نئی دہلی لوک سبھا میں قائد حزب اختلاف راہل گاندھی نے کیرالہ میں متحدہ جمہوری محاذ (یو ڈی ایف) کی جیت کے بعد ریاست کے عوام کا شکریہ ادا کیا ہے مسٹر گاندھی نے سوشل میڈیا پر اپنے پیغام میں لکھا، “کیرالہ کے لوگوں کا شکریہ” انہوں نے اس جیت کو “فیصلہ کن عوامی مینڈیٹ” قرار دیا اور کہا کہ کیرالہ کے عوام نے جس اعتماد کے ساتھ یو ڈی ایف کو منتخب کیا ہے، وہ ذمہ داری کو مزید بڑھاتا ہے۔ انہوں نے انتخابی مہم میں شامل تمام لیڈروں اور کارکنوں کو مبارکباد دیتے ہوئے اسے ایک مشکل لیکن منظم مہم قرار دیا۔ انہوں نے مزید کہا کہ کیرالہ میں صلاحیت اور بے پناہ امکانات موجود ہیں، اور اب یو ڈی ایف حکومت کے پاس ایک واضح وژن ہے جس کے ذریعے ان صلاحیتوں کا صحیح استعمال کیا جائے گا۔ مسٹر گاندھی نے یہ بھی کہا کہ وہ جلد ہی کیرالہ جا کر اپنے “کیرالہ پریوار” سے ملنے کے لیے بے تاب ہیں۔

قابل ذکر ہے کہ کیرالہ میں مارکسی کمیونسٹ پارٹی (ایم سی پی) کی قیادت والی حکومت کو عبرتناک شکست کا سامنا کرنا پڑا ہے۔ ووٹوں کی گنتی کے موجودہ رجحانات کے مطابق کانگریس کی قیادت والے یو ڈی ایف نے کیرالہ میں اچھی خاصی برتری حاصل کر لی ہے۔

یواین آئی ۔ایف اے

نئی دہلی ملک کی چار ریاستوں اور ایک مرکز کے زیر انتظام علاقے میں ہوئے اسمبلی انتخابات کی ووٹوں کی گنتی کے رجحانات کے تعلق سے یہاں بھارتیہ جنتا پارٹی (بی جے پی) دفتر میں جشن کا ماحول ہے اور یہاں تقریباً پانچ سو لوگوں کے کھانے کے لیے لذیذ پکوان تیار کیے جا رہے ہیں ووٹوں کی گنتی کے رجحانات کے مطابق بی جے پی جہاں آسام میں لگاتار تیسری بار حکومت بناتی دکھائی دے رہی ہے، وہیں مغربی بنگال میں تاریخی کامیابی حاصل کرتے ہوئے پہلی بار حکومت بنانے کی سمت میں گامزن ہے۔ پارٹی کو ملنے والی عوامی حمایت سے بی جے پی کارکنان پرجوش ہیں اور جشن منانے کی تیاریوں میں مصروف ہو گئے ہیں۔ موصولہ اطلاع کے مطابق یہاں دین دیال مارگ پر واقع بی جے پی ہیڈ کوارٹر میں تقریباً 400 سے 500 لوگوں کے لیے کھانا تیار کیا جا رہا ہے۔ ناشتے میں سینڈوچ، آلو پوری، پوہا، جلیبی کے ساتھ تازہ پھل، لسی، ربڑی اور روایتی ‘مشٹی دوئی’ پیش کی جائے گی۔

موصولہ اطلاع کے مطابق وزیر اعظم نریندر مودی شام تقریباً ساڑھے چھ بجے بی جے پی ہیڈ کوارٹر پہنچیں گے اور پارٹی کو ملی جیت کے جشن میں شامل ہوں گے۔ مسٹر مودی یہاں پارٹی کارکنوں سے خطاب بھی کریں گے۔ وہیں، بی جے پی کارکنان آسام اور بنگال میں جگہ جگہ مٹھائیاں تقسیم کر کے اپنی خوشی کا اظہار کر رہے ہیں۔ آسام اور مغربی بنگال میں بی جے پی کی بھاری جیت یقینی نظر آ رہی ہے۔ بی جے پی کارکنان رنگ و گلال اڑا رہے ہیں اور ایک دوسرے کو مبارکباد دے رہے ہیں۔

یواین آئی۔ایف اے

نئی دہلی پانچ ریاستوں کے اسمبلی انتخابات کی ووٹوں کی گنتی کے رجحانات میں مغربی بنگال اور تامل ناڈو میں بڑے الٹ پھیر کے امکان کے ساتھ بھارتیہ جنتا پارٹی بنگال میں اپنے دم پر زبردست اکثریت حاصل کرنے جا رہی ہے، وہیں تامل ناڈو میں اداکار وجے کے کرشمے کے دم پر ٹی وی کے واضح طور پر سب سے بڑی پارٹی کے طور پر ابھری ہے۔ کیرالہ میں اقتدار کی تبدیلی کے اشاروں کے درمیان ایک دہائی کے بعد کانگریس کی قیادت میں متحدہ جمہوری محاذ (یو ڈی ایف) کی حکومت بننے کا قوی امکان ہے۔ آسام اور پڈوچیری میں قومی جمہوری اتحاد (این ڈی اے) حکومت کی واپسی یقینی لگ رہی ہے۔

الیکشن کمیشن کے اعداد و شمار کے مطابق ایک بجے تک مغربی بنگال میں ایگزٹ پول کے اندازوں کے مطابق بی جے پی کو واضح برتری مل رہی ہے اور وہ اکیلے دم پر زبردست اکثریت حاصل کرنے جا رہی ہے۔ ریاست کی 294 اسمبلی نشستوں میں سے 284 کے ابتدائی رجحانات میں اپوزیشن بی جے پی 187 جبکہ حکمراں ترنمول کانگریس صرف 92 نشستوں پر آگے چل رہی ہے۔ سال 2021 کے انتخابات میں ترنمول نے 220 اور بی جے پی نے 71 نشستیں جیتی تھیں۔

تامل ناڈو میں بھی رجحانات میں ایگزٹ پول کے برعکس بڑا الٹ پھیر دیکھنے کو ملا ہے۔ ریاست میں ابھی تک رجحانات میں کسی بھی جماعت کو واضح اکثریت کے اشارے نہیں ملے ہیں، لیکن اسمبلی کی 234 میں سے 224 نشستوں کے رجحانات میں ٹی وی کے غیر متوقع طور پر 110 نشستوں کے ساتھ سب سے آگے ہے۔ انا ڈی ایم کے دوسرے نمبر پر 57 نشستوں پر اور حکمراں ڈی ایم کے 48 نشستوں پر آگے رہتے ہوئے تیسرے نمبر پر ہے۔ کانگریس 4 اور پی ایم کے 5 نشستوں پر آگے ہے۔

پچھلے انتخاب میں ڈی ایم کے اتحاد کو 158 جبکہ انا ڈی ایم کے اتحاد کو 69 نشستیں ملی تھیں۔

آسام اسمبلی کی 126 میں سے 124 نشستوں کے رجحانات موصول ہوئے ہیں اور ان میں این ڈی اے کو واضح اکثریت ملتی دکھائی دے رہی ہے۔ رجحانات میں بی جے پی کو 79، کانگریس کو 24، آسام گن پریشد کو 09 اور بوڈولینڈ پیپلز فرنٹ (بی او پی ایف) کو 10 نشستوں پر برتری حاصل ہے۔ پچھلے انتخابات میں این ڈی اے کو 74، کانگریس اتحاد کو 28 اور اے یو ڈی ایف کو 15 نشستیں ملی تھیں۔

کیرالہ میں اندازوں کے مطابق کانگریس کی قیادت والے متحدہ جمہوری محاذ کو اکثریت ملنے جا رہی ہے۔ اسمبلی کی 140 میں سے 127 نشستوں کے رجحانات ملے ہیں جن میں سے کانگریس کو 63، اس کی حلیف جماعت انڈین یونین مسلم لیگ کو 23، مارکسی کمیونسٹ پارٹی کو 25، بھارتیہ کمیونسٹ پارٹی کو 09 اور کے ایف سی کو 7 نشستوں پر برتری مل رہی ہے۔ پچھلے انتخاب میں بائیں بازو کے جمہوری محاذ (ایل ڈی ایف) کو 94 اور متحدہ محاذ کو 42 نشستیں ملی تھیں۔

پڈوچیری اسمبلی کی 30 میں سے 16 نشستوں کے نتائج اور ابتدائی رجحانات موصول ہوئے ہیں جن میں این ڈی اے کے اکثریت کی طرف بڑھنے کے اشارے ملے ہیں۔ اے آئی این آر سی نے چھ نشستیں جیت لی ہیں اور اس کے امیدوار تین نشستوں پر آگے ہیں۔ آزاد امیدوار ایک نشست پر جیت کے ساتھ دو نشستوں پر آگے چل رہے ہیں۔ بی جے پی نے ایک نشست جیتی ہے اور ایک پر آگے ہے۔ کانگریس اور انا ڈی ایم کے نے بھی ایک ایک نشست جیتی ہے۔

یواین آئی ۔ایف اے