ماسکو، روسی وزیر خارجہ سرگئی لاوروف نے کہا ہے کہ امریکی مداخلتیں صرف تیل کے لیے ہیں، واشنگٹن عالمی قوانین کو کمزور کر رہا ہے۔

روسی وزیر خارجہ سرگئی لاوروف نے امریکا کی خارجہ پالیسی اور دیگر ممالک میں فوجی مداخلتوں پر شدید تنقید کرتے ہوئے کہا ہے کہ واشنگٹن کی تمام تر فوجی کارروائیاں صرف توانائی کے وسائل اور تیل کے حصول کے لیے ہوتی ہیں۔

روسی وزیر خارجہ نے اپنے بیان میں کہا کہ امریکا اپنی ان مداخلتوں کو چھپاتا بھی نہیں ہے جو کہ مکمل طور پر تیل سے جڑی ہوئی ہیں، جس کی واضح مثالیں ایران اور وینزویلا کی صورت میں سب کے سامنے ہیں۔ روسی وزیرخارجہ کا کہنا تھا کہ امریکہ عالمی توانائی منڈیوں پر اپنا غلبہ قائم کرنے کی پالیسی پر عمل پیرا ہے اور اس مقصد کے حصول کے لیے وہ کسی بھی دوسرے ملک پر حملہ کرنے سے گریز نہیں کرتا۔

سرگئی لاوروف نے مزید کہا کہ واشنگٹن اپنے مفادات کی خاطر بغاوتوں، اغوا اور حتیٰ کہ عالمی رہنماؤں کے قتل جیسے غیر قانونی طریقے بھی اختیار کرتا ہے۔ ان کا کہنا تھا کہ امریکی طرز عمل کی وجہ سے بین الاقوامی قوانین کی حیثیت کمزور ہو رہی ہے اور دنیا میں اب “جس کی لاٹھی اس کی بھینس” کا تصور غالب آتا جا رہا ہے، جو کہ عالمی امن کے لیے خطرہ ہے۔

یو این آئی۔ ع ا۔

تہران، ایران نے واضح کیا ہے کہ اسلام آباد میں امریکہ کے ساتھ کسی ملاقات کا منصوبہ نہیں ہے۔

ایرانی وزارت خارجہ کے ترجمان اسماعیل بقائی نے کہا کہ “ایران اور امریکہ کے درمیان کوئی ملاقات طے نہیں ہے، ایران پاکستان کو اپنے خیالات سے آگاہ کرے گا۔”

انہوں نے کہا کہ وزیر خارجہ عباس عراقچی سرکاری دورے پر اسلام آباد پہنچے ہیں، جہاں وہ پاکستان کی اعلیٰ قیادت سے ملاقات کریں گے۔ یہ دورہ خطے میں امن کی بحالی اور جاری کشیدگی پر مشاورت کے مقصد سے کیا جا رہا ہے۔

مسٹر عراقچی کا یہ دورہ ان کے علاقائی دورے کا حصہ ہے جس میں اسلام آباد کے ساتھ مسقط اور ماسکو بھی شامل ہیں۔ اس دوران علاقائی پیش رفت اور موجودہ تنازعہ کی صورتحال پر تبادلہ خیال کیا جارہا ہے۔

دریں اثنا، امریکہ کی جانب سے خصوصی ایلچی سٹیو وٹ کوف اور جیرڈ کشنر کو پاکستان بھیجے جانے کی بات کہی گئی ہے۔ نائب صدر جے ڈی وینس اس دورے کا حصہ نہیں ہوں گے۔

ایران نے ابھی تک اس بات کی تصدیق نہیں کی ہے کہ اس کا وفد امریکی حکام کے ساتھ براہ راست کسی بات چیت میں شامل ہو گا یا نہیں۔

یواین آئی۔الف الف

تہران، ایرانی پارلیمنٹ اسپیکر باقر قالیباف کا کہنا ہے کہ ڈالر سواپ اور دیگر مالیاتی اقدامات کا مقصد امریکی اثاثوں کی بے ہنگم فروخت کو بند کرنا ہے۔

غیر ملکی ذرائع ابلاغ کے مطابق ایرانی پارلیمنٹ اسپیکر باقر قالیباف کا کہنا تھا کہ امریکہ میں ادارہ جاتی سرمایہ کاروں پر فروخت کی حد مقرر کر دی گئی ہے۔ انہوں نے کہا کہ مزید کشیدگی بڑھنے پر مالیاتی راستے مزید محدود ہو سکتے ہیں۔

دوسری جانب روس میں ایرانی سفیر کاظم جلالی کا کہنا ہے کہ تہران مذاکرات اور جنگ دونوں کے لیے تیار ہے، ایران کبھی مذاکرات سے پیچھے نہیں ہٹا۔ کاظم جلالی کا کہنا تھا کہ امریکہ کی تاریخ رہی ہے ہمیشہ معاہدوں کے بعد اسے توڑ دیتا ہے۔ انہوں نے کہا کہ ایران کیساتھ جوہری معاہدہ توڑنے کا ذمہ دار واشنگٹن ہے، تہران کا مؤقف واضح ہے دباؤ میں مذاکرات کامیاب نہیں ہوسکتے۔

یو این آئی۔ ع ا۔