واشنگٹن، امریکی صدر ڈونلڈ ٹرمپ نے کہا ہے کہ ایران کے ساتھ مذاکرات اب بھی جاری ہیں، تاہم امریکہ کسی بھی ممکنہ معاہدے میں تہران کو جوہری ہتھیار حاصل کرنے کی اجازت نہیں دے گا۔ انہوں نے دعویٰ کیا کہ ایران کے ساتھ جاری تنازع بہت جلد اپنے اختتام کو پہنچ جائے گا۔

وائٹ ہاؤس میں صحافیوں سے گفتگو کرتے ہوئے صدر ٹرمپ نے کہا کہ امریکہ جو چاہتا ہے وہ کسی نہ کسی طریقے سے حاصل کر کے رہے گا۔

انہوں نے کہا کہ واشنگٹن تہران پر شدید دباؤ برقرار رکھے ہوئے ہے اور امریکی بحریہ ایران کے خلاف سخت ناکہ بندی جاری رکھے ہوئے ہے۔

ٹرمپ کے مطابق امریکہ نے فولادی محاصرے کے ذریعے آبنائے ہرمز پر مؤثر کنٹرول حاصل کر لیا ہے۔

امریکی صدر نے واضح کیا کہ واشنگٹن نہیں چاہتا کہ افزودہ یورینیم ایران کے اندر موجود رہے اور امریکہ ایرانی افزودہ یورینیم کے ذخائر کو حاصل کرنے کے بعد انہیں تباہ کرنے پر کام کرے گا۔

سمندری تجارت سے متعلق گفتگو میں ٹرمپ نے زور دیا کہ آبنائے ہرمز کو بین الاقوامی جہاز رانی کے لیے بغیر کسی ٹیکس یا پابندی کے کھلا رہنا چاہیے۔

یہ بیانات ایسے وقت سامنے آئے ہیں جب ایران کے جوہری معاملے پر سفارتی سرگرمیاں جاری ہیں۔

اس سے قبل امریکی وزیر خارجہ مارکوروبیو نے امید ظاہر کی تھی کہ پاکستان کی ثالثی امریکہ اور ایران کے درمیان جنگ کے خاتمے کے لیے کسی معاہدے تک پہنچنے میں مددگار ثابت ہو سکتی ہے۔

مارکو روبیو نے کہا کہ پاکستانی حکام آج تہران جا رہے ہیں اور انہیں امید ہے کہ اس سے مذاکراتی عمل آگے بڑھے گا۔

رپورٹس کے مطابق تہران پاکستانی آرمی چیف جنرل عاصم منیر کے ممکنہ دورے کا منتظر ہے، جو اسلام آباد کی جانب سے جاری ثالثی کوششوں کا حصہ سمجھا جا رہا ہے۔

یاد رہے کہ تہران 28 فروری کو شروع ہونے والی جنگ کے خاتمے کے لیے امریکہ کی جانب سے پیش کی گئی ایک تجویز پر غور کر رہا ہے۔

یواین آئی۔ م س

واشنگٹن، امریکہ نے ایسے 9 افراد پر نئی پابندیاں عائد کرنے کا اعلان کیا ہے جن پر حزب اللّٰہ کے لیے لبنان کی خودمختاری کو نقصان پہنچانے اور تنظیم کے سیاسی و مالیاتی نیٹ ورک کو مضبوط بنانے میں مدد دینے کا الزام عائد کیا گیا ہے۔ امریکی حکام کے مطابق یہ اقدامات حزب اللّٰہ کو غیر مسلح کرنے اور لبنان میں حکومتی عمل داری مضبوط بنانے کی کوششوں کا حصہ ہیں۔

امریکی وزارتِ خزانہ کے ترجمان ٹومی پیگوٹ نے کہا کہ حزب اللّٰہ کی حمایت کے ذریعے یہ افراد لبنان میں ایرانی حکومت کے ’’بدنیتی پر مبنی ایجنڈے‘‘ کو آگے بڑھا رہے ہیں اور لبنانی عوام کے لیے امن و استحکام کی راہ میں رکاوٹ بن رہے ہیں۔

انہوں نے کہا کہ حزب اللّٰہ کی جانب سے دہشت گردی کی مسلسل حمایت اور ہتھیار ڈالنے سے انکار لبنان کو امن، استحکام اور خوشحالی کی جانب بڑھنے سے روک رہا ہے۔

ٹومی پیگوٹ کے مطابق پابندیوں کی زد میں آنے والوں میں پارلیمنٹ کے ارکان، ایک سابق ایرانی سفارت کار اور ایسے سکیورٹی اہلکار شامل ہیں جن پر حزب اللّٰہ کے مفاد میں اپنے اختیارات استعمال کرنے کا الزام ہے۔

امریکی حکام نے یہ بھی اعلان کیا کہ محکمہ خارجہ کے ’’انعام برائے انصاف‘‘ پروگرام کے تحت ایسے افراد کو 10 ملین ڈالر تک انعام دیا جائے گا جو حزب اللّٰہ کے مالیاتی نیٹ ورک سے متعلق معلومات فراہم کریں۔

ٹومی پیگوٹ نے خبردار کیا کہ جو عناصر حزب اللّٰہ کو پناہ، تعاون یا کسی بھی شکل میں مدد فراہم کرتے رہیں گے، انہیں جواب دہ ہونا پڑے گا۔

انہوں نے زور دیا کہ ایک محفوظ اور مستحکم لبنان کے لیے حزب اللّٰہ کا مکمل غیر مسلح ہونا اور ملک بھر میں سکیورٹی امور پر لبنانی حکومت کی مکمل عمل داری ضروری ہے۔

امریکی پابندیوں کی نئی فہرست میں ابراہیم الموسوی، حسن فضل اللہ، حسین الحاج حسن، محمد عبد المطلب فنیش، احمد اسعد بعلبکی، سامر عدنان حمادی، خضر ناصر الدین، علی احمد صفاوی اور محمد رضا رؤف شیبانی کے نام شامل ہیں۔

دوسری جانب واشنگٹن میں لبنان اور اسرائیل کے درمیان براہِ راست مذاکرات کے تیسرے دور کے بعد امریکہ نے جنگ بندی میں توسیع کا اعلان کیا ہے۔

امریکی وزارتِ خارجہ کے مطابق مذاکرات کا نیا دور 2 اور 3 جون کو منعقد ہوگا، جبکہ اس سے قبل 29 مئی کو پینٹاگون لبنان اور اسرائیل کے فوجی وفود کے درمیان ایک اجلاس کی میزبانی کرے گا۔

ادھر حزب اللّٰہ نے لبنان اور اسرائیل کے درمیان براہِ راست مذاکرات کو مسترد کر دیا ہے، خاص طور پر ایسے مذاکرات کو جو اس کے ہتھیار ڈالنے کے معاملے سے متعلق ہوں۔

واضح رہے کہ 17 اپریل کو اعلان کردہ جنگ بندی میں مزید 45 دن کی توسیع حال ہی میں نافذ ہوئی ہے، تاہم اس کے باوجود اسرائیلی حملے اور جنوبی لبنان میں کشیدگی کا سلسلہ جاری ہے۔

یواین آئی۔ م س

واشنگٹن ، امریکی صدر ڈونلڈ ٹرمپ نے ایک بار پھر اس عزم کا اظہار کیا ہے کہ امریکہ ایران کا انتہائی افزودہ یورینیئم اپنے قبضے میں لے گا، جبکہ دوسری جانب تہران نے واضح کر دیا ہے کہ وہ اپنا افزودہ یورینیئم کسی صورت بیرونِ ملک منتقل نہیں کرے گا۔ دونوں ممالک کے درمیان جوہری تنازع کے ساتھ ساتھ سفارتی سرگرمیاں بھی جاری ہیں۔

وائٹ ہاؤس میں صحافیوں سے گفتگو کرتے ہوئے صدر ٹرمپ نے کہا کہ امریکہ ممکنہ طور پر ایران کا افزودہ یورینیئم حاصل کرنے کے بعد اسے تباہ کر دے گا، تاہم اسے ایران کے پاس نہیں رہنے دیا جائے گا۔

رپورٹس کے مطابق ایران کے پاس تقریباً 900 پاؤنڈ انتہائی افزودہ یورینیئم موجود ہے، جسے 60 فیصد تک افزودہ کیا جا چکا ہے۔ ماہرین کے مطابق یہ سطح ایٹمی ہتھیار بنانے کے قریب سمجھی جاتی ہے۔

ایران کا مؤقف ہے کہ اس کا جوہری پروگرام پُرامن مقاصد کے لیے ہے اور یورینیئم افزودگی میں اضافہ امریکہ کی جانب سے 2015 کے جوہری معاہدے سے یکطرفہ علیحدگی کے بعد کیا گیا۔

دوسری جانب ایرانی حکام نے خبردار کیا ہے کہ اگر ایران پر دوبارہ حملہ کیا گیا تو یورینیئم افزودگی کی شرح 90 فیصد تک بڑھائی جا سکتی ہے۔

امریکی اور اسرائیلی کارروائیوں کے باوجود واشنگٹن اب تک ایران کے افزودہ یورینیئم ذخائر تک رسائی حاصل نہیں کر سکا ہے، حالانکہ امریکہ طویل عرصے سے اسے اپنا اہم ہدف قرار دیتا رہا ہے۔

رپورٹس کے مطابق گزشتہ ایک برس کے دوران ایران کے خلاف امریکہ اور اسرائیل کی یہ دوسری بڑی جنگ رہی ہے، جس میں ایرانی جوہری تنصیبات کو نشانہ بنایا گیا، تاہم معاملہ اب بھی سیاسی اور سفارتی بیانات تک محدود ہے۔

ادھر مغربی خبر رساں ادارے ’’رائٹرز‘‘ کے مطابق ایران کے نئے سپریم لیڈر سید مجتبیٰ خامنہ ای نے ہدایت جاری کی ہے کہ ایرانی افزودہ یورینیئم بیرونِ ملک منتقل نہیں کی جائے گی۔

دوسری جانب امریکی وزیر خارجہ مارکو روبیو نے امید ظاہر کی ہے کہ پاکستان کے فیلڈ مارشل عاصم منیر کا حالیہ دورۂ ایران امریکہ اور ایران کے درمیان جاری جنگ کے خاتمے کے لیے مؤثر سفارتی پیش رفت ثابت ہو سکتا ہے۔

مارکو روبیو نے کہا کہ اس سلسلے میں کافی پیش رفت ہو رہی ہے اور انہیں امید ہے کہ پاکستانی فیلڈ مارشل کے دورے سے مذاکراتی عمل مزید آگے بڑھے گا۔

یواین آئی۔ م س