سرینگر، جنوبی کشمیر کے ضلع شوبیاں میں لشکرِ طیبہ کے ایک کمانڈر کی ہلاکت کے ایک دن بعد، سیکیورٹی فورسز نے جمعرات کو مسلسل چھٹے روز بھی اس کے مفرور ساتھی کی تلاش جاری رکھی۔حکام کے مطابق، فوج، جموں و کشمیر پولیس اور سی آر پی ایف کی مشترکہ ٹیموں نے شوبیاں کے میمنڈر-چنا پورہ علاقے میں تلاشی مہم کو مزید تیز کر دیا ہے۔ یہ آپریشن 4 جولائی کو اس وقت شروع کیا گیا تھا جب خفیہ اداروں کی جانب سے علاقے میں لشکرِ طیبہ کے دو عسکریت پسندوں کی موجودگی کی اطلاع ملی تھی۔ جاری آپریشن کے دوران اب تک سیکیورٹی فورسز اور عسکریت پسندوں کے درمیان دو بار فائرنگ کا تبادلہ ہو چکا ہے—پہلی مرتبہ ہفتے کی شام اور دوسری بار بدھ کی صبح۔

ایک اہلکار نے بتایا، “دوسرے عسکریت پسند کا سراغ لگانے کے لیے تلاشی مہم جاری ہے، جس کے بارے میں خدشہ ہے کہ وہ اسی علاقے میں کہیں چھپا ہوا ہے۔”

واضح رہے کہ بدھ کی صبح سیکیورٹی فورسز کو اس وقت ایک بڑی کامیابی ملی جب انہوں نے لشکرِ طیبہ کے مقامی کمانڈر زاکر احمد گنائی کو ایک مقابلے میں ہلاک کر دیا۔ ضلع کلگام کے موٹلہامہ گاؤں کے رہائشی زاکر نے ستمبر 2023 میں عسکریت پسندی کی راہ اختیار کی تھی۔

ذاکر کی ہلاکت کے بعد، حکام کا ماننا ہے کہ اب وادی کشمیر میں صرف ایک ہی مقامی عسکریت پسند سرگرم رہ گیا ہے، جبکہ سیکیورٹی حکام کے تخمینے کے مطابق تقریباً 20 سے 30 پاکستانی دہشت گرد اب بھی وادی میں موجود ہیں۔سرکاری ذرائع کا کہنا ہے کہ شوبیاں میں جاری یہ آپریشن اس وقت تک ختم نہیں ہوگا جب تک پورے علاقے کو مکمل طور پر کلیئر نہیں کر دیا جاتا اور دوسرے عسکریت پسند کو گرفتار یا ہلاک نہیں کر دیا جاتا۔

یو این آئی۔م ا ع

سرینگر، جموں و کشمیر کے اقتصادی جرائم کے ونگ (ای او ڈبلیو) نے انسداد منشیات ٹاسک فورس (اے این ٹی ایف) کے ساتھ مل کر ضبط کی گئی منشیات کی بڑی مقدار کو جمعرات کو تلف کر دیا۔

حکام نے بتایا کہ عدالت کے احکامات پر عمل کرتے ہوئے ان منشیات کو پلوامہ کے آئی جی سی لسی پورہ میں واقع بھٹی میں تلف کیا گیا۔ تلف کی گئی ممنوعہ اشیاء میں چرس، گانجہ اور دیگر منشیات شامل تھیں۔ ان اشیاء کو مختلف مہمات کے دوران ضبط کیا گیا تھا۔ ای او ڈبلیو نے بتایا کہ یہ تلفی ڈرگ ڈسپوزل کمیٹی کی نگرانی میں سائنسی اور ماحول دوست طریقے سے کی گئی۔

یہ مہم کشمیر ای او ڈبلیو کے سینئر سپرنٹنڈنٹ آف پولیس اور ڈرگ ڈسپوزل کمیٹی کے چیئرمین عبدالواحد شاہ، انسداد منشیات ٹاسک فورس کی ڈپٹی سپرنٹنڈنٹ آف پولیس کبرا نذیر، ای او ڈبلیو کے سینئر پراسیکیوٹنگ آفیسر عبدالباری اور دیگر حکام کی نگرانی میں چلائی گئی۔

حکام نے کہا کہ ضبط کی گئی منشیات کو تلف کرنا نشہ مکت بھارت ابھیان کے تئیں حکومت کے مسلسل عزم اور منشیات کے نیٹ ورک کو تباہ کرتے ہوئے منشیات کے غلط استعمال پر روک لگانے کی کوششوں کو ظاہر کرتا ہے۔

یو این آئی۔ این یو۔

سرینگر، جموں و کشمیر پولیس نے جمعرات کو ‘غیر قانونی سرگرمی (روک تھام) ایکٹ’ (یو اے پی اے) کے تحت بارہمولہ ضلع میں کئی جگہوں پر ایک ساتھ چھاپہ مارے۔

اس دوران فارنسک جانچ کے لیے چار موبائل فون اور ایک لیپ ٹاپ ضبط کیا گیا۔ پولیس نے بتایا کہ یہ تلاشی مہم بارہمولہ پولیس اسٹیشن میں یو اے پی اے کی دفعہ 13 اور بھارتیہ نیائے سنہتا (بی این ایس) کی دفعہ 351(3) کے تحت درج ایف آئی آر کے سلسلے میں چلائی گئی۔

پولیس کے مطابق، تلاشی مہم اقبال کالونی کے فراز اشرف گوجری، کنلی باغ کے وسیم علی کر، توحید گنج کے تنویر احمد میر (عرف کاکا میر، جو فی الحال گلنار پارک، آزاد گنج میں رہائش پذیر ہیں) اور خواجہ باغ جے ٹی کے وسیم حسین میر کے گھروں پر چلائی گئی۔ پولیس نے بتایا کہ مہم کے دوران چار موبائل فون اور ایک لیپ ٹاپ ضبط کیا گیا ہے؛ انہیں فارنسک جانچ کے لیے محفوظ رکھا گیا ہے تاکہ جاری تفتیش میں مدد مل سکے۔

پولیس نے کہا کہ تلاشی کی کارروائی قانونی عمل کے تحت اور ایگزیکٹو مجسٹریٹ اور آزاد گواہوں کی موجودگی میں کی گئی۔ انہوں نے بتایا کہ یہ کارروائی غیر قانونی سرگرمیوں سے جڑے جرائم کے معاملے میں بارہمولہ پولیس کی جاری تفتیش کا حصہ ہے۔ ساتھ ہی، انہوں نے کہا کہ یہ تفتیش پیشہ ورانہ، قانونی اور شفاف طریقے سے کی جا رہی ہے، جس میں عوامی نظم و نسق اور قومی سلامتی کا بھی خیال رکھا جا رہا ہے۔

یو این آئی۔ این یو۔