تہران، ایران کے وزیرِ خارجہ عباس عراقچی نے کہا ہے کہ یمن میں جاری تنازع، باب المندب اور خطے کے دیگر مسائل کا کوئی فوجی حل موجود نہیں۔

ایران کے سرکاری اخبار ایران ڈیلی کو دیے گئے انٹرویو میں عباس عراقچی نے کہا کہ یمن کی موجودہ صورتِحال کو ایران سے منسوب کرنا درست نہیں۔

انہوں نے کہا کہ باب المندب میں پیش آنے والے واقعات کی جڑیں یمن، سعودی عرب اور خطے کے دیگر ممالک کے درمیان برسوں سے جاری تنازعات اور مسائل میں موجود ہیں۔

یو این آئی۔ ع ا۔

ویانا، امریکہ اور ایران کے درمیان بڑھتی ہوئی کشیدگی اور عالمی سطح پر سپلائی میں پیدا ہونے والی رکاوٹوں کے باعث خام تیل کی قیمتوں میں نمایاں اضافہ ریکارڈ کیا گیا ہے، اور عالمی مارکیٹ میں خام تیل کے دام 110 ڈالر فی بیرل کے قریب جا پہنچے ہیں۔

مشرقِ وسطیٰ، یورپ اور افریقہ میں خام تیل کے فزیکل کارگوز کی قیمتیں اس ہفتے بڑھ کر گزشتہ دو ماہ کی بلند ترین سطح پر پہنچ گئی ہیں، جن میں سے بعض کارگوز کی قیمت 110 ڈالر فی بیرل کے قریب ریکارڈ کی گئی۔

اس اضافے کی اصل وجہ ایران اور یوکرین کی جنگوں سے جڑے سپلائی کے مسائل ہیں، جن کے باعث خریدار فوری فراہمی کے لیے متبادل ذرائع سے تیل حاصل کرنے کی دوڑ میں لگ گئے ہیں۔

عالمی سطح پر خام تیل کی قیمتوں کے اہم معیار ڈیٹڈ برینٹ نے جمعرات کو کے اعداد و شمار کے مطابق 105.70 ڈالر فی بیرل کی سطح چھو لی۔

رپورٹ کے مطابق مئی کے آخر کے بعد یہ خام تیل کی سب سے بلند ترین سطح ہے اور جون کے آغاز کے بعد پہلی بار قیمتیں 100 ڈالر فی بیرل کی حد سے تجاوز کر گئی ہیں۔

تیل کے معروف بروکر تاماس وارگا کا کہنا ہے کہ سپلائی سے متعلق خدشات ایک بار پھر عالمی مارکیٹ میں توجہ کا مرکز بن گئے ہیں۔

یو این آئی۔ ع ا۔

تہران، ایرانی پاسدارانِ انقلاب نے جوہری پلانٹ پر حملے کا بدلہ لینے کا دعویٰ کرتے ہوئے کہا بحرین میں امریکی کمپنی ایمازون کا ڈیٹا سینٹر اڑا دیا ہے اور حملے میں عمارت ملیا میٹ کردی۔

تفصیلات کے مطابق امریکہ اور ایران کے درمیان جنگ بندی کا معاہدہ ختم ہونے کے بعد مشرقِ وسطیٰ شدید جنگ کی زد میں آگیا۔

ایرانی پاسدارانِ انقلاب نے دارخوین جوہری تنصیب پر ہونے والے حملے کا اینٹ کا جواب پتھر سے دیتے ہوئے بحرین میں قائم امریکی ٹیکنالوجی کمپنی ‘ایمازون’ کے ڈیٹا سینٹر کو تباہ کرنے کا دعویٰ کیا ہے۔

پاسدارانِ انقلاب کا کہنا ہے کہ بحرین میں ایمازون کے ڈیٹا سینٹر پر کیے گئے حملے میں عمارت مکمل طور پر ملیا میٹ ہو گئی تاہم، اس حساس معاملے پر بحرین کی حکومت کی جانب سے ابھی تک کوئی باضابطہ بیان جاری نہیں کیا گیا۔

ایران نے اہواز میں کیے گئے حملوں کے ردعمل میں عراق کے اربیل ایئرپورٹ کو ڈرونز سے نشانہ بنایا، اس کے علاوہ کویت، اردن اور بحرین میں قائم امریکی فوجی اڈوں کو بھی نشانہ بنایا گیا ہے۔

بحرین کے شیخ عیسیٰ ایئر بیس پر ایندھن کے ذخائر، گوداموں اور فوجی رہائش گاہوں کو نشانہ بنایا گیا، جبکہ اردن کے الازرق ایئر بیس پر طیاروں کے ہینگر اور امریکی فوجیوں کی رہائش گاہوں پر حملے کیے گئے۔

ایرانی فوج اور ایئر ڈیفنس حکام نے دعویٰ کیا ہے کہ انہوں نے امریکی جارحیت کا بھرپور جواب دیتے ہوئے ایرانی ایئر ڈیفنس سسٹم نے کرمان کے قریب حملہ آور امریکی کروز میزائل کو فضا میں ہی تباہ کر دیا، ایرانی فوج نے قیشم جزیرے کے قریب ایک امریکی طیارہ مار گرانے کا دعویٰ بھی کیا۔

دوسری جانب جنگ بندی معاہدہ ختم ہونے کے بعد آبنائے ہرمز میں آئل ٹینکروں کی آمدورفت میں نمایاں کمی ریکارڈ کی گئی ہے۔

بین الاقوامی خبر رساں ادارے ‘روئٹرز’ کے مطابق آبنائے ہرمز سے آئل ٹینکروں کی آمدورفت تاریخ کی کم ترین سطح پر پہنچ گئی ہے، اس راستے سے محض 3 ٹینکر گزرے تھے، جبکہ گزشتہ روز صرف ایک آئل ٹینکر نے یہ آبنائے پار کی۔

آبنائے ہرمز کی اس غیر اعلانیہ بندش اور جنگی صورتحال کے باعث عالمی منڈی میں خام تیل کی قیمتیں یکدم بڑھ کر 100 ڈالر فی بیرل تک پہنچ گئی ہیں، جس سے دنیا بھر میں بڑے معاشی بحران کا خدشہ پیدا ہو گیا ہے۔

یو این آئی۔ ع ا۔