ڈھاکہ، بنگلہ دیش نیشنلسٹ پارٹی (بی این پی) کے کارگزار صدر طارق رحمان، جو برطانیہ میں 17 سال کی جلاوطنی گزارنے کے بعد وطن واپس آئے ہیں، نے جمعرات کو اپنی پہلی تقریر میں کہا کہ یہ ملک تمام مذاہب کے لوگوں کا ہے اور 1971 کی طرح 2024 میں بھی بنگلہ دیش کی آزادی کے تحفظ کے لیے سب اکٹھے ہوئے ہیں۔

مسٹر رحمان نے اپنے وطن واپس آنے پر اللہ کا شکر ادا کرتے ہوئے اپنی تقریر کا آغاز کیا۔ مسٹر رحمان نے اپنے حامیوں کو سلام کیا۔

عوام سے کسی قسم کی اشتعال انگیزی کا جواب نہ دینے کی اپیل کرتے ہوئے انہوں نے کہا کہ جس طرح 1971 میں ملک کو آزادی ملی تھی اسی طرح 2024 میں بھی بنگلہ دیش کی آزادی اور خودمختاری کے تحفظ کے لیے تمام طبقات کے لوگ اکٹھے ہوئے ہیں۔

“آج بنگلہ دیش کے لوگ آزادی اظہار رائے کا حق حاصل کرنا چاہتے ہیں۔ وہ اپنے جمہوری حقوق کو دوبارہ حاصل کرنا چاہتے ہیں۔ اب وقت آگیا ہے کہ ہم سب اکٹھے ہوں اور ملک کو بنائیں۔ یہ ملک پہاڑوں اور میدانوں کے لوگوں کا ہے، مسلمانوں، ہندوؤں، بدھوں اور عیسائیوں کا ہے۔ ہم ایک محفوظ بنگلہ دیش بنانا چاہتے ہیں جہاں ہر عورت، مرد اور بچے محفوظ طریقے سے اپنے گھر واپس جاسکیں”۔

مسٹر رحمان نے کہا، “مختلف قوتوں کے ایجنٹ اب بھی سازشوں میں مصروف ہیں۔ ہمیں صبر کرنا ہوگا۔ ہمیں محتاط رہنا ہوگا۔”

طالب علم رہنما عثمان ہادی کے قتل کا ذکر کرتے ہوئے مسٹر رحمان نے کہا کہ ہادی چاہتے تھے کہ ملک کے عوام اپنے معاشی حقوق دوبارہ حاصل کریں۔ انہوں نے کہا کہ اگر ہم نے 1971 اور 2024 میں شہید ہونے والوں کے خون کا قرض چکانا ہے تو ہمیں وہ بنگلہ دیش کو بنانا ہوگا جس کا ہم سب خواب دیکھتے ہیں۔

بی این پی رہنما نے کہا کہ نوجوان مستقبل میں ملک کی قیادت کریں گے اور انہوں نے ایک مضبوط اقتصادی بنیاد کے ساتھ ایک جمہوری بنگلہ دیش کو یقینی بنانے کی ضرورت پر زور دیا۔

مسٹر رحمان نے کہا کہ نوجوان مستقبل میں ملک کی قیادت کریں گے اور ایک مضبوط اقتصادی بنیاد کے ساتھ ایک جمہوری بنگلہ دیش کو یقینی بنانے کی ضرورت پر زور دیا۔

مارٹن لوتھر کنگ جونیئر کی تاریخی ‘I Have a Dream’ تقریر کا حوالہ دیتے ہوئے، مسٹر رحمان نے کہا، “امریکی شہری حقوق کے کارکن مارٹن لوتھر کنگ نے ایک تقریر میں کہا، ‘میرا ایک خواب ہے۔’ ان کی طرح، میں بھی کہنا چاہتا ہوں، میرے پاس بنگلہ دیش کے لیے ایک منصوبہ ہے۔”

انہوں نے کہا کہ ان کے پاس ملک کی تعمیر کے منصوبے ہیں اور ان منصوبوں پر عمل درآمد کے لیے ہر شہری کا تعاون درکار ہے۔ انہوں نے سب سے پہلے اپنی والدہ، بی این پی کی چیئرپرسن اور سابق وزیراعظم خالدہ ضیاء کی صحت یابی کے لیے دعا کرنے کو بھی کہا۔ اس موقع پر موجود تمام لوگوں کا شکریہ ادا کرتے ہوئے انہوں نے کہا کہ ہم سب مل کر کام کریں گے اور اپنا بنگلہ دیش بنائیں گے۔

قبل ازیں، مسٹر رحمان جمعرات کی صبح بنگلہ دیش واپس آئے اور ڈھاکہ کے مشرقی علاقے میں ایک ریلی میں شرکت کی۔ ریلی میں بی این پی کے ہزاروں حامیوں نے شرکت کی، جس کی وجہ سے انہیں مرکزی مقام تک پہنچنے کے لیے دو گھنٹے سے زیادہ انتظار کرنا پڑا۔

جیسے ہی مسٹر رحمان کو لے جانے والی بس اسٹیج پر پہنچی، وہاں موجود لوگوں نے “طارق ضیاء!” کے نعرے لگانے شروع کر دیے۔ اس کی حفاظت کے لیے ہزاروں سکیورٹی اہلکار تعینات تھے۔

سیکورٹی فورسز نے مسٹر رحمان کو لے جانے والی بس کے گرد گھیرا تنگ کر دیا اور آہستہ آہستہ اسے اسٹیج کی طرف لے گئے۔ پارٹی رہنماؤں اور کارکنوں کی بڑی بھیڑ کی وجہ سے گاڑی انتہائی سست رفتاری سے چل رہی تھی۔ جیسے ہی مسٹر رحمان اترے اور اسٹیج کی طرف بڑھے، بارڈر گارڈ بنگلہ دیش اور فوج کے اہلکاروں نے ان کے گرد گھیرا باندھا اور آگے بڑھنے میں ان کی مدد کی۔

قابل ذکر ہے کہ جب مسٹر رحمان آج صبح وطن واپس آئے تو ہوائی اڈے پر ایک لاکھ سے زیادہ لوگوں کا ہجوم ان کے استقبال کے لیے جمع تھا۔ حامی اور کارکن سڑکوں پر نکل آئے، بی این پی کے جھنڈے اور بینرز اٹھائے اور پرجوش طریقے سے مسٹر رحمان کا استقبال کیا۔ ان کی اہلیہ زبیدہ رحمان اور بیٹی زائمہ رحمان بھی موجود تھیں۔

مسٹر رحمان نے چیف ایڈوائزر محمد یونس کا بنگلہ دیش پہنچنے پر ان کے اور ان کے خاندان کے لیے کیے گئے حفاظتی انتظامات پر شکریہ ادا کیا۔ وہ صبح 11 بج کر 41 منٹ پر حضرت شاہ جلال انٹرنیشنل ایئرپورٹ پہنچے۔

یو این آئی۔ ع ا۔