تہران، ایرانی خاتم الانبیا سینٹرل ہیڈکوارٹرز کے ڈپٹی انسپکٹر بریگیڈیئر جنرل اسدی کا امریکہ اور اسرائیل کے خلاف جاری کشیدگی سے متعلق بڑا بیان سامنے آگیا۔ ایرانی سرکاری ٹی وی کے مطابق سینئر ایرانی اہلکار نے امریکہ کے ساتھ دوبارہ جنگ کو ناگزیر قرار دے دیا ہے۔

بریگیڈیئر جنرل اسدی نے کہا ہے کہ بارہا کہہ چکے ہیں ہم نے ابھی اپنی مکمل صلاحیتیں ظاہر نہیں کیں، ہمارے پاس بہت سے آپشن ہیں جو وقت پڑنے پر استعمال کریں گے۔ ان کا کہنا ہے کہ امریکہ مکمل سرینڈر کا مطالبہ کر رہا ہے تاہم ایرانی قوم کبھی نہیں جھکے گی، سرینڈر کرنا آپشن نہیں ہے، تنازع ناگزیر ہے۔

بریگیڈیئر جنرل اسدی نے کہا ہے کہ ہم جنگ کے لیے تیار ہیں ہمیں اس سے کوئی مسئلہ نہیں، اگر جنگ میں نیٹو بھی شامل ہوتا ہے تو ہمیں پریشانی نہیں ہے۔

دوسری جانب ایران کی پاسدارانِ انقلاب (آئی آر جی سی) کے ترجمان جنرل سردار محبی نے کہا ہے کہ جنگ بندی کے دوران ایران کی عسکری اور آپریشنل صلاحیتوں میں مزید اضافہ ہوا ہے اور مسلح افواج پہلے کے مقابلے میں زیادہ مضبوط اور تیار ہیں۔

یو این آئی۔ ع ا۔

تل ابیب، اسرائیلی وزیراعظم نیتن یاہو نے دعویٰ کیا ہے کہ ایران حالیہ تنازع کے دوران بہت بھاری قیمت ادا کرچکا ہے اور موجودہ ایرانی نظام اپنی سابقہ حالت میں واپس نہیں جا سکے گا۔

سوشل میڈیا پلیٹ فارم ایکس پر جاری اپنے بیان میں نیتن یاہو نے کہا کہ ایران پہلے ہی ایک بہت بھاری قیمت ادا کر چکا ہے، ایران میں دہشت گردی پر مبنی اس نظام کی بنیادیں ہل چکی ہیں۔

انہوں نے مزید کہا کہ یہ حکومت دوبارہ پہلے جیسی نہیں بن سکے گی اور اس کا زوال ناگزیر ہے۔

دوسری جانب ایرانی حکام کا مؤقف ہے کہ حالیہ تنازع کے باوجود ان کی دفاعی اور عسکری صلاحیتوں میں اضافہ ہوا ہے اور ملک کسی بھی ممکنہ خطرے کا مقابلہ کرنے کے لیے مکمل طور پر تیار ہے۔

یو این آئی۔ ع ا۔

تہران، ایران کی پاسدارانِ انقلاب (آئی آر جی سی) کے ترجمان جنرل سردار محبی نے کہا ہے کہ جنگ بندی کے دوران ایران کی عسکری اور آپریشنل صلاحیتوں میں مزید اضافہ ہوا ہے اور مسلح افواج پہلے کے مقابلے میں زیادہ مضبوط اور تیار ہیں۔

ایک موقع پر گفتگو کرتے ہوئے جنرل سردار محبی نے کہا کہ آج ہماری مسلح افواج ماضی کے مقابلے میں بہتر صورتِ حال میں ہیں اور دفاعی تیاریوں کے حوالے سے مزید مضبوط ہو چکی ہیں۔ انہوں نے کہا کہ ایران، امریکہ اور اسرائیل کے درمیان کشیدگی اور جنگی صورتِ حال سے ایرانی افواج کو دشمن کی حکمتِ عملی، صلاحیتوں اور آپریشنل انداز کو بہتر طور پر سمجھنے کا موقع ملا۔

ترجمان کے مطابق اس جنگ کا ایک اہم نتیجہ یہ نکلا کہ ہماری مسلح افواج کے دشمن کے بارے میں آپریشنل معلومات اور تجربے میں نمایاں اضافہ ہوا ہے۔ جنرل محبی نے خبردار کرتے ہوئے کہا کہ اگر مخالف فریق دوبارہ عسکری محاذ پر آتا ہے تو ایران کا ردعمل ماضی سے مختلف ہو گا۔ ان کا کہنا ہے کہ اگر دشمن دوبارہ جنگی میدان میں آیا تو آپریشن کی نوعیت، جنگ کا جغرافیہ اور استعمال ہونے والے ہتھیار بھی مختلف ہوں گے۔

جنرل محبی نے یہ بھی کہا کہ پاسدارانِ انقلاب تمام ممکنہ حالات اور خطرات سے نمٹنے کے لیے مکمل طور پر تیار ہیں اور کسی بھی ممکنہ جارحیت کا جواب دینے کی صلاحیت رکھتے ہیں۔

یو این آئی۔ ع ا۔