وسعت دنیا کے لیے قابل بھروسہ سپلائی چین کو یقینی بنائے گی دونوں ممالک دفاع، سیمی کنڈکٹر، کوانٹم اور بایو ٹیکنالوجی کے شعبوں میں بھی اپنی شراکت داری کو مضبوط کریں گے۔ ہندوستان اور آسٹریا نے تعلیم کے شعبے میں تعاون کے لیے ایک مفاہمت نامہ پر دستخط کیے ہیں اور مائگریشن اینڈ موبلٹی ایگریمنٹ کو نرسنگ کے شعبے میں بھی آگے بڑھانے کا فیصلہ کیا ہے۔ دونوں ممالک نے نوجوانوں کے تبادلے کے پروگرام کے تحت ہالی ڈے پروگرام شروع کرنے کا بھی اعلان کیا ہے۔

جناب مودی نے دورہ ہند پر آئے ہوئے جناب اسٹاکر کے ساتھ بات چیت کے بعد جمعرات کو یہاں مشترکہ پریس بیان میں کہا کہ ہندوستان-آسٹریا شراکت داری کو اختراع اور مستقبل کی ضروریات پر مبنی بنانے کی ضرورت ہے۔ انہوں نے کہا کہ دونوں ممالک کا پختہ یقین ہے کہ فوجی تصادم سے مسائل کا حل ممکن نہیں اور ہم یوکرین اور مغربی ایشیا میں مستقل امن کے حامی ہیں۔ انہوں نے مزید کہا کہ ہندوستان اور آسٹریا دونوں ہی عالمی اداروں میں اصلاحات کے پرزور حامی ہیں اور دہشت گردی کو جڑ سے اکھاڑ پھینکنا ہماری مشترکہ عہد بستگی ہے۔

جاری ۔ یواین آئی ۔ایف اے