نئی دہلی، کانگریس پارلیمانی پارٹی کی صدر سونیا گاندھی نے ایک نجی اخبار میں شائع اپنے مضمون کے ذریعے مرکزی حکومت پر خواتین کے ریزرویشن اور حد بندی کے معاملے پر شدید تنقید کی ہے محترمہ گاندھی نے پیر کو یہاں واضح طور پر کہا کہ موجودہ وقت میں اصل تشویش خواتین کا ریزرویشن نہیں، بلکہ مجوزہ حد بندی ہے، جسے انہوں نے “انتہائی خطرناک” اور “آئین پر حملہ” قرار دیا ہے۔ اپنے مضمون میں انہوں نے خبردار کیا کہ پارلیمنٹ کے خصوصی اجلاس میں جس طرح سے حد بندی کا معاملہ سامنے آ رہا ہے، وہ جمہوری توازن کو متاثر کر سکتا ہے۔ انہوں نے الزام لگایا کہ حکومت جلد بازی میں اس موضوع کو آگے بڑھا رہی ہے، جس کے پیچھے سیاسی فائدہ حاصل کرنے کا ارادہ ہو سکتا ہے۔

انہوں نے وزیر اعظم نریندر مودی کو نشانہ بناتے ہوئے کہا کہ اپوزیشن سے حمایت تو مانگی جا رہی ہے لیکن اس اہم معاملے پر شفافیت نہیں برتی جا رہی۔ انہوں نے یہ بھی کہا کہ اپوزیشن کی جانب سے کل جماعتی اجلاس کے مطالبے کو مسلسل نظر انداز کیا گیا ہے۔ محترمہ گاندھی نے یاد دلایا کہ 2023 میں پارلیمنٹ سے منظور شدہ ‘ناری شکتی وندن ادھینیم’ کے تحت لوک سبھا اور اسمبلیوں میں خواتین کے لیے 33 فیصد ریزرویشن کی گنجائش پہلے ہی کی جا چکی ہے۔ تاہم، اس کے نفاذ کے لیے مردم شماری اور حد بندی ضروری ہے۔

انہوں نے سوال اٹھایا کہ اگر حکومت 2029 سے خواتین کےلیئے ریزریشن نافذ کرنا چاہتی ہے، تو یہ فیصلہ پہلے کیوں نہیں کیا گیا؟ ساتھ ہی انہوں نے کہا کہ لوک سبھا کی نشستوں کی تعداد بڑھانے کا فیصلہ صرف ریاضیاتی بنیاد پر نہیں، بلکہ سیاسی توازن کو مدنظر رکھ کر ہونا چاہیے، تاکہ آبادی پر قابو پانے میں آگے رہنے والی ریاستوں (خاص طور پر جنوبی ریاستوں) کو نقصان نہ ہو۔

اس کے علاوہ انہوں نے ذات پات پر مبنی مردم شماری میں تاخیر پر بھی حکومت کو تنقید کا نشانہ بنایا اور کہا کہ بہار اور تلنگانہ جیسی ریاستوں نے کم وقت میں سروے کر کے یہ ثابت کر دیا ہے کہ یہ کام ممکن ہے۔

آخر میں انہوں نے 2021 کی مردم شماری ملتوی کرنے کے فیصلے پر بھی سوال اٹھاتے ہوئے کہا کہ اس کی وجہ سے کروڑوں لوگ سرکاری اسکیموں کے فوائد سے محروم رہ گئے۔ انہوں نے حکومت سے اپیل کی کہ ایسے اہم فیصلوں پر جلد بازی کے بجائے اپوزیشن کے ساتھ تفصیلی تبادلہ خیال کیا جائے اور پورے عمل کو جمہوری بنایا جائے۔

قابل ذکر ہے کہ خواتین کے ریزرویشن کے معاملے پر 16 سے 18 اپریل تک پارلیمنٹ کا تین روزہ خصوصی اجلاس طلب کیا گیا ہے۔

یواین آئی ۔ایف اے

نئی دہلی، ایرانی وزیر خارجہ عباس عراقچی نے اسلام آباد مذاکرات کی ناکامی کا ذمہ دار امریکہ کو ٹھہراتے ہوئے کہا کہ ایران ایم او یو پر دستخط کے قریب پہنچ چکا تھا، تاہم اسے ’’سخت ترین مطالبات، بدلتے ہوئے اہداف اور ناکہ بندی‘‘ کا سامنا کرنا پڑا۔

عباس عراقچی نے پیر کے روز سوشل میڈیا پلیٹ فارم ایکس پر اپنے بیان میں کہا کہ ’’کوئی سبق نہیں سیکھا گیا۔ خیر سگالی سے خیر سگالی جنم لیتی ہے اور دشمنی سے دشمنی۔‘‘ ایرانی وزیر خارجہ نے کہا کہ گزشتہ 47 برسوں میں اعلیٰ ترین سطح پر ہونے والے ان مذاکرات میں ایران نے جنگ کے خاتمے کے لیے امریکہ سے نیک نیتی کے ساتھ بات چیت کی، تاہم “اسلام آباد ایم او یو” کے قریب پہنچنے پر امریکی جانب سے سخت شرائط اور ناکہ بندی کے اعلان کا سامنا کرنا پڑا۔

واضح رہے کہ یہ بیان امریکی صدر ڈونلڈ ٹرمپ کے اس اعلان کے بعد سامنے آیا ہے جس میں انہوں نے مذاکرات کی ناکامی کا حوالہ دیتے ہوئے ایران کی بحری ناکہ بندی کا حکم دیا ہے۔

یو این آئی۔ م ع

ہاپوڑ، اتر پردیش کے ضلع ہاپوڑ میں اتوار کی دیر رات باراتیوں سے بھری ایک بس اور ٹرک کے درمیان خوفناک تصادم کے نتیجے میں کم از کم چھ افراد ہلاک اور سات دیگر شدید زخمی ہو گئے۔

یہ حادثہ رات تقریباً 1:30 بجے دھولانہ-گلاؤٹھی روڈ پر اس وقت پیش آیا جب بس شادی کی تقریب سے واپس آ رہی تھی۔ بارات غازی آباد کے علاقے داسنا سے بلند شہر کے علاقے گلاؤٹھی گئی تھی اور واپسی کے سفر کے دوران اس حادثے کا شکار ہو گئی۔

پولیس حکام کے مطابق ٹکر اتنی شدید تھی کہ بس پلٹ گئی۔ کئی مسافر بس کے اندر پھنس گئے جس سے جائے وقوعہ پر افراتفری پھیل گئی۔ مقامی پولیس اور راہگیروں نے فوری طور پر ریسکیو آپریشن شروع کیا اور بس کے شیشے توڑ کر پھنسے ہوئے لوگوں کو باہر نکالا۔ ہلاک ہونے والوں میں دولہے کے والد بھی شامل ہیں۔ زخمیوں کو قریبی ہسپتالوں میں منتقل کر دیا گیا ہے جہاں ان کا علاج جاری ہے۔

ضلع مجسٹریٹ ابھیشیک پانڈے، ایس پی کنور گیاننجے سنگھ اور چیف میڈیکل افسر ڈاکٹر وید کمار نے جائے حادثہ کا دورہ کیا اور بعد ازاں ہسپتال جا کر زخمیوں کی عیادت کی۔

ایس پی گیاننجے سنگھ نے پیر کی صبح بتایا کہ پولیس ٹیموں نے بروقت پہنچ کر تحقیقات اور امدادی کام شروع کی۔ سڑک سے ٹرک کو ہٹا دیا گیا ہے اور ٹریفک کی روانی بحال کر دی گئی ہے۔ بس میں کل 12 مسافر سوار تھے۔ ایک ہلاک ہونے والے شخص، جس کے بارے میں شبہ ہے کہ وہ ڈرائیور تھا، کی ابھی تک شناخت نہیں ہو سکی ہے۔

حکام کا کہنا ہے کہ متاثرہ خاندانوں کی آمد کے بعد قانونی کارروائی شروع کی جائے گی۔ حادثے کی اصل وجہ جاننے کے لیے مزید تحقیقات جاری ہیں۔

یو این آئی۔ م ع