نیویارک، مشرقِ وسطیٰ میں مسلسل بڑھتی ہوئی شدید کشیدگی کے باعث عالمی منڈی میں خام تیل کی قیمتوں میں اضافے کا سلسلہ تاحال جاری ہے، جس کے بعد برطانوی برینٹ خام تیل 100 ڈالر فی بیرل کی نفسیاتی حد عبور کر گیا ہے۔

خبر رساں ایجنسی کے مطابق عالمی مارکیٹ میں برطانوی برینٹ خام تیل کی قیمت میں زبردست اضافہ دیکھا گیا ہے اور یہ تقریباً 100.69 ڈالر فی بیرل پر بند ہوا، جو کہ گزشتہ دو ماہ کی بلند ترین سطح ہے۔

دوسری جانب امریکی ویسٹ ٹیکساس انٹرمیڈیٹ خام تیل کی قیمت بھی مسلسل اضافے کے بعد 91.65 ڈالر فی بیرل کے قریب پہنچ چکی ہے۔

تیل کی قیمتوں میں اس ناگہانی اضافے کی بنیادی وجہ مشرقِ وسطیٰ کی کشیدہ صورتحال کے باعث عالمی سپلائی چین کا متاثر ہونا ہے۔

رپورٹس کے مطابق سمندری گزرگاہ آبنائے ہرمز سے گزرنے والے آئل ٹینکرز کی تعداد میں شدید کمی واقع ہوئی ہے اور یہ گزشتہ دو ماہ کی کم ترین سطح پر آ گئی ہے۔

خبر رساں ادارے ‘رائٹرز’ کے مطابق جمعرات کے روز آبنائے ہرمز سے صرف ایک آئل ٹینکر ہی گزر سکا۔ رپورٹ کے مطابق خام تیل لے جانے والا یہ جہاز “نیو جائنٹ” تھا، جس میں تقریباً 20 لاکھ بیرل عراقی خام تیل لدا ہوا تھا اور وہ آبنائے ہرمز سے گزر کر چین کی بندرگاہ ‘ریژاؤ’ کی جانب روانہ ہوا۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے جنگ کے دوران آبنائے ہرمز ہونے والے نقصان کا ازالہ ایرانی فنڈز سے کرنے کا اعلان کر دیا۔

امریکی صدر ڈونلڈ ٹرمپ نے ایران کے خلاف ایک اور سخت قدم اٹھاتے ہوئے آبنائے ہرمز میں ہونے والے نقصانات کا ازالہ ایران کے منجمد فنڈز سے کرنے کا اعلان کر دیا۔

ٹروتھ سوشل پر جاری بیان میں ٹرمپ نے کہا کہ تجارتی جہازوں کے نقصانات ایران کے منجمد فنڈز سے پورے کیے جائیں گے۔

انہوں نے کہا کہ آبنائے ہرمز پر جہازوں کو پہنچنے والا نقصان بہت زیادہ ہو سکتا ہے، ایران کے پیسوں سے ادائیگی ہی منصفانہ راستہ ہے۔

دوسری جانب امریکہ کی جانب سے ایران پر مسلسل 13 ویں بھی فضائی حملے جاری رہے۔

یو این آئی۔ ع ا۔

تہران، ایران کے وزیر خارجہ عباس عراقچی نے ٹرمپ کے بیان پر شدید ردعمل دیتے ہوئے کہا ہے کہ امریکی صدر کو پہلے سے بھاری قیمت چکانا پڑے گی۔

امریکی صدر ڈونلڈ ٹرمپ کے آبنائے ہرمز میں تجارتی جہازوں کے نقصان کی ادائیگی ایران کے منجمد اثاثوں سے کرنے کے بیان پر ایرانی وزیرِ خارجہ عباس عراقچی نے شدید ردِعمل کا اظہار کیا ہے۔

سوشل میڈیا ایپ ایکس پر ایک پوسٹ میں ایرانی وزیر خارجہ نے لکھا کہ کسی دوسرے ملک کے اثاثے ضبط کر کے انہیں مستقبل کے غیر متعلقہ دعووں کی ادائیگی کے لیے استعمال کرنا ایک انتہائی خطرناک اور اشتعال انگیز نظیر قائم کرنا ہے۔

عباس عراقچی نے مزید کہا کہ جو لوگ ایسے ضبط شدہ فنڈز پر خوشی مناتے ہیں یا ان سے فائدہ اٹھاتے ہیں، انہیں یاد رکھنا چاہیے کہ جب حکومتیں اثاثے ضبط کرنے کو معمول بنا لیں تو پھر کسی کے بھی اثاثے محفوظ نہیں رہتے۔

ایک اور پوسٹ میں عباس عراقچی نے لکھا کہ صدر ٹرمپ جس بے سوچے سمجھے جارحانہ رویے کی وکالت کر رہے ہیں، وہ صرف اس بات کو یقینی بنائے گا کہ امریکی صدر کو اس کی پہلے سے کہیں زیادہ بھاری قیمت چکانا پڑے گی۔

یو این آئی۔ ع ا۔