واشنگٹن، امریکی صدر ڈونلڈٹرمپ نے کہا ہے کہ ہم ایران کے ساتھ معاہدے کے قریب ہیں ایران سے مذاکرات کا دوسرا دور اگلے ہفتے ہوسکتا ہے۔

میڈیا سے گفتگو میں ٹرمپ نے کہا کہ ایران کے ساتھ اس وقت اچھے تعلقات ہیں ہم دیکھیں گے ایران میں قیادت تبدیل ہوچکی ان کے پاس اچھا موقع ہے ہمیں ایران کے ساتھ جنگ بندی میں توسیع کی ضرورت نہیں ہوسکتی ہم ایران کے ساتھ معاہدہ کریں گے اور یہ اچھی بات ہو گی۔

انہوں نے کہا کہ ایران کیساتھ ڈیل ہونے پر اسلام آباد جا سکتا ہوں ایران کیساتھ مذاکرات کیلئے پاکستان کا کردار زبردست ہے، مذاکرات کےلئے وزیراعظم شہبازشریف اور فیلڈ مارشل عاصم منیر نے زبردست کام کیا۔ ان کا کہنا تھا کہ ایران پہلے جن باتوں پر تیار نہیں تھا اب تیار ہے یقینی بنائیں گے کہ ایران کے پاس جوہری ہتھیار نہیں ہونے چاہئیں میرے خیال میں کچھ چیزیں تیزی سے ہوں گی، ایران جوہری ہتھیار نہ رکھنے پر آمادہ ہو چکا ہے۔

یو این آئی۔ ع ا۔

تہران، ایرانی صدر مسعود پزیشکیان کا کہنا ہے کہ مناب میں بچے شہید کیے گئے، کیا کچھ عالمی رہنماؤں میں انسانی ضمیر مر گیا ہے

غیر ملکی ذرائع ابلاغ کے مطابق ایرانی صدر مسعود پزیشکیان کا ٹوئٹ میں کہنا تھا کہ گزشتہ سال میں نے اقوام متحدہ جنرل اسمبلی میں خطاب کیا تھا، اسلام، عیسائیت، یہودیت، انسانی ضمیر کے سنہری اصول کی طرف واپسی پر زور دیا تھا۔

اُنہوں نے کہا کہ دوسروں کے ساتھ وہ نہ کرو جو آپ اپنے ساتھ نہیں کرنا چاہتے، صیہونی حکومت نے عالمگیر اصول کی صریحاً خلاف ورزی کی۔ ایرانی صدر کا کہنا تھا کہ پر امن ایٹمی پروگرام پر پوری قوم کے خلاف جنگ کی گئی، ایران، عراق اور شام میں سائنسدانوں کو قتل کیا گیا، مناب میں معصوم بچوں کا خون بہایا گیا۔

یو این آئی۔ ع ا۔

لاس ویگاس، امریکی صدر ڈونلڈ ٹرمپ نے دعویٰ کیا ایران میں بہت جلد ہمیں فتح ملنے جارہی ہے، ایران سے جنگ نہیں کرنا چاہتا تھا لیکن جوہری پروگرام کی وجہ سے کرنی پڑگئی۔

تفصیلات کے مطابق امریکی صدر ڈونلڈ ٹرمپ نے لاس ویگاس میں ایک بڑے عوامی اجتماع سے خطاب کرتے ہوئے ایران کے خلاف جاری فوجی مہم، ملکی معیشت اور ٹیکس اصلاحات کے حوالے سے اہم ترین اعلانات کیے ہیں۔ صدر ٹرمپ نے فتح کا دعویٰ کرتے ہوئے کہا ایران میں جنگ بہت جلد اپنے منطقی انجام کو پہنچنے والی ہے، ایران میں فوجی کارروائیاں مکمل کرنے میں صرف 2 ماہ لگے اور فتح انتہائی قریب ہے۔

انہوں نے واضح کیا کہ وہ جنگ نہیں چاہتے تھے لیکن ایران کو جوہری ہتھیار رکھنے کی اجازت نہیں دی جا سکتی تھی، اس لیے فوجی کارروائی ضروری تھی۔ ٹرمپ کا کہنا تھا کہ ایران نے ایک امریکی بحری جہاز پر 111 راکٹ فائر کیے لیکن امریکی فوج نے جدید ٹیکنالوجی سے تمام راکٹ تباہ کر کے حملہ ناکام بنا دیا۔

صدر نے دعویٰ کیا کہ ایران کی نیوی ختم کر دی گئی ہے اور ان کے 158 جہاز ڈبو دیے گئے ہیں۔ انہوں نے اعلان کیا کہ ریسٹورنٹس میں کام کرنے والے افراد کی ٹپس پر کوئی ٹیکس نہیں لیا جائے گا، جس سے ہزاروں افراد کو فائدہ ہوگا، بزرگ شہریوں کی سوشل سیکیورٹی پر بھی کوئی ٹیکس عائد نہیں کیا جائے گا، ٹیکسوں کے بھاری بوجھ کی وجہ سے لوگ خودکشیاں کر لیتے ہیں، ہم اس بوجھ کو ختم کر رہے ہیں۔

انہوں نے سعودی بادشاہ کی تعریف کرتے ہوئے کہا کہ انہوں نے امریکہ میں 2 ٹریلین ڈالر کی بڑی سرمایہ کاری کی ہے اور وہ ایک ذہین شخصیت ہیں۔ امریکی صدر نے انتباہ کیا کہ جو لوگ امریکہ میں پلانٹ نہیں لگائیں گے، ان کی مصنوعات پر بھاری ٹیرف عائد کیا جائے گا۔ ٹرمپ نے کہا کہ جو بائیڈن کے دور میں امریکی تاریخ کی بدترین مہنگائی ہوئی اور ملک کو عالمی سطح پر شرمندگی کا سامنا کرنا پڑا۔ انہوں نے زور دیا کہ مڈ ٹرم الیکشن جیتنا لازمی ہے، ورنہ ٹیکسوں میں دوبارہ اضافہ ہوجائے گا اور معیشت متاثر ہوگی۔

یو این آئی۔ ع ا۔