بیروت، حزب اللہ کی سیاسی کونسل کے ڈپٹی ہیڈ محمود قماطی نے اسپوتنک کو بتایا کہ حزب اللہ کو امید ہے کہ روس، جس کے ایران سمیت مشرق وسطیٰ کے ممالک کے ساتھ دوستانہ تعلقات ہیں، خطے میں جاری تنازعہ کو حل کرنے میں اہم کردار ادا کر سکتا ہے۔

محمود قماطی نے کہا کہ ’’آج روس، اسلامی جمہوریہ ایران کے ساتھ اپنے تعلقات اور علاقائی سطح پر لبنان اور کئی عرب ممالک کے ساتھ مخلصانہ روابط کی بدولت ایک اہم کردار ادا کر سکتا ہے اور ہمیں ایسی ہی امید ہے۔ لیکن بدقسمتی سے، امریکہ کسی بھی روسی کردار کی راہ میں رکاوٹیں اور دیواریں کھڑی کر رہا ہے۔‘‘

مسٹر قماطی کے مطابق، آج امریکہ اور خاص طور پر ٹرمپ نے ایران پر اثر انداز ہونے اور جنگ بندی کے حصول کے لیے روس کی طرف رجوع کیا ہے۔ انہوں نے مزید کہا کہ ’’جلد یا بدیر، انہیں روس کی ضرورت پڑے گی۔‘‘

حزب اللہ کے رہنما نے خطے میں روس کے موقف، اس کی پالیسیوں اور بین الاقوامی قانون کی پاسداری سمیت انسانی اور ریاستی حقوق کے تحفظ کے عزم کو مثبت قرار دیا۔ انہوں نے افسوس کا اظہار کرتے ہوئے کہا کہ آج یہ خطہ امریکی تسلط، جارحیت، قتل و غارت اور تباہی کی لپیٹ میں ہے۔

یو این آئی۔ م ع

نیویارک،

امریکہ کی مرکزی فوجی کمان (سینٹکام) نے اعلان کیا ہے کہ وہ پیر کے روزہندستانی وقت کے مطابق شام ساڑھے سات بجے ایران کی سمندری ناکہ بندی شروع کرے گی۔

سینٹکام کے بیان کے مطابق، “امریکی افواج صدر کے اعلان کے مطابق 13 اپریل کو امریکی وقت صبح 10 بجے ایران کی بندرگاہوں میں داخل ہونے اور وہاں سے نکلنے والی تمام بحری آمد و رفت کو روکنے کے لیے کارروائی شروع کریں گی۔”

بیان میں کہا گیا ہے کہ یہ ناکہ بندی بلا امتیاز ہوگی، یعنی تمام ممالک کے جہازوں پر یکساں طور پر نافذ ہوگی جو ایران کی بندرگاہوں یا اس کے ساحلی علاقوں، بشمول خلیج فارس اور خلیج عمان کی بندرگاہوں، میں آتے جاتے ہیں۔

تاہم، سینٹکام نے واضح کیا کہ آبنائے ہرمز سے گزرنے والے ان جہازوں کی نقل و حرکت میں رکاوٹ نہیں ڈالی جائے گی جو ایرانی بندرگاہوں کے علاوہ دیگر ممالک کی بندرگاہوں کے لیے جا رہے ہوں۔

دریں اثنا، اسلام آباد میں ایران اور امریکہ کے درمیان مذاکرات کسی نتیجے پر نہیں پہنچ سکے۔ اس کے بعد امریکی صدر ڈونلڈ ٹرمپ نے اتوار کو اعلان کیا کہ امریکہ آبنائے ہرمز سے گزرنے والے ان تمام جہازوں کی نگرانی اور روک تھام کرے گا جو ایران کو راستہ استعمال کرنے کے لیے ادائیگی کرتے ہیں۔

یو این آئی اسپوتنک، ایم جے

ماسکو، امریکی صدر ڈونلڈ ٹرمپ کی جانب سے آبنائے ہرمز کی ناکہ بندی کے اعلان کے بعد عالمی منڈی میں تیل کی قیمتوں میں 8 فیصد اضافہ ہو گیا ہے، جس کے بعد برینٹ کروڈ کی قیمت 102 ڈالر فی بیرل سے تجاوز کر گئی ہے۔ تجارتی اعداد و شمار کے مطابق یہ حالیہ برسوں کا بڑا اضافہ ہے۔

اتوار کے روز جی ایم ٹی 22:01 بجے (ہندوستان میں پیر کی صبح 3:31 بجے)، جون کے لیے برینٹ کروڈ کی قیمت 7.76 فیصد بڑھ کر 102.59 ڈالر فی بیرل ہو گئی، جبکہ مئی کے لیے ڈبلیو ٹی آئی 8.2 فیصد اضافے کے ساتھ 104.51 ڈالر فی بیرل پر پہنچ گیا۔

سنیچر کے روز اسلام آباد میں ایران اور امریکہ کے درمیان مذاکرات کا آغاز ہوا تھا۔ اس سے قبل بدھ کی رات صدر ٹرمپ نے تہران کے ساتھ دو ہفتوں کی جنگ بندی کے معاہدے کا اعلان کیا تھا۔ اتوار کی صبح امریکی وفد کے سربراہ، نائب صدر جے ڈی وینس نے اعلان کیا کہ طویل مذاکرات کے باوجود ایران اور امریکہ کسی معاہدے پر پہنچنے میں ناکام رہے ہیں، جس کے بعد امریکی وفد بغیر کسی ڈیل کے وطن واپس روانہ ہو رہا ہے۔

اتوار کے روز صدر ٹرمپ نے اعلان کیا کہ امریکہ آبنائے ہرمز میں داخل ہونے اور وہاں سے نکلنے والے تمام جہازوں کی ناکہ بندی شروع کر دے گا۔ انہوں نے امریکی بحریہ کو ان تمام جہازوں کو ٹریک کرنے اور روکنے کی ہدایت بھی دی جنہوں نے آبنائے سے گزرنے کے لیے ایران کو ادائیگی کی ہے۔

امریکی سینٹرل کمانڈ نے اعلان کیا ہے کہ پیر کے روز جی ایم ٹی 14:00 بجے (ہندوستانی وقت کے مطابق شام 7:30 بجے) سے ایران کی بندرگاہوں کی طرف جانے اور وہاں سے نکلنے والی ہر قسم کی بحری نقل و حرکت کی ناکہ بندی کی جائے گی۔

یو این آئی۔ م ع