واشنگٹن، امریکی ایوان نمائندگان کی طرف سے ایران جنگ سے منع کرنے کے باوجود صدر ڈونلڈ ٹرمپ نے ایران کو بڑے فوجی آپریشن کی دھمکی دے دی۔

امریکی خبر رساں ادارے ایکزیوس سے گفتگو میں صدر ٹرمپ نے دھمکی دیتے ہوئے کہا کہ ابھی ایران کو زیادہ تکلیف نہیں پہنچی ہے۔ وہ ایران میں بڑی فوجی کارروائیاں دوبارہ شروع کرنے پر غور کر رہے ہیں۔

ٹرمپ نے کہا کہ نئی فوجی کارروائیوں میں ’’آپریشن ایپک فیوری‘‘ کے حملوں سے زیادہ بڑے حملے کیے جاسکتے ہیں۔

نئے اور بڑے حملوں کی یہ دھمکی دیتے ہوئے ٹرمپ نے یہ بھی کہہ دیا کہ ابھی انہوں نے نئے اور بڑے حملوں کے بارے میں کوئی حتمی فیصلہ نہیں کیا ہے۔

واضح رہے کہ امریکی ایوان نمائندگان نے ایران کے خلاف جنگ روکنے کے حق میں ووٹ دیا ، ایران کے خلاف فوجی آپریشن روکنے کی قرارداد پر 214 ارکان نے حق میں ووٹ دیا ، مخالفت میں 208 ووٹ آئے ، 4 ری پبلکن ارکان نے بھی ڈیموکریٹس کے ساتھ مل کر قرارداد کے حق میں ووٹ دیا۔تاہم یہ قرارداد ٹرمپ انتظامیہ کو کسی عمل کے لیے پابند نہیں کرسکتی۔

دوسری جانب امریکی سینیٹ نے ایران کے خلاف فوجی آپریشن روکنے کی قرارداد مسترد کر دی ، قرارداد کے حق میں 47 اور مخالفت میں 49 ووٹ آئے ۔

یو این آئی۔ ع ا۔

نیویارک، مشرقِ وسطیٰ میں مسلسل بڑھتی ہوئی شدید کشیدگی کے باعث عالمی منڈی میں خام تیل کی قیمتوں میں اضافے کا سلسلہ تاحال جاری ہے، جس کے بعد برطانوی برینٹ خام تیل 100 ڈالر فی بیرل کی نفسیاتی حد عبور کر گیا ہے۔

خبر رساں ایجنسی کے مطابق عالمی مارکیٹ میں برطانوی برینٹ خام تیل کی قیمت میں زبردست اضافہ دیکھا گیا ہے اور یہ تقریباً 100.69 ڈالر فی بیرل پر بند ہوا، جو کہ گزشتہ دو ماہ کی بلند ترین سطح ہے۔

دوسری جانب امریکی ویسٹ ٹیکساس انٹرمیڈیٹ خام تیل کی قیمت بھی مسلسل اضافے کے بعد 91.65 ڈالر فی بیرل کے قریب پہنچ چکی ہے۔

تیل کی قیمتوں میں اس ناگہانی اضافے کی بنیادی وجہ مشرقِ وسطیٰ کی کشیدہ صورتحال کے باعث عالمی سپلائی چین کا متاثر ہونا ہے۔

رپورٹس کے مطابق سمندری گزرگاہ آبنائے ہرمز سے گزرنے والے آئل ٹینکرز کی تعداد میں شدید کمی واقع ہوئی ہے اور یہ گزشتہ دو ماہ کی کم ترین سطح پر آ گئی ہے۔

خبر رساں ادارے ‘رائٹرز’ کے مطابق جمعرات کے روز آبنائے ہرمز سے صرف ایک آئل ٹینکر ہی گزر سکا۔ رپورٹ کے مطابق خام تیل لے جانے والا یہ جہاز “نیو جائنٹ” تھا، جس میں تقریباً 20 لاکھ بیرل عراقی خام تیل لدا ہوا تھا اور وہ آبنائے ہرمز سے گزر کر چین کی بندرگاہ ‘ریژاؤ’ کی جانب روانہ ہوا۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے جنگ کے دوران آبنائے ہرمز ہونے والے نقصان کا ازالہ ایرانی فنڈز سے کرنے کا اعلان کر دیا۔

امریکی صدر ڈونلڈ ٹرمپ نے ایران کے خلاف ایک اور سخت قدم اٹھاتے ہوئے آبنائے ہرمز میں ہونے والے نقصانات کا ازالہ ایران کے منجمد فنڈز سے کرنے کا اعلان کر دیا۔

ٹروتھ سوشل پر جاری بیان میں ٹرمپ نے کہا کہ تجارتی جہازوں کے نقصانات ایران کے منجمد فنڈز سے پورے کیے جائیں گے۔

انہوں نے کہا کہ آبنائے ہرمز پر جہازوں کو پہنچنے والا نقصان بہت زیادہ ہو سکتا ہے، ایران کے پیسوں سے ادائیگی ہی منصفانہ راستہ ہے۔

دوسری جانب امریکہ کی جانب سے ایران پر مسلسل 13 ویں بھی فضائی حملے جاری رہے۔

یو این آئی۔ ع ا۔