نئی دہلی، کانگریس نے دعویٰ کیا ہے کہ اتراکھنڈ میں بھارتیہ جنتا پارٹی (بی جے پی) حکومت کے تئیں لوگوں میں مایوسی اور ناراضگی ہے اور عوام ریاست میں تبدیلی چاہتے ہیں کانگریس نے اپنے آفیشل سوشل میڈیا پلیٹ فارم ’ایکس‘ پر جمعہ کو پارٹی کے جنرل سکریٹری (تنظیم) کے سی وینوگوپال کے حوالے سے کہا کہ انہوں نے گزشتہ دو دنوں میں اتراکھنڈ کانگریس کے مختلف لیڈروں سے ملاقات کر کے کئی امور پر تبادلہ خیال کیا۔ اس دوران سیاسی امور کی کمیٹی، ضلع کانگریس صدور، ارکان اسمبلی اور سابق ارکان اسمبلی کے ساتھ الگ الگ میٹنگیں کی گئی ہیں۔

مسٹر وینوگوپال نے کہا کہ انہیں خوشی ہے کہ پارٹی کے تمام لیڈر آئندہ اسمبلی انتخابات پوری مضبوطی کے ساتھ لڑنے کے لیے تیار ہیں اور کانگریس کو اپنی جیت کا پورا یقین ہے۔ انہوں نے کہا کہ اتراکھنڈ کے لوگ بی جے پی حکومت سے مایوس اور ناراض ہیں۔ عوام ریاست میں حکومت بدلنا چاہتے ہیں اور کانگریس لوگوں کے ساتھ مل کر ریاست میں تبدیلی لانے کے لیے پرعزم ہیں۔

یو این آئی۔ ایف اے

نئی دہلی، وزیراعظم نریندر مودی اور آسٹریلیا کے وزیراعظم اینتھنی البانیز نے جمعہ کو میلبورن کرکٹ گراؤنڈ کا دورہ کیا اور دونوں ممالک کے درمیان کھیلوں میں تعاون بڑھانے کے لیے کھیل تعاون روڈ میپ جاری کیا اس موقع پر وکٹوریہ کی پریمیئر جینسٹیلا ایلن بھی موجود تھیں  تینوں رہنماؤں نے میلبورن کرکٹ گراؤنڈ میں ہندوستان-آسٹریلیا کھیل تعلقات کے جشن کے موقع پر ایک تقریب میں حصہ لیا۔ اس تقریب میں اسٹیو وا اور لیسا اسٹالیکر سمیت آسٹریلیا کے کئی معروف کھیلاڑی موجود تھے۔ اس دورے نے ہندوستان-آسٹریلیا جامع اسٹریٹجک شراکت داری کے اہم ستونوں کے طور پر کھیلوں، ثقافتی تبادلوں اور عوامی رابطوں کی بڑھتی ہوئی اہمیت کو اجاگر کیا۔

تقریب کے دوران دونوں وزرائے اعظم نے مشترکہ طور پر ہندوستان-آسٹریلیا کھیل تعاون روڈ میپ جاری کیا، جو کھیل کی تربیت اور صلاحیت سازی، اسپورٹس سائنس اور ٹیکنالوجی اور کھیل کی صنعت و سرمایہ کاری کے شعبوں میں تعاون کو فروغ دے گا۔ اس کا مقصد ہندوستان-آسٹریلیا یوتھ اسپورٹس فیسٹیول کا انعقاد کرنا بھی ہے۔ دونوں رہنماؤں نے کھیلوں کے شعبے میں ہندوستان اور آسٹریلیا کے درمیان بڑھتے ہوئے تعاون کا خیرمقدم کیا۔ اجتماع سے خطاب کرتے ہوئے مسٹر مودی نے لوگوں کو متحد کرنے میں کھیلوں کے منفرد کردار پر روشنی ڈالی اور کہا کہ یہ روڈ میپ دونوں ممالک کو اپنی کھیل شراکت داری میں تنوع لانے کے قابل بنائے گا۔ انہوں نے ویمنز کرکٹ ورلڈ کپ جیتنے پر آسٹریلیا کو مبارکباد دی۔

وزیر اعظم مودی نے کہا کہ ہندوستان اور آسٹریلیا بین الاقوامی کھیلوں کی ایک اہم دہائی میں ساتھ ساتھ داخل ہو رہے ہیں، جس میں ہندوستان 2030 میں دولت مشترکہ کھیلوں کی ميزبانی کرے گا اور آسٹریلیا 2032 میں برسبین اولمپکس کی ميزبانی کرے گا۔ انہوں نے اس بات پر زور دیا کہ یہ پیش رفت کھیل اور اس سے متعلقہ صنعتوں میں دونوں ممالک کے درمیان زیادہ قریبی دوطرفہ تعاون کے قدرتی مواقع فراہم کرتی ہے۔ دورے کے دوران رہنماؤں نے کبڈی، آسٹریلین فٹ بال اور کرکٹ کے نمائشی میچوں میں حصہ لینے والے نوجوان کھلاڑیوں سے بات چیت کی۔

اس دورے نے ہندوستان اور آسٹریلیا کے درمیان متحرک کھیل تعلقات اور عوامی رابطوں کو مؤثر طریقے سے ظاہر کیا۔

یو این آئی۔ایم جے

نئی دہلی، کانگریس کے صدر ملکارجن کھرگے نے کہا ہے کہ گلوان تصادم کے بعد سے حکومت کی پالیسیوں کی وجہ سے ہندستان کا چین پر اقتصادی انحصار مسلسل بڑھا ہے اور اب چینی کمپنیوں کو سرکاری پروجیکٹوں میں بھی مواقع دیے جا رہے ہیں مسٹر کھرگے نے جمعرات کو سوشل میڈیا ’ایکس‘ پر لکھا کہ گلوان میں 20 ہندستانی فوجیوں کی عظیم ترین قربانی کے چھ برس بعد بھی حکومت چین کے تئیں نرم رویہ اپنائے ہوئے ہے۔ حکومت کے اس لچکدار رویے کی وجہ سے تجارت، دوا سازی کی صنعت، الیکٹرک گاڑیوں، شمسی توانائی اور دیگر تمام اسٹریٹجک شعبوں میں چین پر ملک کا انحصار بڑھا ہے۔ انہوں نے کہا کہ مودی حکومت چین کے لیے مواقع کے سارے دروازے کھول رہی ہے اور ملک کے مفادات سے سمجھوتہ کر کے چینی کمپنیوں کو ملک میں کاروبار کرنے کے لیے فروغ دے رہی ہے۔

کانگریس صدر نے دعویٰ کیا کہ 26-2025 تک چین سے ہندستان کی درآمدات میں 101.81 فیصد اضافہ ہوا ہے، جس سے تجارتی خسارہ 112.1 ارب ڈالر تک پہنچ گیا ہے۔ ان کا کہنا تھا کہ اینٹی بائیوٹک، اے پی آئی، الیکٹرک گاڑیوں کے پرزوں، لیتھیم آئن بیٹریوں، میگنیٹ اور شمسی توانائی کے آلات کے لیے ضروری سلکان ویفر کے معاملے میں بھی ہندستان کافی حد تک چین پر منحصر ہے۔ مسٹر کھرگے نے یہ بھی الزام لگایا کہ مودی حکومت چین کے لیے مواقع کے سارے دروازے کھول کر قومی مفادات سے سمجھوتہ کر رہی ہے اور چینی کمپنیوں کو سرکاری بجلی پروجیکٹوں میں شرکت کا موقع دے کر ملک کے اہم شعبوں میں ان کی موجودگی بڑھانے کا راستہ کھول رہی ہے۔ ان کا یہ بھی دعویٰ ہے کہ اروناچل پردیش اور لداخ میں چین کی سرگرمیاں اور قومی سلامتی سے جڑے امور بھی شدید تشویش کا موضوع ہیں۔

کانگریس صدر نے کہا کہ آپریشن سندور کے دوران پاکستان کی سرگرمیوں میں چین کے کردار کو فوج کے ڈپٹی چیف نے بھی تسلیم کیا تھا اور یہ سرکاری ریکارڈ کا حصہ ہے۔ مسٹر کھرگے نے کہا کہ گلوان کے بعد سے مودی حکومت نے چین کو ہندستان کے اہم صنعتی شعبوں میں پکڑ مضبوط کرنے کا موقع دیا ہے اور اب اس کی کمپنیوں کے لیے نئے مواقع کھول کر ملک کے قومی مفادات سے سمجھوتہ کیا جا رہا ہے۔

یو این آئی۔ ایف اے