ماسکو، روسی وزیر خارجہ سرگئی لاروف نے کہا ہے کہ ممکنہ معاہدے میں ایران اور پڑوسی ممالک کے مفادات کو مدنظر رکھنا چاہیے، امریکہ، ایران کے ساتھ کشیدگی کو تسلیم کرتا ہے۔

ماسکو میں ایک روسی اخبار کو انٹرویو دیتے ہوئے سرگئی لاروف نے کہا کہ امریکہ اس صورتحال سے پریشان ہے اور اسے حل کرنے کا طریقہ نہیں جانتا، امریکہ خود بنیادی طور پر اس صورتحال کا ذمہ دار ہے۔

روسی وزیر خارجہ نے کہا کہ پاکستانی ثالثی میں جاری مذاکرات کی بھرپور حمایت کرتے ہیں۔

انکا مزید کہنا تھا کہ سعودی عرب اور مصر بھی مذاکراتی عمل میں کردار ادا کر رہے ہیں۔ یہ بہت ضروری ہے کہ بات چیت جاری رہے۔

یو این آئی۔ ع ا۔

واشنگٹن، امریکہ کے صدر ڈونلڈ ٹرمپ نے کہا ہے کہ یوکرین کے صدر زیلنسکی اور روسی صدر ولادیمیر پوتن ملاقات کریں تو یہ بہت اچھا ہوگا۔

وائٹ ہاؤس میں میڈیا سے بات کرتے ہوئے صدر ٹرمپ نے کہا کہ یوکرین تنازع کے حل کے لیے مصالحت ضروری ہے۔

ایران کی صورتحال سے متعلق سوال پر صدر ٹرمپ نے دعویٰ کیا کہ امریکہ نے ایرانی قیادت، نیوی اور فضائیہ کو ختم کردیا ہے۔

انہوں نے واضح کیا کہ ایران کی جانب سے امریکی فوج پر حملہ جنگ کے دوبارہ آغاز کا جواز بن سکتا ہے۔ امریکی صدر نے مزید کہا کہ ایران کے ساتھ ڈیل کیے بغیر بھی افزودہ یورینیم حاصل کیا جا سکتا ہے۔ ان کا کہنا تھا کہ ڈیل کے تحت ایران نیوکلیئر ہتھیار نہیں رکھ سکے گا، آپ جلد جان جائیں گے کہ ایران کے ساتھ معاہدہ کیا ہے۔ امریکی صدر نے کہا کہ ایرانی سپریم لیڈر سے ملاقات نہیں کرنا چاہتا، ایران کے ساتھ ڈیل کی صورت میں سپریم لیڈر سے ملاقات ممکن ہے۔ ڈونلد ٹرمپ نے کہا کہ لبنان کی صورتحال پر نظر رکھنی ہوگی، امن قائم ہونا لبنان کے لیے اچھا ہوگا، حزب اللّٰہ سے لبنان کی صورتحال پر گفتگو کی ہے۔

یو این آئی۔ ع ا۔

تہران، ایرانی وزیر خارجہ عباس عراقچی نے صدر ٹرمپ کے سپریم لیڈر سے ملاقات سے متعلق بیان پر ردعمل ظاہر کرتے ہوئے کہا ہم حقیقی دنیا میں رہتے ہیں۔

تفصیلات کے مطابق ایرانی وزیرِ خارجہ عباس عراقچی نے انٹرویو میں امریکی صدر ڈونلڈ ٹرمپ کے سپریم لیڈر سے ملاقات سے متعلق بیان کے حوالے سے پوچھے گئے سوال پر واضح کیا کہ “ہمیں حقیقت پسند ہونا چاہیے کیونکہ ہم حقیقی دنیا میں رہتے ہیں۔”

انہوں نے مزید کہا کہ وہ صدر ٹرمپ کے اس مخصوص بیان سے متعلق کچھ نہیں جانتے۔

انٹرویو کے دوران ایرانی وزیرِ خارجہ نے ملکی قیادت اور سیاسی ڈھانچے پر کھل کر بات کرتے ہوئے تصدیق کی کہ مجتبیٰ خامنہ ای ایران کے سپریم لیڈر ہیں اور ملک کے تمام امور پر ان کا مکمل کنٹرول ہے۔

عباس عراقچی کا کہنا تھا کہ وزارتِ خارجہ اور حکومت سپریم لیڈر سے مسلسل رابطے میں رہتی ہے، ان کے احکامات باقاعدگی سے ہم تک پہنچتے ہیں اور ملکی پالیسیاں انہی احکامات کے مطابق وضع کی جاتی ہیں اور ان پر عمل درآمد کیا جاتا ہے۔

خیال رہے امریکی صدسر ڈونلڈ ٹرمپ نے میڈیا سے گفتگو میں کہا تھا کہ ایران کے سپریم لیڈر سے ملنا نہیں چاہتا لیکن معاہدہ ہوجائے تو ممکن ہے سپریم لیڈر سے ملاقات ہوجائے، ڈیل ہونے کے بعد ایرانی سپریم لیڈر سے ملاقات ہو تو اچھا ہوگا۔

یو این آئی۔ ع ا۔