نئی دہلی، پہلگام دہشت گردانہ حملے کی پہلی برسی پر وزیر اعظم نریندر مودی نے اس المناک واقعہ میں جان گنوانے والوں کو یاد کیا اور سوگوار خاندانوں سے تعزیت کا اظہار کیا ہے مسٹر مودی نے سوشل میڈیا ایکس پر لکھا، “گزشتہ سال آج ہی کے دن پہلگام میں خوفناک دہشت گردانہ حملے میں جان گنوانے والے معصوم لوگوں کو ہم یاد کرتے ہیں۔ انہیں کبھی فراموش نہیں کیا جائے گا۔ میری تعزیت ان سوگوار خاندانوں کے ساتھ ہے جو اس بے پناہ نقصان کا سامنا کررہے ہیں۔”

انہوں نے کہا، “بطور قوم، ہم اس غم اور عزم کی گھڑی میں متحد ہیں۔ ہندوستان کسی بھی شکل میں دہشت گردی کے سامنے کبھی نہیں جھکے گا۔ دہشت گردوں کے مذموم عزائم کبھی کامیاب نہیں ہوں گے۔”

قابل ذکر ہے کہ 22 اپریل 2025 کو ہی دہشت گردوں نے جموں و کشمیر کے پہلگام میں وادی بیسرن میں گھومنے آئے سیاحوں پر اچانک اندھا دھند فائرنگ کردی تھی۔ اس حملے میں 26 بے گناہ لوگوں کی جانیں گئیں۔ اس دوران دہشت گردوں نے لوگوں سے ان کا نام اور مذہب پوچھ کر، خواتین اور بچوں کے سامنے ہی انہیں گولی مار دی۔ اس کے بعد ہندستانی فوج نے آپریشن سندور کے تحت پاکستان میں دہشت گردوں کے 9 ٹھکانے تباہ کر دیئے تھے۔

یواین آئی۔الف الف

نئی دہلی، وزیر دفاع راج ناتھ سنگھ نے ہندوستان اور جرمنی کے درمیان دفاعی ٹیکنالوجی اور سازوسامان کی مشترکہ ترقی اور تیاری کی اہمیت پر زور دیا ہےمسٹر سنگھ، جو جرمنی کے تین روزہ دورے پر ہیں، نے کہا کہ ان کی حکومت کی “آتم نربھر بھارت” مہم مشترکہ پیداوار، مشترکہ ترقی اور مشترکہ اختراع کی دعوت ہے۔ میونخ ہوکر برلن پہنچے وزیردفاع نے منگل کو جرمن پارلیمنٹیرینز سے خطاب کرتے ہوئے دونوں ممالک کے دفاعی صنعتی ماحولیاتی نظام کے درمیان تعاون بڑھانے کی بھرپور وکالت کی۔ اپنے دورے کے پہلے روز انہوں نے دفاع و سلامتی سے متعلق جرمن پارلیمنٹ کی قائمہ کمیٹی سے خطاب کرتے ہوئے کہا کہ آج دنیا کو نئے سکیورٹی خطرات کا سامنا ہے اور تکنیکی تبدیلی نے صورتحال کو انتہائی پیچیدہ بنا دیا ہے۔ انہوں نے کہا کہ بدلتے ہوئے ماحول سے ہم آہنگ ہونے کی تیاری کے ساتھ ایک نئے نقطہ نظر کی ضرورت ہے۔

وزیر دفاع نے کہا کہ وزیر اعظم نریندر مودی کی دور اندیش قیادت میں ہندوستان دفاعی شعبے میں بے مثال تبدیلی کا مشاہدہ کر رہا ہے اور جرمن صنعت کے ساتھ شراکت داری کو بڑھانے سے دونوں ممالک کو اہم فوائد حاصل ہو سکتے ہیں۔ مسٹر سنگھ نے کہا، “ہم جرمنی کے سرکردہ صنعتی اداروں کی قائم کردہ صلاحیتوں کو تسلیم کرتے ہیں نیز جدید اور ابھرتی ہوئی ٹیکنالوجیز میں معروف جرمن مِٹیلسٹینڈ (چھوٹی اور درمیانے درجے کی کمپنیوں) کے جوش و جذبے اور حرکیات کو سراہتے ہیں۔ ہندوستان میں بھی، ہمارے سٹارٹ اپس اور کاروباری نجی کمپنیاں تیزی سے ہماری قائم کردی دفاعی صنعتقں کی صلاحیتوں میں اضافہ کر رہی ہیں اور ان کی تکمیل کررہی ہیں۔ یہ ایک ایسا علاقہ ہے جہاں ہندوستان اور جرمنی قدرتی طور پر ایک دوسرے کی تکمیل کرتے ہیں اور ہماری شراکت داری مزید گہری ہو سکتی ہے۔

مسٹر سنگھ نے عصری عالمی چیلنجوں سے نمٹنے کے لیے مربوط ردعمل اور قابل اعتماد اسٹریٹجک شراکت داری کی ضرورت پر زور دیا۔ انہوں نے کہا کہ مسٹر مودی اور جرمن چانسلر فریڈرک مرز نے دو طرفہ اسٹریٹجک شراکت داری کو آگے بڑھانے پر خصوصی زور دیا ہے۔ یورپی یونین کی سطح پر بھی خیالات کی واضح ہم آہنگی نظر آتی ہے اور ہندستان کے ساتھ اس بڑھتی ہوئی مصروفیات کی عکاسی ہوتی ہے، جس میں ہندستان-یورپی یونین دفاعی اور اسٹریٹجک پارٹنرشپ بھی شامل ہے۔

وزر دفاع نے اس بات کا اعادہ کیا کہ ہندوستان اور جرمنی نہ صرف اسٹریٹجک شراکت دار ہیں بلکہ موجودہ وقت کے عالمی مباحثے کی تشکیل میں نتیجہ خیز آوازیں بھی ہیں۔ انہوں نے کہا، ’’ہم مشترکہ اقدار کے پابند جمہوریتیں ہیں اور لچک، اختراع اور ایک پرعزم صنعتی جذبے سے چلنے والی متحرک معیشتیں ہیں۔ قانون سازوں اور کمیٹی کے معزز اراکین کی حیثیت سے آپ کی رہنمائی، آراء اور حمایت ہمارے دفاعی اور اسٹریٹجک تعاون کے مستقبل کے لائحہ عمل کو مزید تقویت بخش سکتی ہے۔

جاری یواین آئی۔الف الف

بغیر محرم حج سفر خواتین کو بااختیار بنانے کی ایک مضبوط علامت : کوثر جہاں

نئی دہلی آج سعودی ایئرلائن کی ساتویں حج پرواز نمبر ایس وی-5909 کے ذریعے 43 بغیر محرم خواتین دہلی کے اندرا گاندھی انٹرنیشنل ایئرپورٹ سے فریضہ حج کی ادائیگی کے لیے مقدس شہر مدینہ روانہ ہوئیں اس موقع پر اندرا گاندھی انٹرنیشنل ایئرپورٹ کے ٹرمینل-3 پر دہلی اسٹیٹ حج کمیٹی کی چیئرپرسن کوثر جہاں، حج کمیٹی کے ایگزیکٹو آفیسر اشفاق احمد عارفی، ڈپٹی ایگزیکٹو آفیسر محسن علی اور حج کمیٹی کے دیگر عملے نے ان خواتین کا استقبال کیا اور پھولوں کے ساتھ ان کی عزت افزائی کرتے ہوئے انہیں حج کے سفر پر روانہ کیا۔

اس موقع پر چیئرپرسن کوثر جہاں نے میڈیا سے بات کرتے ہوئے کہا کہ وزیر اعظم نریندر مودی کی قیادت میں مرکزی حکومت کی اس قابلِ تعریف پہل سے اب معاشرے کے ہر طبقے کے لیے سہولیات پیدا ہو رہی ہیں۔ انہوں نے کہا کہ حکومت ہند کی اس پہل کے تحت بغیر محرم (بغیر مرد ساتھی) خواتین کا حج پر جانا نہ صرف مذہبی اہمیت رکھتا ہے بلکہ خواتین کو بااختیار بنانے کی ایک اہم مثال بھی ہے۔

قابلِ ذکر ہے کہ آج دہلی سے حج کے لیے روانہ ہونے والی 43 خواتین میں سے 12 دہلی سے، 21 اتر پردیش سے، 3 بہار سے، 4 جموں و کشمیر سے، 2 مدھیہ پردیش سے اور 2 اتراکھنڈ سے تعلق رکھتی ہیں۔ 18 اپریل سے شروع ہونے والی حج پروازوں کے سلسلے کی یہ ساتویں پرواز تھی، جس کے تحت اب تک مجموعی طور پر 2721 عازمین حج مدینہ روانہ ہو چکے ہیں۔ اب تک روانہ ہونے والوں میں 1423 مرد اور 1298 خواتین شامل ہیں۔

آئندہ 20 مئی تک سعودی ایئرلائن کی 54 پروازوں کے ذریعے دہلی اسٹیٹ سمیت شمالی ہندوستان کی مختلف ریاستوں کے 21,100 سے زائد عازمین حج مدینہ منورہ اور جدہ کے راستے مکہ مکرمہ روانہ ہوں گے۔ اس سال دہلی امبارکیشن سے حج کے لیے پہلے مرحلے میں 31 پروازوں کے ذریعے 12,240 عازمین مدینہ منورہ جائیں گے، جبکہ دوسرے مرحلے میں 23 پروازوں کے ذریعے 8,860 عازمین مکہ مکرمہ روانہ ہوں گے۔ جب کہ دہلی ریاست کے عازمین حج کی تعداد 3196 ہے۔

یو این آئی۔ ایف اے۔ م الف