تہران، ایران اور امریکہ کے درمیان جنگ بندی مذاکرات کے دوسرے مرحلے کے سلسلے میں فیلڈ مارشل سید عاصم منیر ایک اعلیٰ سطح کے وفد کے ہمراہ تہران پہنچ گئے ہیں۔ رپورٹ کے مطابق پاکستان کی مسلح افواج کے سربراہ فیلڈ مارشل سید عاصم منیر اور وفاقی وزیر داخلہ محسن نقوی ایک اعلیٰ سطح کے وفد کے ہمراہ ایران کے دارالحکومت تہران پہنچے۔بیان میں کہا گیا ہے کہ پاکستانی وفد ایران اور امریکہ کے درمیان جاری جنگ بندی مذاکرات کے سلسلے میں سفارتی اور ثالثی کوششوں کو آگے بڑھانے کیلئے اہم ملاقاتیں کرے گا۔

عرب میڈیا رپورٹس کے مطابق تہران پہنچنے پر پاکستانی وفد کا پرتپاک استقبال ایرانی وزیر خارجہ عباس عراقچی نے کیا، جبکہ اس موقع پر ایران کے دیگر اعلیٰ حکام بھی موجود تھے۔

رپورٹس کے مطابق پاکستانی وفد ایران کی اعلیٰ قیادت سے ملاقاتوں کے دوران ایران اور امریکہ کے درمیان جاری جنگ بندی مذاکرات کے دوسرے دور کی تیاری پر تبادلہ خیال کرے گا۔

یواین آئی۔ م س

تہران، ایرانی صدر مسعود پزشکیان نے اعلان کیا ہے کہ امریکہ یا اسرائیل کی طرف سے ایران کو ‘ہتھیار ڈالنے’ پر مجبور کرنے کی کوئی بھی کوشش “ناکام ہوگی”۔ انہوں نے کہا کہ ایرانی عوام اسے کسی بھی صورت میں قبول نہیں کریں گے۔

بدھ کے روز تہران میں ایمرجنسی سروس کے اہلکاروں کے ساتھ ملاقات میں مسٹر پزشکیان نے زور دے کر کہا کہ ایران نے کبھی جنگ یا عدم استحکام نہیں چاہا۔ وہ ہمیشہ دوسرے ممالک کے ساتھ مسلسل بات چیت اور تعمیری مشغولیت کا حامی رہا ہے۔

ایرانی میڈیا رپورٹس کے مطابق، امریکہ کا نام لیے بغیر، صدر نے بین الاقوامی رویے میں “دوہرے معیار” پر تنقید کی اور خودمختار ممالک کے خلاف فوجی کارروائی کی مذمت کی۔ امریکی اسرائیلی جارحیت کے باوجود ایران کے اصولی موقف کا حوالہ دیتے ہوئے مسٹر پیزشکیان نے کہا کہ “ایران جنگ یا عدم استحکام کا خواہاں نہیں ہے۔”

یواین آئی۔الف الف

دبئی، دنیا کے پرتعیش ترین ہوٹلوں میں شمار ہونے والا دبئی کا ‘برج العرب’ وسیع پیمانے پر بحالی اور تزئین و آرائش کے منصوبے کے تحت اگلے 18 ماہ کے لیے بند کر دیا گیا ہے ہوٹل کے منتظم ادارے ‘جمیرا گروپ’ کے مطابق اس منصوبے کا مقصد ہوٹل کے اندرونی حصوں کو جدید تقاضوں کے مطابق ڈھالنا ہے، تاہم اس کی اصل شناخت اور تاریخی طرزِ تعمیر کو مکمل طور پر برقرار رکھا جائے گا۔ انتظامیہ کا کہنا ہے کہ اس کام کو کسی قیمتی فن پارے کی مرمت کی طرح نہایت احتیاط اور احترام کے ساتھ انجام دیا جائے گا۔تقریباً 27 سال قبل تعمیر ہونے والا برج العرب اپنی کشتی کے بادبان جیسی منفرد شکل کی وجہ سے دبئی کی عالمی پہچان بن چکا ہے۔ 321 میٹر بلند اس عمارت میں 198 پرتعیش سوئٹس موجود ہیں جن کی سجاوٹ میں سنگِ مرمر، سونے کی پرت اور قیمتی سواروسکی کرسٹل کا استعمال کیا گیا ہے۔

جمیرا گروپ کے چیف ایگزیکٹو کا کہنا ہے کہ بحالی کا یہ منصوبہ اس تاریخی مقام کی ایک نئی داستان کا آغاز ثابت ہوگا۔

واضح رہے کہ یہ ہوٹل اپنے نجی جزیرے پر قائم ہے جہاں سے خلیجِ عرب کے دلکش مناظر دکھائی دیتے ہیں، اور یہ دنیا کی ان عمارتوں میں شامل ہے جن کی سب سے زیادہ تصویریں کھینچی جاتی ہیں۔

یو این اؔٓئی۔ ع ا۔