دوحہ، قطر نے ایک بار پھر ایران امریکہ مذاکرات کے لیے پاکستانی ثالثی کی بھرپور حمایت کا اعلان کر دیا۔

ترجمان وزارت خارجہ ماجد الانصاری نے ہفتہ وار بریفنگ میں کہا کہ قطر مذاکرات کے عمل میں پاکستان کو سپورٹ کرتا ہے اور مذاکرات کے دائرے میں وسعت کو ضروری نہیں سمجھتا، قطر ثالثوں کے ذریعے آبنائے ہُرمُز کھلوانے کے لیے کوششیں کر رہا ہے۔ آبنائے ہُرمُز کی بندش کے سوال پر انہوں نے کہا کہ آبنائے ہُرمُز پہلے دن سے ہی بند نہیں ہونی چاہیے تھی اور اب بھی قطر سمجھتا ہے کہ خطے میں جاری تنازعات کے باوجود آبنائے ہُرمُز فوری کھلنی چاہیے۔

ماجد الانصاری نے کہا کہ پاکستان بطور ثالث شاندار کام کر رہا ہے، قطر پاکستان کی ثالثی کی مکمل حمایت کرتا ہے۔ انہوں نے مزید کہا کہ خطے میں اور خطے سے باہر اپنے اتحادیوں کے ساتھ مل کر قطر مذاکرات کاری کے عمل میں بھرپور تعاون کر رہا ہے لیکن ثالثی کے لیے قطر کو پاکستان پر مکمل اعتماد ہے۔ قطر کا پہلے دن سے موقف ہے کہ کسی بھی تنازع کو بات چیت کے ذریعے حل ہونا چاہیے، مذاکراتی عمل پر یقین ہے اور ہم سفارتی حل کے حامی ہیں۔ اس سوال پر کہ ایران نے آبنائے ہُرمُز کی بندش کے خاتمے کو ایرانی ایٹمی تنازع کو موخر کرنے سے مشروط کیا ہے۔

ترجمان نے جواب دیا کہ وہ ایران امریکا تنازع کے حل کے لیے’جامع سمجھوتے‘ کے حق میں ہے، قطر کی تشویش خطے کی سلامتی پر ہے کیونکہ ایرانی حملوں نے خطے کے استحکام پر سوالات کھڑے کردیے تھے۔

یو این آئی۔ ع ا۔

ویانا، عالمی مارکیٹ میں برینٹ خام تیل کی قیمت میں 3.86 فیصد اضافہ ہوا جس کے بعد قیمت 112.39 ڈالر فی بیرل ہوگئی ہے۔

امریکی ویسٹ ٹیکساس خام تیل کی قیمت میں 5.14 فیصد اضافہ ہوا جس کے بعد نئی قیمت 101.37 ڈالر فی بیرل پر پہنچ گئی ہے۔ اس سے قبل برینٹ خام تیل کی قیمت میں 1.68 فیصد اضافہ ریکارڈ کیا گیا جس کے بعد اس کی قیمت 110.03 ڈالرز فی بیرل کی سطح عبور کر گئی تھی۔

امریکی خام تیل کی قیمت 2.29 فیصد بڑھ کر 98.63 ڈالرز فی بیرل تک پہنچ گئی تھی۔ اعداد و شمار کے مطابق جنگ شروع ہونے سے پہلے یہ تیل صرف 67.02 ڈالرز پر دستیاب تھا، جو اب تقریباً 100 ڈالرز کے قریب پہنچ چکا ہے جبکہ جنگ سے پہلے برینٹ خام تیل کی قیمت 73 ڈالرز فی بیرل تھی، جس میں اب تک 37 ڈالرز سے زائد کا ہوشربا اضافہ ہو چکا ہے۔

ماہرینِ معاشیات کا کہنا تھا کہ تیل کی قیمتوں میں اس مسلسل اضافے سے عالمی سطح پر مہنگائی کا ایک نیا طوفان آ سکتا ہے۔

خاص طور پر وہ ممالک جو اپنی توانائی کی ضروریات کے لیے درآمدی تیل پر منحصر ہیں، ان کے تجارتی خسارے میں غیر معمولی اضافے کا خدشہ ہے، جس کا بوجھ براہِ راست عوام پر منتقل ہوگا۔

یو این آئی۔ ع ا۔

نیویارک، آبنائے ہرمز سے گزرنے کے لیے ایران کی جانب سے فیس کی وصولی دنیا کے لیے ناقابل برداشت ہو گئی ہے، امریکہ سے لے کر اقوام متحدہ تک آوازیں اٹھنے لگی ہیں۔

اطلاعات کے مطابق ایران نے آبنائے ہرمز پر عملی طور پر اپنا کنٹرول قائم کرتے ہوئے فیس وصول کرنا شروع کر دیا ہے، اگرچہ اس کی شرح اور قانونی حیثیت ابھی بین الاقوامی طور پر متنازع ہے۔

امریکی وزیر خارجہ مارکو روبیو نے فاکس نیوز سے گفتگو کرتے ہوئے کہا ایران کی جانب سے آبنائے ہرمز پر فیس عائد کرنے کی کوشش برداشت نہیں کر سکتے۔ انھوں نے کہا بین الاقوامی بحری گزرگاہوں کو یرغمال بنانے کی کوشش برداشت نہیں کریں گے، آبنائے ہرمز کھلا ہونے کا ایرانی دعویٰ حقیقت پر مبنی نہیں ہے، ایران سے اجازت لینا یا اسے ادائیگی کرنا آبنائے ہرمز کا کھلا ہونا نہیں ہے۔

مارکو روبیو کا کہنا تھا کہ ایران کی مرضی اور ادائیگی کے عوض بحری راستہ استعمال کرنا معمول نہیں ہو سکتا، ایران یہ فیصلہ نہیں کر سکتا کہ بین الاقوامی گزرگاہ کون استعمال کرے گا اور کون نہیں۔

اقوام متحدہ کے سیکریٹری جنرل انتونیو گوتریس نے کہا کہ آبنائے ہرمز کے ذریعے جہاز رانی کے حقوق اور آزادیوں کا احترام کیا جانا چاہیے، فریقین سے اپیل ہے کہ آبنائے ہرمز کھولیں اور جہازوں کو گزرنے دیں، کوئی ٹول نہیں کوئی امتیاز نہیں، تجارت دوبارہ شروع ہونے دیں۔ یو این سیکریٹری جنرل نے اپیل کی کہ عالمی معیشت کو سانس لینے دیں، محفوظ اور بلا روک ٹوک راستہ ہی معاشی اور انسانی ضرورت ہے۔ امریکی نمائندہ برائے سلامتی کونسل نے رد عمل میں کہا کہ ایران کی جانب سے جہاز گزرنے کی فیس رشوت کے برابر ہے، یہ آبنائے ایران کی ملکیت نہیں ہے، اس نے خلیجی ریاستوں پر ہزاروں میزائل اور ڈرون داغے اور اپنے خلیجی پڑوسیوں پر گولہ باری کی ہے۔

امریکی نمائندے نے کہا ایران کو آبنائے ہرمز کو سودے بازی کے طور پر استعمال کرنے کا حق نہیں ہے، ایران کو آبنائے میں مہم جوئی کی اجازت نہیں دی جا سکتی۔ ادھر الجزیرہ کے مطابق ایک اعلیٰ ایرانی عہدیدار نے کہا ہے کہ مجوزہ قومی قانون کے تحت، جو اس آبی گزرگاہ کے انتظام سے متعلق ہے، آبنائے ہرمز کی ذمہ داری اب ان کے ملک کی مسلح افواج کے سپرد ہوگی۔

دوسری طرف روس کے اقوامِ متحدہ میں سفیر واسیلی نیبینزیا نے کہا کہ ایران کو مکمل حق حاصل ہے کہ وہ آبنائے ہرمز میں آمد و رفت کو محدود کرے اور اس پر کنٹرول رکھے۔ نیبینزیا نے مزید مغربی ممالک کا موازنہ منافقوں اور قزاقوں سے کرتے ہوئے یورپی ممالک کو بھی تنقید کا نشانہ بنایا جو بحیرۂ اسود میں روسی تجارتی جہازوں پر یوکرینی حملوں کی حمایت کر رہے ہیں۔

سفیر کا کہنا تھا کہ جنگ کے دوران اگر کسی ساحلی ریاست پر حملہ ہو رہا ہو تو وہ اپنی علاقائی سمندری حدود میں سیکیورٹی کے پیشِ نظر جہاز رانی کو محدود کر سکتی ہے۔

قزاقوں کے برعکس، جو اپنے جہازوں پر کھوپڑی اور ہڈیوں والا سیاہ جھنڈا لہراتے ہیں، مغربی ممالک اپنی غیر قانونی کارروائیوں کو یک طرفہ جبری اقدامات کے حوالے دے کر چھپانے کی کوشش کر رہے ہیں۔ فی بیرل کی بنیاد پر تخمینہ: متعدد اطلاعات کے مطابق تیل بردار جہازوں سے فی بیرل تیل کے حساب سے ایک امریکی ڈالر وصول کرنے کی تجویز ہے۔ اس حساب سے ایک بڑے ٹینکر (VLCC) سے تقریباً 20 لاکھ ڈالر تک وصول کیے جا سکتے ہیں۔

ایرانی میڈیا کے مطابق اس فیس سے ایران کو سالانہ 100 ارب ڈالر تک کی آمدنی ہوسکتی ہے، جو ملک کی جی ڈی پی کا 20-25 فی صد ہے۔

یاد رہے کہ ایران کے نائب وزیر خارجہ نے اپریل 2026 کے اوائل میں بتایا تھا کہ فیس کی شرح کا تعین ابھی مکمل نہیں ہوا اور اس پر کام جاری ہے۔ البتہ اسی ماہ کے آخر میں ایران نے یہ اعلان کیا کہ اسے پہلی قسط موصول ہو چکی ہے۔ ایران نے اس فیس کو وصول کرنے کے لیے ایرانی ریال، چینی یوآن، امریکی ڈالر اور یورو میں اکاؤنٹ کھولے ہیں۔ تاہم امریکی پابندیوں کے پیش نظر، ادائیگی بنیادی طور پر ایرانی ریال، یوآن یا کرپٹو کرنسی میں کرنے کی ہدایت کی گئی ہے۔

یو این آئی۔ ع ا۔