چنڈی گڑھ، پنجاب کے ضلع فتح گڑھ صاحب میں منگل کی رات ایک افسوسناک حادثہ پیش آیا، جب زائرین کو لے جانے والی ایک بس ہمت پورہ گاؤں کے قریب الٹ گئی، جس کے نتیجے میں سات افراد کی موت ہوگئی جبکہ 21 زخمی ہوگئے۔

یہ تمام افراد بیساکھی کی تقریبات میں شرکت کے بعد سری آنند پور صاحب سے واپس آ رہے تھے۔ مرنے والوں میں خواتین اور بچے بھی شامل ہیں۔ جاں بحق ہونے والوں میں دو بھائی لکھبیر سنگھ اور ہرویر سنگھ بھی شامل ہیں، جو مین ماجری گاؤں کے رہائشی تھے۔

حادثہ رات تقریباً 9:30 بجے پیش آیا، جب بس میں اچانک خرابی پیدا ہوئی جس کے باعث ڈرائیور گاڑی پر قابو نہ رکھ سکا۔ بس سڑک سے نیچے اتر گئی، ایک بجلی کے کھمبے سے ٹکرائی اور الٹ گئی۔

حادثے میں بچ جانے والے مسافروں کے مطابق ٹکر کے بعد کچھ دیر کے لیے بس میں بجلی دوڑ گئی، جس سے خوف و ہراس پھیل گیا۔ قریبی گاؤں والے شور سن کر موقع پر پہنچے اور پھنسے ہوئے مسافروں کو باہر نکالا، تاہم انہوں نے امدادی گاڑیوں کی آمد میں تاخیر کی شکایت بھی کی۔

سینئر پولیس افسران، جن میں ایس ایس پی ڈاکٹر شُبھم اگروال شامل ہیں، جلد ہی موقع پر پہنچ گئے اور ریسکیو آپریشن کی نگرانی کی۔ ان کے مطابق حادثہ مین ماجری سے محض ڈیڑھ کلومیٹر کے فاصلے پر پیش آیا، جہاں مسافروں کو اترنا تھا۔

زخمیوں میں سے 12 کو مورِنڈا کے اسپتال منتقل کیا گیا، جبکہ 9 افراد کو فتح گڑھ صاحب میں داخل کیا گیا۔ کئی شدید زخمیوں کو بہتر علاج کے لیےپی جی آئی چندی گڑھ ریفر کیا گیا ہے۔

مرنے والوں میں جگوندر سنگھ، اقبال سنگھ ، لکھبیر سنگھ، ہرویر سنگھ، پردیپ کور، رنجیت کور اور کلویندر سنگھ (کجّل شامل ہیں۔

مقامی حکام کے مطابق بس کو موقع سے ہٹا دیا گیا ہے اور علاقہ صاف کر دیا گیا ہے۔ گاؤں کے لوگ پوری رات پولیس کے ساتھ مل کر امدادی کاموں میں حصہ لیتے رہے۔

یو این آئی۔ ایم جے،

نئی دہلی، فائر حکام نے بدھ کے روز بتایا کہ آؤٹر دہلی کے علاقے بدھ وہار میں پلاسٹک کے کچرے کے ایک گودام میں آگ لگنے کے باعث ایک ہی خاندان کے تین افراد جان کی بازی ہار گئے۔

اطلاعات کے مطابق، جاں بحق ہونے والے افراد ایک ہی خاندان کے ارکان تھے جو بدھ وہار کے ‘مانگے رام پارک’ علاقے میں واقع اس گودام کے اندر ایک عارضی جھونپڑی بنا کر رہ رہے تھے۔

یہ حادثہ رات گئے اس وقت پیش آیا جب گودام میں جمع کردہ اسکریپ (کچرے) کے ڈھیر میں آگ بھڑک اٹھی۔ آگ اتنی تیزی سے پھیلی کہ اس نے گودام کے اندر موجود جھونپڑی کو بھی اپنی لپیٹ میں لے لیا۔ اطلاع ملتے ہی فائر بریگیڈ کی 7 گاڑیاں جائے وقوعہ پر پہنچ گئیں۔ کئی گھنٹوں کی تگ و دو کے بعد فائر فائٹرز صبح تک آگ پر قابو پانے میں کامیاب رہے۔

پولیس کے مطابق لاشیں بری طرح جھلس چکی ہیں جس کی وجہ سے ان کی شناخت میں مشکلات پیش آ رہی ہیں۔ ایک سینئر پولیس افسر کا کہنا ہے کہ متوفین کی شناخت کا عمل ابھی جاری ہے۔ پولیس اور متعلقہ حکام آگ لگنے کی اصل وجہ معلوم کرنے کے لیے مزید تفتیش کر رہے ہیں۔

یو این آئی۔ م ع

نئی دہلی، کانگریس لیڈر جے رام رمیش نے منگل کے روز پارلیمنٹ کے آئندہ خصوصی اجلاس کے وقت اور انعقاد کے طریقہ کار پر مرکز کو تنقید کا نشانہ بناتے ہوئے حکومت پر الزام لگایا کہ وہ مناسب مشاورت یا شفافیت کے بغیر کام کر کے جمہوری اصولوں کو پامال کر رہی ہے ایک بیان میں رمیش نے کہا کہ خصوصی اجلاس 16 اپریل سے شروع ہونے والا ہے، جبکہ اس وقت تمل ناڈو اور مغربی بنگال میں انتخابی مہم اپنے عروج پر ہوگی۔ انہوں نے دلیل دی کہ یہ وقت حکومت کے ارادوں اور ترجیحات پر سنگین خدشات پیدا کرتا ہے۔

انہوں نے کہا، “پارلیمنٹ کا خصوصی اجلاس پرسوں یعنی 16 اپریل سے شروع ہوگا—جب تمل ناڈو اور مغربی بنگال میں انتخابی مہم عروج پر ہوگی۔” انہوں نے مزید کہا کہ حکومت نے انتخابات کے اختتام کے بعد کل جماعتی اجلاس (آل پارٹی میٹنگ) بلانے کا اپوزیشن کا مطالبہ مسترد کر دیا ہے۔ انہوں نے واضح کیا کہ، “مودی حکومت نے انتخابات مکمل ہونے کے بعد آل پارٹی میٹنگ بلانے کی اپوزیشن کی مکمل طور پر معقول اور جائز درخواستوں کو مسترد کر دیا ہے،” جبکہ اس مجوزہ تاخیر کا دورانیہ صرف دو ہفتے کے قریب ہوتا۔

جے رام رمیش نے مزید الزام لگایا کہ ارکانِ پارلیمنٹ کو بحث کے لیے مقررہ مجوزہ آئینی ترامیم کی تفصیلات فراہم نہیں کی گئی ہیں۔ انہوں نے اسے جمہوریت کا “مکمل مذاق” قرار دیتے ہوئے کہا، “آج صبح تک مودی حکومت نے ارکانِ پارلیمنٹ کے ساتھ وہ آئینی ترمیمی بل شیئر نہیں کیے ہیں جن پر انہیں بحث اور ووٹنگ کرنی ہے۔”

وزیر اعظم نریندر مودی پر سخت تنقید کرتے ہوئے کانگریس لیڈر نے حکومت پر “بلڈوزر ذہنیت” کے ساتھ کام کرنے کا الزام لگایا اور اشارہ دیا کہ حکومت بغیر کسی بحث یا اتفاقِ رائے کے اہم قانون سازی کے فیصلوں کو آگے بڑھا رہی ہے۔

مرکز نے یہ خصوصی اجلاس کئی ریاستوں میں جاری سیاسی سرگرمیوں اور انتخابی مہم کے دوران بلایا ہے، جس میں توقع ہے کہ آئینی ترامیم سمیت اہم قانون سازی کی تجاویز پیش کی جائیں گی۔ اپوزیشن جماعتیں ایجنڈے پر مزید وضاحت اور مشاورت کے لیے وقت کا مطالبہ کر رہی ہیں، ان کا کہنا ہے کہ اس طرح کے اہم اقدامات کے لیے تمام جماعتوں کے درمیان وسیع تر بحث اور اتفاقِ رائے پیدا کرنا ضروری ہے۔

یواین آئی۔ ایف اے