جموں، 57 دن جاری رہنے والی سالانہ امرناتھ یاترا کے لیے رجسٹریشن بدھ کے روز آن لائن اور آف لائن دونوں طریقوں سے شروع ہو گئی ہے۔

حکام کے مطابق اس سال یاترا 3 جولائی سے شروع ہو کر 28 اگست تک جاری رہے گی۔ یاترا کے محفوظ اور ہموار انعقاد کو یقینی بنانے کے لیے شری امرناتھ شرائن بورڈ نے اہم ہدایات بھی جاری کی ہیں۔

رجسٹریشن کے پہلے دن مختلف بینکوں میں لمبی قطاریں دیکھی گئیں۔ ملک بھر میں جموں وکشمیر، پنجاب نیشنل بینک، اسٹیٹ بینک آف انڈیا اور یس بینک کی 554 شاخوں میں رجسٹریشن کی سہولت فراہم کی گئی ہے۔

حکام نے بتایا کہ ہر رجسٹرڈ یاتری اور سروس فراہم کنندہ کو آر ایف آئی ڈی (ریڈیو فریکوئنسی آئیڈینٹیفیکیشن) کارڈ جاری کیا جائے گا۔ رجسٹرڈ یاتریوں کو 10 لاکھ روپے تک کا گروپ حادثاتی انشورنس بھی فراہم کیا جائے گا۔ اس کے علاوہ جانوروں (خچروں وغیرہ) کی حادثاتی یا قدرتی موت کی صورت میں 50 ہزار روپے فی جانور معاوضہ دیا جائے گا۔

ہر سال لاکھوں عقیدت مند بھگوان شیوا کے درشن کے لیے اس یاترا میں شرکت کرتے ہیں۔ یاترا دو راستوں سے کی جائے گی، جن میں روایتی 48 کلومیٹر طویل نون ون–پہلگام راستہ اور مشکل 14 کلومیٹر طویل بالتال راستہ شامل ہیں۔

عقیدت مند امرناتھ شرائن بورڈ آفیشیل ویب سائٹ اور موبائل ایپ کے ذریعے آن لائن رجسٹریشن کر سکتے ہیں، جبکہ آف لائن رجسٹریشن بھی 550 سے زائد بینک شاخوں میں دستیاب ہے۔

حکام کے مطابق کمپلسری ہیلتھ سرٹیفکیٹ (سی ایچ سی) لازمی قرار دیا گیا ہے، جو کسی مجاز ڈاکٹر سے حاصل کرنا ہوگا، کیونکہ یہ یاترا بلند پہاڑی علاقوں میں ہوتی ہے اور صحت کے خطرات موجود ہوتے ہیں۔

رجسٹریشن فیس فی کس 150 روپے مقرر کی گئی ہے۔ یاترا کے لیے عمر کی حد 13 سے 70 سال کے درمیان رکھی گئی ہے، جبکہ چھ ہفتوں سے زائد حاملہ خواتین کو یاترا کی اجازت نہیں ہوگی۔

سکیورٹی کے لیے جموں وکشمیر پولس اور دیگر نیم فوجی دستے تعینات کیے جائیں گے۔ اس کے علاوہ میڈیکل ٹیمیں، ریسکیو یونٹس اور ہیلپ سینٹرز بھی دونوں راستوں پر قائم کیے جائیں گے تاکہ کسی بھی ہنگامی صورتحال میں فوری مدد فراہم کی جا سکے۔

یواین آئی۔ ظ ا

سری نگر، جموں و کشمیر کے ضلع سوپور میں جموں وکشمیر پولس نے گورنمنٹ گرلز ہائر سیکنڈری اسکول میں حالیہ طلبہ احتجاج میں خلل ڈالنے والے عناصر کے خلاف جاری کارروائی کے سلسلے میں رات بھر کی چھاپہ ماری کے دوران مزید پانچ شرپسندوں کو گرفتار کر لیا ہے۔

پولیس کے مطابق ان افراد نے طلبہ کے پُرامن احتجاج میں گھس کر امن و امان کی صورتحال کو خراب کیا اور توڑ پھوڑ سمیت سرکاری املاک کو نقصان پہنچایا۔

پولیس نے کہا کہ اس معاملے میں ملوث تمام افراد کے خلاف تیز اور ہدفی کارروائی جاری ہے۔ مزید 13 شرپسندوں کی شناخت کر لی گئی ہے اور انہیں جلد از جلد گرفتار کرنے کی کوششیں جاری ہیں۔ پولیس کا کہنا ہے کہ چھاپے اور تلاشی کی کارروائیاں اس وقت تک جاری رہیں گی جب تک تمام ملوث عناصر کو قانون کے کٹہرے میں نہ لایا جائے۔

پولیس نے واضح کیا کہ وہ کسی کو بھی حساس صورتحال کا فائدہ اٹھا کر عوامی امن کو خراب کرنے کی اجازت نہیں دے گی۔ تمام ملوث افراد کے خلاف سخت قانونی کارروائی کی جائے گی اور کسی کو بخشا نہیں جائے گا۔

پولیس نے سوپور کے عوام کی جانب سے امن و امان برقرار رکھنے میں تعاون کو سراہا اور شہریوں سے اپیل کی کہ وہ چوکنا رہیں اور قانون نافذ کرنے والے اداروں کی مدد جاری رکھیں۔

پولیس نے کہا کہ امن پسند شہریوں کے ساتھ مل کر وہ ضلع میں امن، سلامتی اور معمولات زندگی کو برقرار رکھنے کے لیے پُرعزم ہیں۔

واضح رہے کہ سوپور میں ایک اسکول لیکچرر پر جنسی ہراسانی کے الزامات کے بعد پرتشدد احتجاج شروع ہو گئے تھے، جس کے دوران توڑ پھوڑ بھی ہوئی اور سخت کارروائی کا مطالبہ کیا گیا۔

پولیس نے اب تک شناخت شدہ 25 افراد میں سے کئی کو گرفتار کر لیا ہے، جبکہ ملزم استاد کو معطل کر دیا گیا ہے اور حالات کو قابو میں لانے کی کوششیں جاری ہیں۔

یواین آئی۔ ظ ا

سری نگر، جموں و کشمیر کے ضلع سوپور میں گورنمنٹ گرلز ہائر سکنڈری اسکول میں حالیہ احتجاج کے دوران امن و امان میں خلل ڈالنے والوں کے خلاف پولیس کی مہم جاری ہے۔ منگل کی رات بھر کی گئی چھاپہ مار کارروائیوں کے دوران پولیس نے مزید 5 شرپسندوں کو گرفتار کر لیا ہے۔

واقعے کے مطابق سوپور کے ایک اسکول میں ایک لیکچرار کی جانب سے مبینہ جنسی ہراسانی کے خلاف طالبات نے ابتدا میں پرامن احتجاج کیا، جو بعد میں پرتشدد شکل اختیار کر گیا۔ پولیس کے مطابق اس دوران شرپسند عناصر نے احتجاج میں دراندازی کر کے توڑ پھوڑ کی اور عوامی املاک کو نقصان پہنچایا، جبکہ متعلقہ لیکچرار کو پہلے ہی معطل کر دیا گیا ہے اور اس کے خلاف سخت کارروائی کا مطالبہ کیا جا رہا ہے۔ بدھ کے روز جاری پولیس بیان کے مطابق اب تک شناخت شدہ 25 شرپسندوں میں سے کئی کو گرفتار کیا جا چکا ہے، مزید 13 افراد کی شناخت کر لی گئی ہے جن کی گرفتاری کے لیے چھاپے مارے جا رہے ہیں اور پولیس نے واضح کیا ہے کہ امن و امان میں خلل ڈالنے والے کسی بھی شخص کو بخشا نہیں جائے گا اور کارروائیاں تمام ملزمان کی گرفتاری تک جاری رہیں گی۔

پولیس نے ضلع میں امن و امان برقرار رکھنے کے لیے سوپور کے شہریوں کے تعاون کی تعریف کی اور اپیل کی کہ وہ حساس حالات میں قانون نافذ کرنے والے اداروں کی مدد جاری رکھیں۔ بیان میں کہا گیا کہ پولیس امن پسند شہریوں کے ساتھ مل کر ضلع میں سکیورٹی اور معمولاتِ زندگی کو بحال رکھنے کے لیے پرعزم ہے۔

یو این آئی۔ م ع۔ایف اے