4 کا تعلق کشمیر سے،2کا تعلق خطہ لداخ سے
کامیاب کشمیری طلبہ:نادیہ بیگ ساکنہ کپوارہ، آفتاب ساکنہ ترہگام کپوارہ، سبزار احمد گنائی ساکنہ کوکرناگ،ماجد اقبال خان ساکنہ شانگس اننت ناگ
خبراردو:-

سرینگر: یونین پبلک سروس کمیشن (یو پی ایس سی) امتحانات کے نتائج ظاہرکئے گئے۔ملکی سطح کے اس مسابقتی امتحانات میں جموں وکشمیر کے 16نوجوانوں نے کامیابی کا تاج اپنے نام کرایا ہے جن میں سے2نوجوانوں کا تعلق لداخ سے ہے۔کامیاب طلبہ میں 4 کاتعلق کشمیر سے ہے جن میں کپوارہ کی23سالہ طالبہ بھی شامل ہیں۔

یاد رہے کہ 2009کے یونین پبلک سروس کمیشن (یو پی ایس سی) کے امتحان میں ڈاکٹر شاہ فیصل نے امتیازی پوزیشن حاصل کی تھی۔کشمیر نیوز سروس کے مطابق کشمیری نوجوان پھر ایک بار سرخیوں میں چھا گئے ہیں۔ اس مرتبہ کشمیری نوجوانوں نے پین اور کاغذ کے ذریعہ اپنی قابلیت کا زبردست مظاہرہ کیا ہے۔ یونین پبلک سرویس کمیشن (یو پی ایس سی) امتحانات کامیاب کرنے والے 16 نوجوان جموں و کشمیر کے طلبہ ہیں۔

ایک میڈیا رپورٹ کے مطابق یونین پبلک سروس کمیشن (یو پی ایس سی) نے منگل کے روز سول سروسز امتحان2019 کے حتمی نتائج کا اعلان کیا گیا، جس میں پردیپ سنگھ نے پہلی، جتن کشور نے دوسری اور پرتبھا ورما نے تیسری پوزیشن حاصل کی۔اس بارمجموعی طور پر829 امیدواروں کا انتخاب کیا گیا ہے۔

ان امیدواروں میں جنرل زمرہ کے 304، معاشی طور پر کمزور طبقات سے78، دیگر پسماندہ طبقات کے 251و 129 درج فہرست ذات اور درج فہرست قبائل کے 67 امیدوار شامل ہیں۔یو پی ایس سی نے ستمبر2019 میں سول سروس کے لئے تحریری امتحان لیا۔

رواں سال فروری اور اگست کے درمیان کئے گئے انٹرویو کے بعد یہ نتائج جاری کئے۔ امتحان کی بنیاد پرکمیشن نے انڈین ایڈمنسٹریٹیوسروس (آئی اے ایس)، انڈین فارن سروس (آئی ایف ایس)، انڈین پولیس سروس (آئی پی ایس) اور سنٹرل سروسز گروپ اے اور گروپ بی کے امیدواروں کی تقرری کی سفارش کی ہے۔انڈین ایڈ منسٹریٹیو سروس (آئی اے ایس) کے امتحانات میں جموں وکشمیر کے جن16 نوجوانوں نے یو پی ایس سی امتحانات میں کامیابی حاصل کی،اُن میں سے4تعلق کشمیر سے ہے جبکہ2کا تعلق خطہ لداخ سے ہے۔

کامیاب طلبہ میں جموں کے ابھیشیک آگستسیا(رینک۔38)، سنی گتا (رینک148)، دیو اہوتی(رینک177) ساکنان جموں، پارتھ گپتا (رینک 240)،اسرار احمد کچلو (رینک 248)، آصف یوسف تانترے (328)،نامگیال انگمو (رینک323)،نادیہ بیگ (رینک 350) ساکنہ کپوارہ، آفتاب رسول (رینک412)ساکنہ ترہگام کپوارہ، سبزار احمد گنائی (رینک628) ساکنہ کنڈی گاؤں گی بوم کوکرناگ،ماجد اقبال خان (رینک 638) ساکنہ شانگس اننت ناگ، ستن زین ونگال(رینک 716)،ریس حسین (رینک747)، محمد نواس شریف الدین (رینک 778) اور سید جنید عادل (رینک822) شامل ہیں۔کپوارہ کی23سالہ طالبہ نے کے این ایس کیساتھ بات کرتے ہوئے اپنی کامیابی کا سہرا والدین اور بھائی کے سر باندھا۔نادیہ بیگ والدین سرکاری اساتذہ ہیں جبکہ انہوں نے اکنا مکس (اونرس) میں جامعہ ملیہ اسلامیہ نئی دہلی سے گریجویشن کی۔

نادیہ نے یو پی ایس سی امتحانات میں دوسری مرتبہ کوشش کرکے کامیابی حاصل کی۔پنزوا کپوارہ سے تعلق رکھنے والی نادیہ بیگ نے کہا ’میرے پاس اس وقت اپنے جذبات کا اظہار کرنے کیلئے الفاظ نہیں ہیں‘۔ان کا کہناتھا کہ 12ویں جماعت پاس کرنے کیساتھ ہی انہوں نے یو پی ایس سی امتحانات میں کامیابی کا عزم کر رکھا تھا۔

انہوں نے 12ویں جماعت تک کپوارہ کے سرکاری اسکول سے تعلیم حاصل کی اور اعلیٰ تعلیم کیلئے جامعہ ملیہ اسلامیہ میں داخل لیا اور سال2017میں گر یجویشن مکمل کی۔نادیہ کی دو بہنیں سکمز سے ایم بی بی ایس کررہی ہیں جبکہ اُنکے بھائی نے بی بی اے مکمل کر لیا ہے جبکہ وہ یو پی ایس سی امتحانات کی تیاری کررہے ہیں۔نادیہ پہلی مرتبہ سال2018میں یو پی ایس سی امتحانات میں حصہ لیا،لیکن کامیاب نہیں رہیں،البتہ ہمت اور حوصلہ نہیں توڑا۔