سرینگر، جموں و کشمیر کے وزیرِ اعلیٰ عمر عبداللہ نے جمعرات کے روز نئی دہلی میں وزیراعظم نریندر مودی سے ایک اہم ملاقات کی اور مرکز کے زیرِ انتظام علاقے کو جلد سے جلد مکمل ریاست کا درجہ (بحال کرنے پر زور دیا۔

وزیرِ اعلیٰ کے دفتر ( سی ایم او کی جانب سے جاری کردہ بیان کے مطابق، اس اعلیٰ سطح کی ملاقات میں جموں و کشمیر سے متعلق کئی اہم اور حساس امور پر تفصیلی گفتگو کی گئی، جس میں ریاست کا درجہ بحال کرنے سمیت خطے کی معیشت اور ترقیاتی کاموں کی رفتار تیز کرنا شامل تھا۔وزیرِ اعلیٰ کے دفتر نے سوشل میڈیا پلیٹ فارم ‘ایکس پر جاری ایک پوسٹ میں کہا”وزیرِ اعلیٰ عمر عبداللہ نے جموں و کشمیر میں اقتصادی ترقی کی رفتار کو بڑھانے، رابطے کو مضبوط بنانے، روزگار کے نئے مواقع پیدا کرنے، بنیادی ڈھانچے کو وسعت دینے اور عوامی فلاح و بہبود کے اقدامات کو تیز کرنے کے لیے حکومتِ ہند کی جانب سے مسلسل تعاون اور امداد فراہم کرنے کی ضرورت پر روشنی ڈالی۔”ملاقات کے دوران عمر عبداللہ نے وزیراعظم نریندر مودی کو مسلسل 12 سال تک وزیراعظم کے عہدے پر بلا تعطل خدمات انجام دینے اور اقتدار مکمل کرنے پر مبارکباد بھی پیش کی۔

واضح رہے کہ عمر عبداللہ کی جماعت ‘نیشنل کانفرنس’ نے جموں و کشمیر کو دوبارہ ریاست کا درجہ دلانے کے لیے اپنی سیاسی مہم تیز کر دی ہے۔ گزشتہ ہفتے ہی نیشنل کانفرنس نے متفقہ طور پر ایک قرارداد منظور کی تھی جس کے تحت پارلیمنٹ کے آئندہ مانسون سیشن کے پہلے ہی دن نئی دہلی میں ایک بڑا احتجاجی مظاہرہ کیا جائے گا۔ اس احتجاج کا مقصد جموں و کشمیر کو فوری طور پر مکمل ریاست کا درجہ بحال کرنے کا مطالبہ کرنا ہے۔

یواین آئی ۔م اع

جموں، جموں ٹریفک پولیس نے کارروائی کے موڈ میں آتے ہوئے ان گاڑیوں کے خلاف بڑی مہم شروع کر دی ہے جن کے رجسٹریشن سرٹیفکیٹ (آر سی) معطل کیے جا چکے ہیں لیکن اس کے باوجود وہ شہر کی سڑکوں پر چل رہی ہیں۔ یہ کارروائی ان گاڑیوں کے خلاف کی جا رہی ہے جن پر ٹریفک قوانین کی خلاف ورزی کے پانچ یا اس سے زیادہ چالان زیر التوا ہیں۔

سرکاری ذرائع کے مطابق جموں و کشمیر محکمۂ ٹرانسپورٹ اور ٹریفک پولیس نے ضلع جموں میں 26 ہزار سے زائد گاڑیوں کے رجسٹریشن سرٹیفکیٹس معطل کر دیے ہیں۔ یہ اقدام سپریم کورٹ کی جانب سے سڑکوں کی حفاظت کے حوالے سے جاری سخت ہدایات کی تعمیل میں بار بار ٹریفک قوانین کی خلاف ورزی کرنے والوں کے خلاف کیا گیا ہے۔

ذرائع نے بتایا کہ اس صورتحال کے پیش نظر جموں ٹریفک پولیس نے ایسے قانون شکن عناصر کے خلاف خصوصی مہم شروع کر دی ہے اور معطل شدہ آر سی والی گاڑیوں کو شہر کی سڑکوں پر چلتے ہوئے پکڑ کر ضبط کیا جا رہا ہے۔

ان کا کہنا تھا کہ اس کارروائی سے نہ صرف ایسی گاڑیوں کی نشاندہی ہوگی بلکہ ملک دشمن اور سماج دشمن عناصر پر بھی نظر رکھنے میں مدد ملے گی۔

ذرائع کے مطابق سینئر حکام کی ہدایت پر شہر بھر میں ٹریفک اہلکار تعینات کیے گئے ہیں اور مختلف مقامات پر موجود افسران معطل شدہ آر سی والی گاڑیوں پر کڑی نظر رکھے ہوئے ہیں۔

انہوں نے کہا کہ اب شہر بھر میں یہ ایک عام منظر بن چکا ہے۔ جیسے ہی ایسی کوئی گاڑی نظر آتی ہے اور موقع پر تصدیق ہو جاتی ہے، اسے ضبط کرکے ٹرانسپورٹ یارڈ منتقل کر دیا جاتا ہے۔

حکام کا کہنا ہے کہ سالانہ امرناتھ یاترا سے قبل اس مہم کو نہ صرف ٹریفک نظم و نسق بہتر بنانے کی کوشش کے طور پر دیکھا جا رہا ہے بلکہ اسے سماج دشمن اور ملک دشمن سرگرمیوں کی نگرانی کے ایک اہم اقدام کے طور پر بھی لیا جا رہا ہے۔

یہ کارروائی ایسے وقت میں کی جا رہی ہے جب پورے مرکز کے زیر انتظام علاقے میں “نشہ مکت جموں و کشمیر ابھیان” بھی جاری ہے۔

ذرائع نے بتایا کہ جن گاڑیوں کی آر سی معطل کی گئی ہے، ان میں سے بعض مبینہ طور پر سماج دشمن اور ملک دشمن عناصر استعمال کر رہے ہیں، جبکہ چند گاڑیوں کے بارے میں شبہ ہے کہ وہ چوری شدہ ہیں۔

انہوں نے کہا کہ ایسی گاڑیوں کی نشاندہی اور ان کے خلاف ضروری کارروائی کسی بھی ناخوشگوار واقعے کی روک تھام کے لیے ضروری ہے۔

ذرائع کے مطابق جاری مہم کے دوران چوری شدہ گاڑیوں اور جعلی یا تبدیل شدہ نمبر پلیٹوں والی گاڑیوں کی بھی نشاندہی کی جا رہی ہے۔

جموں ساؤتھ کی ڈپٹی سپرنٹنڈنٹ آف پولیس (ٹریفک) ڈاکٹر سنیہ وانی نے کہاکہ “یہ کارروائی ان گاڑیوں کے خلاف شروع کی گئی ہے جن کے رجسٹریشن سرٹیفکیٹس کو ٹرانسپورٹ کمشنر نے معطل کر دیا ہے۔”

انہوں نے مزید کہاکہ “بڑی تعداد میں ایسی گاڑیوں کی نشاندہی کی گئی جن کے مالکان نے پانچ یا اس سے زیادہ مرتبہ ٹریفک خلاف ورزیوں کے باوجود اپنے چالان ادا نہیں کیے۔ ٹریفک پولیس کی خصوصی مہمات کے دوران ان گاڑیوں کی شناخت کرکے انہیں ضبط کیا جا رہا ہے۔”

یواین آئی۔ ظا

سری نگر، جموں و کشمیر کے لیفٹیننٹ گورنر منوج سنہا نے جمعرات کو کہا کہ جموں و کشمیر میں باصلاحیت کھلاڑیوں کی ایک مضبوط کھیپ تیار کی جا رہی ہے جو اسکولی سطح سے لے کر علاقائی اور قومی سطح تک ان کے سفر کو یقینی بنائے گی۔

لیفٹیننٹ گورنر نے یہ باتیں سری نگر کے پولو گراؤنڈ میں واقع سنتھیٹک ہاکی آسٹرو ٹرف پر منعقدہ الفا ہاکی انٹر اسکول ٹورنامنٹ 2026 کی اختتامی تقریب سے خطاب کرتے ہوئے کہیں۔

اس ٹورنامنٹ میں وادی کے مختلف اضلاع، بشمول کپواڑہ، بانڈی پورہ، کولگام اور شوپیاں کے 32 اسکولوں نے شرکت کی، جس میں نوجوان کھلاڑیوں نے اپنی صلاحیتوں کا شاندار مظاہرہ کیا۔

اپنے خطاب میں لیفٹیننٹ گورنر نے تمام فاتحین اور شرکاء کو مبارکباد پیش کرتے ہوئے کہا کہ انہوں نے ٹورنامنٹ کے دوران غیرمعمولی مہارت اور ٹیلنٹ کا مظاہرہ کیا۔

انہوں نے جموں و کشمیر اسپورٹس کونسل، بادل ہاکی کلب اور ہاکی جموں و کشمیر کی مشترکہ کاوشوں کو سراہا جنہوں نے نوجوان کھلاڑیوں کے جذبے اور صلاحیتوں کو اجاگر کرنے کے لیے ایک مؤثر پلیٹ فارم فراہم کیا۔

منوج سنہا نے کہاکہ “اس ٹورنامنٹ کا مقصد صرف اسکور بورڈ تک محدود نہیں تھا بلکہ اس نے ہمارے باصلاحیت بچوں کو اپنی حقیقی کھیلوں کی صلاحیتوں کو پہچاننے اور نکھارنے کا ایک انقلابی موقع فراہم کیا۔”

انہوں نے کہا کہ گزشتہ چند برسوں کے دوران جموں و کشمیر میں ہاکی کے کھیل میں نمایاں تبدیلی دیکھنے میں آئی ہے۔

ان کے مطابق کھیلوں کے بنیادی ڈھانچے، گراس روٹ مقابلوں اور عوامی شمولیت میں سرمایہ کاری کے نتیجے میں اس کھیل کی مقبولیت میں نمایاں اضافہ ہوا ہے۔

انہوں نے کہاکہ “ہمارا مقصد ہے کہ آنے والے برسوں میں زیادہ سے زیادہ اسکول اور نوجوان ہاکی کو اپنائیں اور جموں و کشمیر عالمی معیار کے ہاکی ٹیلنٹ کی نرسری بن کر ابھرے۔ ہم یہاں ایسا نظام تشکیل دے رہے ہیں جو ایک کھلاڑی کے اسکول سے علاقائی اور پھر قومی سطح تک کے سفر کو ممکن بنائے گا۔”

انہوں نے مزید کہا کہ حالیہ برسوں میں سری نگر کے پولو ویو، پلوامہ اور پونچھ میں قائم سنتھیٹک ہاکی ٹرفس نے شہروں، سرحدی اضلاع اور دور دراز علاقوں کے نوجوان کھلاڑیوں کے لیے نئے مواقع پیدا کیے ہیں۔

منوج سنہا نے بتایا کہ جموں میں بندھو رکھ اور کے۔ کے۔ ہکو اسٹیڈیم میں جدید سنتھیٹک ہاکی ٹرفس زیر تعمیر ہیں۔

انہوں نے کہاکہ “یہ منصوبے جدید تربیت، خصوصی کوچنگ کیمپوں اور باصلاحیت کھلاڑیوں کی شناخت کے پروگراموں کی صلاحیت میں نمایاں اضافہ کریں گے اور مستقبل کے قومی سطح کے کھلاڑیوں کے لیے مضبوط بنیاد فراہم کریں گے۔”

لیفٹیننٹ گورنر نے اس عزم کا اعادہ کیا کہ حکومت نوجوان ٹیلنٹ کو مواقع اور وسائل فراہم کرنے کے لیے مسلسل کوشاں ہے تاکہ وہ آگے بڑھ سکیں اور ایک ترقی یافتہ بھارت کی تعمیر میں اپنا کردار ادا کر سکیں۔

انہوں نے کہاکہ “رنجی ٹرافی چیمپئن شپ سے لے کر ‘نشہ مکت جموں و کشمیر’ مہم تک، ہمارے نوجوانوں نے مختلف میدانوں میں اپنی غیرمعمولی لگن اور صلاحیت کا ثبوت دیا ہے۔ مجھے ان کے جذبے پر فخر ہے اور میں چاہتا ہوں کہ قوم کی تعمیر میں ان کا کردار کسی سے کم نہ ہو۔”

یواین آئی۔ ظ ا