نئی دہلی، وزیر اعظم نریندر مودی نے اتر پردیش کے ضلع مرزا پور میں پیش آئے سڑک حادثے میں جانوں کے ضیاع پر گہرے دکھ کا اظہار کیا ہے اور متاثرین کے لیے مالی امداد کا اعلان کیا ہے وزیر اعظم مودی نے جمعرات کو سوشل میڈیا پر ایک پوسٹ میں کہا کہ وہ اس حادثے میں ہونے والی ہلاکتوں سے انتہائی رنجیدہ ہیں انہوں نے حادثے میں جاں بحق ہونے والے افراد کے لواحقین کو دو دو لاکھ روپے اور زخمیوں کو 50-50 ہزار روپے کی امداد دینے کا اعلان کیا ہے۔

انہوں نے کہا: “اتر پردیش کے مرزا پور میں ہونے والے حادثے میں جانی نقصان سے مجھے شدید دکھ پہنچا ہے۔ میری دلی ہمدردیاں غمزدہ خاندانوں کے ساتھ ہیں۔ میں زخمیوں کی جلد صحت یابی کے لیے پراتھنا ہوں۔

واضح رہے کہ مرزا پور کے ڈرمنڈ گنج علاقے میں بدھ کی رات ایک پہاڑی سڑک پر پیش آنے والے المناک حادثے میں 4 بچوں سمیت 11 افراد جاں بحق ہو گئے۔ یہ حادثہ اس وقت پیش آیا جب ایک بے قابو ٹرک نے دو کاروں کو ٹکر مار دی، جس کے نتیجے میں گاڑیوں میں آگ لگ گئی۔

یو این آئی۔ ایم جے

مرزاپور، اتر پردیش کے ضلع مرزاپور کے ڈرمنڈگنج تھانہ علاقے میں وارانسی–کنیاکماری قومی شاہراہ پر واقع بھیسوڑ بلائے پہاڑ کے بڑکا موڑ پر بدھ کی دیر رات پیش آئے ہولناک سڑک حادثے میں جاں بحق ہونے والے تمام 11 افراد کی شناخت کر لی گئی ہے۔

پولیس سپرنٹنڈنٹ ارپنا کوشک کے مطابق مدھیہ پردیش کی طرف سے چنا لاد کر آنے والا ایک ٹرک ممکنہ طور پر بریک فیل ہونے کے باعث بے قابو ہو گیا اور آگے چل رہی بولیرو گاڑی کو زوردار ٹکر مار دی۔ ٹکر کے بعد بولیرو ایک سوئفٹ کار سے جا ٹکرائی، جو آگے چل رہے ایک ٹریلر ٹرک سے جا ٹکرائی۔ حادثے کے بعد بولیرو سڑک سے نیچے جا گری اور اس میں آگ لگ گئی، جبکہ دیگر گاڑیاں آپس میں پھنس گئیں۔

آگ اس قدر شدید تھی کہ بولیرو میں سوار افراد کو باہر نکلنے کا موقع نہیں ملا اور نو افراد جل کر جاں بحق ہو گئے۔ مرنے والوں میں ضلع مرزاپور کے جِگنا تھانہ علاقے کے نرینہ گاؤں کے ایک ہی خاندان کے افراد شامل ہیں، جو مدھیہ پردیش کے میہر دیوی دھام سے ایک آٹھ سالہ بچے کی منڈن رسم ادا کر کے واپس لوٹ رہے تھے۔

مرنے والوں میں شیوا سنگھ (8)، وندنا سنگھ (48)، پیوش سنگھ (15)، پنکج سنگھ (40)، وینا سنگھ (47)، سونم سنگھ (9) اور ڈرائیور وشنو سنگھ (45) شامل ہیں۔ اس کے علاوہ ستنا (مدھیہ پردیش) کی رہائشی پرینکا سنگھ (42) اور ان کے بیٹے کارتکیہ سنگھ (19) بھی جاں بحق ہوئے۔ حادثے میں سون بھدر کے جے پرکاش (28) اور ٹرک کنڈکٹر وکاس شرما (مدھیہ پردیش) کی بھی موت ہوئی۔

واقعے کے بعد پولیس سپرنٹنڈنٹ اور ضلع مجسٹریٹ سمیت کئی تھانوں کی فورس موقع پر پہنچ گئی۔ فائر بریگیڈ کی مدد سے آگ پر قابو پایا گیا، جس کے بعد کئی گھنٹوں کی محنت کے بعد ٹریفک بحال کیا جا سکا۔ تمام لاشوں کو قبضے میں لے کر پوسٹ مارٹم کے لیے بھیج دیا گیا ہے۔

اتر پردیش کے وزیر اعلیٰ یوگی آدتیہ ناتھ نے واقعے کا نوٹس لیتے ہوئے گہرے دکھ کا اظہار کیا ہے اور زخمیوں کے مناسب علاج اور متاثرہ خاندانوں کو مالی امداد فراہم کرنے کی ہدایت دی ہے۔

مقامی لوگوں کے مطابق بڑکا موڑ علاقے میں اکثر حادثات پیش آتے رہتے ہیں، جس کے باعث اسے “کِلَر موڑ” کے نام سے جانا جاتا ہے۔ عینی شاہدین کے مطابق حادثے کے وقت آگ اتنی شدید تھی کہ کوئی بھی قریب جانے کی ہمت نہیں کر پا رہا تھا اور اندر پھنسے لوگ مدد کے لیے پکارتے رہ گئے۔

یو این آئی۔ م ع۔ایف اے

نئی دہلی، کانگریس صدر ملکارجن کھرگے نے جمعرات کو تمل ناڈو اور مغربی بنگال کے ووٹرز سے بڑی تعداد میں پولنگ میں حصہ لینے کی اپیل کی ہے۔ انہوں نے کہا کہ آج کی یہ لڑائی شہریوں کے حقوق کو محفوظ بنانے اور وفاقی ڈھانچے، مساوات، انصاف، آزادی اور منطق پسندی کے دفاع کے لیے ہے۔

تمل ناڈو کے ووٹرز کو مخاطب کرتے ہوئے مسٹر کھڑگے نے سوشل میڈیا پر کہا کہ یہ اپنے جمہوری حق کو استعمال کرنے اور ان طاقتوں کے خلاف کھڑے ہونے کا وقت ہے جو ریاستوں کے حقوق کو کمزور کرنا چاہتی ہیں۔ انہوں نے خاص طور پر پہلی بار ووٹ دینے والے نوجوانوں سے اپیل کی کہ وہ بڑی تعداد میں نکلیں اور ریاست کے مستقبل کو مضبوط بنائیں۔

مغربی بنگال میں اسمبلی انتخابات کے پہلے مرحلے کے موقع پر انہوں نے تمام شہریوں سے ووٹنگ میں بڑھ چڑھ کر حصہ لینے کی درخواست کی۔ انہوں نے زور دیا کہ کسی بھی طرح کے خوف یا دباؤ میں آئے بغیر ووٹ ڈالیں، کیونکہ “آپ کا ووٹ ہی آپ کی آواز ہے۔”

مسٹر کھڑگے نے آئین کی راہ پر چلتے ہوئے جمہوریت کی روح کو برقرار رکھنے کی اپیل کی۔ انہوں نے کہا کہ مغربی بنگال عظیم رہنماؤں کی سرزمین رہی ہے جنہوں نے جمہوریت، سماجی انصاف اور مساوات کے لیے جدوجہد کی، اور ان اقدار کو برقرار رکھنا انتہائی ضروری ہے۔ انہوں نے نوجوانوں سے خاص طور پر کہا کہ وہ پورے اعتماد کے ساتھ اپنے حقِ رائے دہی کا استعمال کریں تاکہ حقیقی ترقی ریاست کے ہر کونے تک پہنچ سکے۔

واضح رہے کہ اس وقت تمل ناڈو اور مغربی بنگال میں اسمبلی انتخابات کے لیے پولنگ کا عمل جاری ہے۔

یو این آئی۔ ایم جے۔