تہران،ایرانی وزیر خارجہ سید عباس عراقچی کی عمانی وزیر خارجہ بدر بن حمد البوسعیدی اور ترک وزیر خارجہ حاقان فیدان سے ٹیلیفون پر علیحدہ علیحدہ گفتگو ہوئی۔تہران سے ایرانی وزارت خارجہ کے مطابق گفتگو میں آبنائے ہرمز کی صورتحال سمیت حالیہ علاقائی پیش رفت پر تبادلہ خیال ہوا۔اس موقع پر تینوں وزرائے خارجہ نے کشیدگی میں اضافہ روکنے کے لیے سفارتی چینلز استعمال کرنے کی ضرورت پر زور دیا۔ادھر انقرہ سے ترک وزارت خارجہ کے مطابق ترکیہ کے وزیر خارجہ حاقان فیدان نے اپنے ایرانی ہم منصب سید عباس عراقچی سے خطے کی موجودہ صورتحال اور جنگ بندی پر تبادلہ خیال کیا۔

یو این آئی۔م ا ع

تہران، ایرانی پاسدارن انقلاب کی بحری فوج نے کہا ہے کہ آج صبح صوبہ خوزستان پر امریکی فضائی حملوں میں پاسدارن کے 3 اہلکار شہید ہوئے۔

عرب میڈیا کے مطابق اپنے بیان میں ایرانی پاسداران انقلاب کی بحری فوج کا کہنا ہے کہ ہرمز میں امریکی مہم جوئی یا جہاز رانی میں مداخلت کا فیصلہ کن جواب دیا جائے گا۔

بحری فوج ایرانی پاسدارن انقلاب نے کہا کہ غیر ملکیوں کو آبنائے ہرمز میں کوئی دلچسپی نہیں، امریکا کی فوجی مہم جوئی آبنائے ہرمز کے دوبارہ کھلنے میں رکاوٹ کی وجہ بنے گی۔

خیال رہے کہ پاسداران انقلاب کی بحری فوج کا بیان ایسے وقت میں سامنے آیا ہے جب امریکی صدر ڈونلڈ ٹرمپ نے ایران کے ساتھ مفاہمتی یادداشت کے ختم ہونے کا اعلان کیا۔

امریکی صدر کے اس اعلان کے بعد ایران اور امریکہ نے ایک دوسرے کے فوج اہداف کو کامیابی سے نشانہ بنانے کے دعوے کیے۔

یو این آئی۔ ع ا۔

تہران، ایران نے اقوام متحدہ کی سلامتی کونسل کو اپنی سرزمین پر نئے امریکی حملوں سے باضابطہ طور پر آگاہ کر دیا ہے۔

ایران نے سلامتی کونسل پر زور دیا ہے کہ وہ اس معاملے میں فوری ایکشن لے اور امریکہ کو سنگین نتائج سے خبردار کیا ہے۔

اقوام متحدہ میں ایران کے سفیر امیر سعید ایروانی نے سلامتی کونسل اور اقوام متحدہ کے سکریٹری جنرل کے نام ایک خط میں امریکہ کے ان اقدامات کی شدید مذمت کرتے ہوئے انہیں اقوام متحدہ کے قوانین اور بین الاقوامی ذمہ داریوں کی صریح خلاف ورزی قرار دیا ہے۔ انہوں نے کہا کہ امریکہ بغیر کسی اشتعال کے ایران کی خودمختاری اور علاقائی سالمیت پر حملے جاری رکھے ہوئے ہے۔

یہ خط جنوبی ایران پر امریکی حملے کے صرف ایک دن بعد بھیجا گیا تھا، جس میں املاک کو کافی نقصان پہنچا تھا اور متعدد ایرانی فوجی ہلاک ہوئے تھے۔ اس کے فوراً بعد، امریکی طیاروں نے ملک کے جنوب میں کئی دیگر اہداف پر دوبارہ حملے شروع کر دیے۔

ایرانی میڈیا کے مطابق نئے حملوں میں جنوبی شہر چابہار کو نشانہ بنایا گیا، جس سے ایک ہسپتال اور بجلی کے بنیادی ڈھانچے کو نقصان پہنچا۔ ایران شہر اور بوشہر سمیت کئی دوسرے شہر بھی متاثر ہوئے جن میں ایک شخص کی ہلاکت کی اطلاعات ہیں۔

خط میں یاد دلایا گیا کہ امریکی کارروائی نے ایران بھر میں امریکی اور اسرائیلی حملوں کے 100 سے زائد دنوں کے بعد گزشتہ ماہ دونوں فریقوں کے درمیان طے پانے والے مفاہمت کی یادداشت کی بھی خلاف ورزی کی، جس کی پاکستان نے ثالثی کی تھی۔

ایران نے کہا کہ بار بار اور جان بوجھ کر ان وعدوں کو توڑ کر امریکہ نے معاہدے کو یکسر مسترد کر دیا ہے۔ اب اس غیر قانونی رویے اور کشیدگی میں اضافے کی پوری طرح ذمہ دار ہے۔

خط میں کہا گیا ہے کہ اس سے صاف ظاہر ہوتا ہے کہ امریکہ کو بین الاقوامی قوانین کی کوئی پرواہ نہیں ہے۔ ایرانی سفیر نے سلامتی کونسل اور اقوام متحدہ کے سیکرٹری جنرل سے اپیل کی کہ وہ اپنی ذمہ داریاں پوری کریں اور امریکہ کو روکنے اور اسے جوابدہ ٹھہرانے کے لیے فوری، موثر اور فیصلہ کن اقدامات کریں۔

مسٹر ایروانی نے اس بات پر بھی افسوس کا اظہار کیا کہ اس طرح کے معاملات میں سلامتی کونسل کی بے عملی نے امریکہ کی حوصلہ افزائی کی ہے۔ نتیجتاً، امریکہ ایران کے خلاف طاقت کا استعمال جاری رکھے ہوئے ہے، سلامتی کونسل کی ساکھ کو نقصان پہنچا رہا ہے اور بین الاقوامی امن و سلامتی کو خطرے میں ڈال رہا ہے۔ ان کا کہنا تھا کہ ان خلاف ورزیوں سے پیدا ہونے والے کسی بھی نتائج کی پوری ذمہ داری امریکا پر عائد ہوتی ہے۔

یو این آئی۔ ع ا۔