جموں وکشمیر کی موجودہ سیکورٹی صورتحال بد سے بدتر، بدانتظامی جموں وکشمیر کا نیا معمول

سرینگر:نیشنل کانفرنس ہیڈ کواٹر سرینگر پر ایک غیر معمولی اجلاس کے دوران پارٹی کے کئی لیڈران نے خطاب کرتے ہوئے کہا ہے کہ جموں وکشمیر کی موجودہ سیکورٹی صورتحال بد سے بدتر ہوتی جارہی ہے۔انہوں نے مل ٹنسی کے گراف میں روز بہ روز اضافہ ہوتا جارہا ہے، تعمیر و ترقی کا کہیں نام و نشان نہیں، اقتصادی بدحالی نے یہاں کے لوگوں کو مکمل طو رپر اپنی لپیٹ میں لے لیا۔

کشمیر نیوز سروس کے مطابق جموں وکشمیر کی موجودہ سیکورٹی صورتحال بد سے بدتر ہوتی جارہی ہے، مل ٹنسی کے گراف میں روز بہ روز اضافہ ہوتا جارہا ہے، تعمیر و ترقی کا کہیں نام و نشان نہیں، اقتصادی بدحالی نے یہاں کے لوگوں کو مکمل طو رپر اپنی لپیٹ میں لے لیا ہے، بے روزگارنوجوان کی تعداد حد سے تجاوز کرگئی، عوامی حکومت کی غیر موجودگی اور انتظامی انتشار ور خلفشار کا خمیازہ عام لوگوں کو بھگتنا پڑ رہا ہے۔

ان باتوں کا اظہار نیشنل کانفرنس کے رکن پارلیمان ایڈوکیٹ محمد اکبر لون پارٹی ہیڈکوارٹر پر ایک اجلاس سے خطاب کرتے ہوئے کیا۔ اجلاس میں صوبائی سکریٹری ایڈوکیٹ شوکت احمد میر کے علاوہ سینئر لیڈران پیر آفاق احمد، سید توقیر احمد، سید رفیق شاہ، ارشاد رسول کار، شوکت احمد وٹالی کے علاوہ دیگر عہدیداران بھی موجود تھے۔

محمد اکبر لون نے کہا کہ 5اگست کے غیر آئینی اور غیر جمہوری فیصلے کے بعد یہاں کا ہر ایک شعبہ متاثر ہوا اور کشمیر کو دہائیوں پیچھے دھکیل دیا گیا۔ انہوں نے کہا کہ مرکزی حکومت کو نہ صرف 5اگست کے غیر دانشمندانہ فیصلوں کو منسوخ کرنا چاہئے بلکہ جموں وکشمیر کی معیشت کو ہوئے نقصان کی بھرپائی کرنے کیلئے بھی مالی پیکیج کا اعلان کر چاہئے۔

اُن کا کہنا تھا کہ اگر اب بھی مرکزی حکومت کی آنکھیں نہ کھلیں تو اس سے بڑی بدقسمتی کی کیا بات ہوسکتی ہے۔ ڈیلی ویجروں، کیجول لیبروں اور دیگر عارضی ملازمین کی حالت زار پر تشویش اور افسوس کا اظہار کرتے محمد اکبر لون نے کہا کہ جموں و کشمیر کے 60ہزار عارضی ملازمین سالہاسال سے اپنی مستقلی کے منظر ہیں۔ ان عارضی ملازمین کو زبردست مشکلات کا سامنا ہے۔ عارضی ملازمین کی مستقلی ایک انسانی مسئلہ ہے اور اسے جنگی بنیادوں پر حل کیا جانا چاہئے۔

انہوں نے کہا کہ عمر عبداللہ کی سربراہی والی حکومت نے اگرچہ ان عارضی ملازمین کی مستقلی کیلئے اقدامات کرنے کی حتمی کوشش کی لیکن مخلوط سرکار میں شامل اتحادیوں نے اس میں مختلف اڑچنیں پیدا کیں۔

محمد اکبر لون نے عارضی ملازمین کی فوری مستقلی کیلئے ٹھوس اور کارگر اقدامات اٹھانے کی ضرورت پر زور دیا۔ اجلاس سے خطاب کرتے ہوئے صوبائی سکریٹری ایڈوکیٹ شوکت احمد میر نے میں کشمیر ہاؤس کی تقسیم کو بدقسمتی سے تعبیر کرتے ہوئے کہا کہ ریاستی انتظامیہ اور مرکزی حکومت کو ایسے اقدامات کرنے سے گریز کرنا چاہئے اور اُس وقت تک ایسے فیصلوں سے اجتناب کیا جانا چاہئے جب تک عدالت عظمیٰ کا فیصلہ نہیں آجاتا۔

کشمیر ہاؤس کی لداخ اور جموں وکشمیر میں تقسیم کو بھی سراسر ناانصافی قرار دیتے کہا کہ لداخ کی آبادی اڑھائی لاکھ ہے جبکہ جموں وکشمیر کی آبادی ایک کروڑ 25لاکھ ہے۔ انہوں نے کہا کہ کشمیر ہاؤس کو دو برابر حصوں میں تقسیم کرنا کہاں کا انصاف ہے۔ مرکز کو اگر تقسیم کا یہی پیمانہ رکھنا ہے تو پھر قرضوں کو بھی برابر تقسیم کیا جانا چاہئے تھا۔ ایڈوکیٹ شوکت احمد میر نے کہا کہ ہم ایسے اقدامات کی شدید مذمت کرتے ہیں اور اس فیصلے کی فوری واپسی کا مطالبہ کرتے ہیں۔